Read Masana KAL-GOYTA 1 Bible Online

KAL-GOYTA 1 - Masana bible

KAL-GOYTA 1

¹Kayni mi sem gurona vi Israyel sa co hay Egipte hiɗi Yakub, gigekaw hiɗi jafna valamu valamu:

²Ruben, Simeyon, Levi, Yuda,

³Isakar, Zabulon, Benyamin,

⁴Dan, Neftali, Gad hiɗi Aser.

⁵Sum sa may goy hay Yakub pana nisi noŋ pet dok-siɗiya. Hay na'ta Yosef ka goy hay Egipte.

⁶Yosef mita, guro-biyomna mit kaw. Sum sa hay liyn namna kaf mit goyo.

⁷Gurona vi Israyel vuɗ ŋolo, nisi biya ŋolo, nisi muɗ ŋol suwa. Nagat hob hiɗi nisi cep-cep'.

⁸Bugol kayni mul ma wuliya musi kay Egipte, nam may wi Yosef noŋɗi.

⁹Nam di tam sumuna valamu: Humgiya, jafna vi Israyel muɗi ŋol suway naya, dono suway nay lay.

¹⁰Tuɗaygiya, laygi law ma yal tisiya; nay ma hinsi biya ŋol nalaɗi, kay hay li ma duur coowana, nisi ɗawn ma gi dirsi kuɗ sa gawta, nisi ɗawn ma duraya, bugolda nisi ma kal goy hay nagata vaya.

¹¹Nisi tun sum sara kisiya kay lisi lasi, sum nisin tosi sutaysiya hiɗi lop ma nekŋa. Ki kayn nala nisi in hoyok-ziyn Pitom hiɗi Ramses, ki feera ma ŋom slena vi Farawn nala.

¹²May hay li ma nisi ka ci lasta suwa, nisi ka biya voko, ka li ŋol suwa kaw, ta-ta sumun tuwsi cuk nar kisiya.

¹³Ki kayn nala sum sa Egipten muɗ gurona vi Israyel goy lum mi lop ma nekŋa.

¹⁴Nisi muɗsi ciwta visi yor ŋolo hiɗi lop ma nek ŋolla, hiɗi lopna vi naga dirginna, hiɗi direŋgella, hiɗi lop ma hay sinen kuɗ jafam kaf, lop ma sumun vulsit kay lumna kaf kayni, nisi ka lassi kuɗum ŋolo.

¹⁵Mul ma Egiptena di tam boyn sa puk boy sa Hebren kaw, kepta ya' ala Sifra, heta ya' ala Puwa.

¹⁶Nam disi ala: Hay li ma nigi ka puk boyna vi sum sa Hebrena, ɗuwgi gaa kuɗ guron ŋaa'a; la mi goor jufu, cigit goyo, la ti goot ta ca'a, hingit mus iriya may.

¹⁷May boy sa puksina li nar kuɗ Lawna, va ma mul ma Egipten disitna nisi min li kuɗumɗi; nisi min ci guro sa jufayn goyɗi.

¹⁸Mul ma Egiptena yi boy sa puk-boyna, nam disiya: Nigi li nala kay mige? Nigi min ci guro sa jufayn goyɗi kay mige?

¹⁹Boy sa puk-boyna hot dit tam Farawn: Boy sa Hebren kayni nisi may ki boy sa Egipten naɗi, nisi dono ŋolo, boy sa puksin co kayn fisi puki vatiya.

²⁰Lawn li ŋaat mi boy sa puksina, nala nisi biyay ŋolo, muɗi ŋol suwa.

²¹Lawn gi bol kay ziyna vi boy sa puk-boyna, kay nisi li nar kuɗum ŋolo.

²²Bugol kayni Farawn vul dit mi sumuna valam kaf ala: Guro-jufay sa vuɗawana nigi ma cuksi goloŋ hay niy-lumna kafe, may guro sa boyna nigi ma cisi goyɗi.