Read Masana ESTER 9 Bible Online

ESTER 9 - Masana bible

ESTER 9

¹Hay til ma doogo yam ma'na, ma yum ala tilla vi Adar*, hay buurta doogo yam ɦidita vi til namna, buur ma liyn asawa kay li kuɗ gatta hiɗi dita vi mulla, buur ma sa gawt kay sa Yudiyana var ala nisi ma vatsi goyo, may lawta kayni muɗi bilmis', sa Yudiyana muɗi si sa vurum sa gawt kisina.

²Hay hoyok-ziyna vi naga ma kuɗ mulla Asuwerus kaf, sum sa Yudiyana tok tuwsiya kay mok sum sa gar kay lisi joona. Sa kep kaw ma as col voksi mayɗi, kay narta kuɗ sa Yudiyana kal hay diksiya.

³Sa yerimana vi nagat kaf, sa ŋarmanna, sa guvernera hiɗi sa li lopna vi mulda kaf gi dirsi kuɗ sa Yudiyana, kay narta kuɗ Mardose kali hay diksiya.

⁴Mardose muɗi mi sa ma ŋolo hay ziyna vi mulla. Selem ka tiy goy hay nagat kaf, dok-dok nam ka muɗ ŋol vok suwa suwa.

⁵Ki kayn nala sa Yudiyana ci sa gaw kisina kaf hiɗi kew-gaferaŋa kaf. Nisi cisi goyo, nisi vatsi goyo, sa gaw kisina nisi lassi ki nisi min nala.

⁶Hay Susa naga ŋolda ɦawa, sa Yudiyana ci sumun kis-vasl,

⁷hiɗi Parsandata, hiɗi Dalfon, hiɗi Aspata,

⁸hiɗi Porata, hiɗi Adaliya, hiɗi Aridata,

⁹hiɗi Parmakta, hiɗi Arizay, hiɗi Ariday, hiɗi Vayezata.

¹⁰Haman goora vi Hammedata ma gaw kay sa Yudiyana nisi ci gurona valam sa doogon goyo kaw. May hiɗi kayn kaf sa yudiyana may vurum slenɗi.

¹¹Hay buur na'ta de', labara co tam mulla kay ŋaɓta vi sum sa fi cita-goyta hay Susa, naga ŋolda.

¹²Mulla di tam ca-mulda Ester: Hay Susa hoyok-ziyn ma nolla, sa Yudiyan ci sumun kis-vasl, hiɗi gurona vi Haman sa doogona kaw. Naga hena ma kuɗ mulda nisi lum hayam mi mige? May jobta vag ka anige? Nan ma humagu. Siɗawta vag ka anige? Nan as hum siɗawta vagu.

¹³Ester hot dit tam mulla: Mulla, la naŋ mina, naŋ ma vul hagata tam sa Yudiyana sa hay Susa kay nisi ma li jifini ki vaydi nala kaw, a gurona vi Haman sa doogona nisi ma ɓalsi kulo kat guna.

¹⁴Nala mulla vul hagata kay nisi ma li nala. Nisi ɗo gatta vi mulla goy hay Susa kafe, gurona vi Haman sa doogona nisi ɓalsi kulo kat guna.

¹⁵Sa Yudiyana sa hay Susa tok tuwsi lo hay buurta doogo yam fiɗita vi tilla vi Adar*, nisi ci sumun kis-ɦidi, nisi min vurum slenɗi.

¹⁶Yudiya segena sa goy hay naga hena tok tuwsi kay suɗ irita visiya, kay hulot tuwsi goy hay ɓam sa gaw kisina. Nisi ci sum sa gaw kisina birim dok-siɗiya yam vasl, nisi may vurum slenɗi.

¹⁷Kayni hay buurta doogo yam ɦidita vi tilla vi Adar, nisi tun suk hay buurta doogo yam fiɗita, nisi muɗa' ti buurta vi yuldeta hiɗi firita.

¹⁸May sa Yudiyan hay Susa tok tuwsi hay buur ma doogo yam ɦidina hiɗi buur ma doogo yam fiɗina, tun suksiya hay buur ma doogo yam vaslna, nisi muɗum mi buur ma yuldeta hiɗi firita.

¹⁹Kuɗ na'ta kayni, sa Yudiyana sa goy kawiyana, sa ka lakay hay hoyok-ziy ma gulmun talamɗina, buurta doogo yam fiɗita vi tilla vi Adar kayni mi buur ma nisi li firiya, li yuldeta kaw, mi buur ma gigekaw as vul va mi niramna.

²⁰Mardose ɗo slen kayni kaf hay ɗerwelda, nam joka' goy tam sa Yudiyana sa ka hay nagata vi mulla Asuwerus kafe, sa goboyo hiɗi sa gine'e kaw,

²¹kay nisi ma li yuldeta hay buurta doogo yam fiɗita vi tilla vi Adar, hay buurta doogo yam vaslta kaw, hay busata busata.

²²Hay buur namna kayni, sa Yudiyana vat sa gaw kisina goyo, hay til namna kayni, yorta visiya muɗi goy firita, do'olla visiya muɗi goy yuldeta, nisi muɗum goy mi buur ma yuldeta ma gigekaw as vul va mi niramna, vul va mi sa hawna kaw.

²³Dita vi Mardose na'ta sa Yudiyana muɗa' goy ki data vi sumaysi nala, nisi muɗ buur namna ki yuldeta visi ta tuni ɓa-ɓat nala.

²⁴Kay Haman goora vi Hammedata, ma Agagitna, sa ma gaw kay sa Yudiyan kafna, nam kot hagata kay vat sa Yudiyan kaf goyo, nam li pur, min di'e: Ŋaɓta kuɗ hayta, kay lassiya, kay vatsi goy kafe.

²⁵May hay li ma Ester co vok mulla, nam vul ɗota goy ala: Joota ta Haman kota' kay la' tam sa Yudiyana kayni ma hot kalam namu, a nisi ma ɓalam kulo kat guna, namu hiɗi gurona valam kaf.

²⁶Kuɗ kayni buur namna nisi yum ala purim, may goy hay dita ta ala pur, kay sle ma ɗoy hay ɗerwelda kayni kafe, kuɗ slen ma nisi wumna hiɗi slen ma co kisina.

²⁷Sa Yudiyana col gatta ta mu'ɗita kisiya, kay jafna visiya hiɗi sum sa min tap hiɗi nisiya, nisi ka li yuldeta hay buur namna ma ma'na lakŋi kuɗ va ma ɗoya hay buur ma colina, hay busata busata kaf;

²⁸Yuldeta ta hay buur namna lakŋi humsi ma gisi ka'a, tam jafsi voksiya voksiya, kuɗ ziyna ziyna, hay nagat kafe, hay hoyok-ziyn kafe. Buura vi Purim namna as ɦas goy jar jafna visiɗi, gi-humda kalamu tam gurona kaw as sahis goyɗi.

²⁹Ca-mulda Ester, goota vi Abigayil hiɗi sa ma Yudiyana Mardose ɗo kayni goy hiɗi dono'o sem kep lo kay nisi ma li yuldeta vi Purimna.

³⁰Tam sa Yudiyan kaf sa ka hay nagata ta kis kalam dok-ma' yam siɗiyata, ta kuɗ mulla Asuwerus nisi ɗo ɗerwelda, jok labara kay sle'ta hiɗi vida.

³¹Buura vi Purim namna hini dok-dok hay liyamna, hay liyn ma nisi li laata hiɗi ciriya kaw, ki sa ma Yudiyana Mardose hiɗi ca-mulda Ester tun yuldet na'ta kay sa Yudiyana hiɗi jafna visi kaf nala.

³²Labara vi Ester ka law kay tun cawta vi yuldeta vi Purimna. Kuɗ kayni labar namna ka ɗoy hay ɗerwelda tani.