Read Masana KAL-GOYTA 13 Bible Online

KAL-GOYTA 13 - Masana bible

KAL-GOYTA 13

¹Ma-Vatɗina law tam Musus nam dumu:

²Gurona vaŋ sa vuɗi jewna naŋ ma vulsi goy man kafe. Kayn di ala guro sa vuɗi jewna jar sa Israyella, sumun lay farayn lay; kay nisi ir vanu.

³Musus di tam sa Israyella: Humgi ma gigi kay buur na'ta ta nigi kali goy hay Egipte pata, hay ziyn ma ligi gorvona; kay Ma-Vatɗin kalgiyay goy kayni hiɗi gaŋeraŋa valamu. Nigi ma ti fu ma hiɗi kufna loɗi.

⁴Vaydi nigi kal goyo hay tilla vi feɗna.

⁵Hay li ma Ma-Vatɗin kalgiyay hay nagata vi sum sa Kanaaniyana, vi sum sa Hetiyena, sa Amoriyana, sum sa Heviyena hiɗi sum sa Yebusiyena, nagat ta nam yi va kalam mi sumaygi ala nam min vulgita, nagata ta miira hiɗi yumda ka jaŋ goy haya, ɗawni nigi ma li girifta tam Ma-Vatɗina hay til namna zawni.

⁶Nigi ma ti fun-bay-kufna ir buurta siɗiya; hay buurta siɗiyat ɗawni, nigi ma li yuldeta kay subur sem Lawna.

⁷Hay buur ma siɗiyan lakŋi nigi ma ti fun-bay-kufna; fun ma hiɗi kufna sa as wum hay ziyna vigi noŋɗi, hay nagata vigi noŋ kaf, sa ma wi kufn noŋɗi.

⁸Nigi ma di tam gurona vigiya: Kay humma ma guma kay va ma Ma-Vatɗin lum tuma'na hay li ma numa kali goy hay nagat Egipte pa.

⁹Na' ma li ki ɗekka nala hay ɓigiya, ki gi-humda nala kaw hay vokgiya; kay vun-ma-gatna vi Ma-Vatɗina ma li dok-dok hay vungiya; kay Ma-Vatɗin kalgiyay goy hay nagat Egipte pa kayn hiɗi gaŋeraŋa valamu.

¹⁰Gatta na'ta ta kay yuldeta kayni hay busat kaf, liyn ma buura va' coowana, nigi ma la' dok-doko.

¹¹Nagata vi sum sa Kanaaniyana, ta Ma-Vatɗin yi va kalam vun sumaygi lay, vungi nigi lay ala nam min vulgita kayni, hay li ma nigi coowa haya'a, hay li ma nam vulgitawana,

¹²guro sa vuɗi jewn kaf nigi ma vulsi goy mi Ma-Vatɗina, la mi farayna ma vuɗi jewna kaw, ma jufayn kaf vi Ma-Vatɗina.

¹³Kurona ma vuɗi jewn kaf nigi ma muɗum hiɗi goor ɦu-dimiya. La nigi min muɗumɗi, nigi ma munum taɓaram goyo. Sumun kaw sa vuɗi hay ziyna vigi jewna nigi ma gussiya.

¹⁴Hay fattiɗeŋ ma gurona vigi jobgiyawa ala kayn min ɗek mige ni, nigi ma hot dit ala: Hay li ma numa ay ti gorvota hay nagata Egipte kayni, Ma-Vatɗina butma' ay goyo hiɗi gaŋeraŋa valamu;

¹⁵hay li ma Farawn so'ot dikamu kay hinma kal goyɗi, Ma-Vatɗina ci gurona vi Egipte sa vuɗi jewn goyo, tun caway tam guro sa vuɗi jewn pa ta-ta tam faray ma vuɗi jewna. Kuɗ na'ta kayni gurona vuma sa jufayna sa vuɗi jewna numa ka vulsi goy ɗifini tam Ma-Vatɗina. Guro nisina numa hot gussiya kaw.

¹⁶Kayni ma li ti ɗekka ta moki hay ɓigiya, ma liys gaɓi kulo hay vokgiya kaw, kay Ma-Vatɗina kalma'ay goy hay nagat Egipte pa kayn hiɗi gaŋeraŋa valamu.

¹⁷Hay li ma Farawn hin sum sa Israyel kal goy kayni, hagata ta jik hay nagata vi sum sa Filistin ti ta goboyta, may Lawn min tunsi irsi haya'ɗi, kay Lawn di'e: La nisi jikawa hay hagat na'ta, irsi wi duur ɗawni, nisi ma hora, hot bugolsi hay Egipte.

¹⁸May Lawn ŋuysi goy hay hagat ta fulda, gal niy-lum ma slawna. Gurona vi Israyel kal goy hay nagat Egipte kayn tuwsi kotay hiɗi sle ma duura.

¹⁹Musus yaw zok Yosef kalamu; kay Yosef halaf gurona vi Israyel, nam disi ala: Lawn humam ma gum kigiya, nigi ma yawan zokanis goy hay nagat tani.

²⁰Nisi fokays hay Sukkot pa, kali hay Etam, goy hay sin-fulda.

²¹Ma-Vatɗina ka tuni voksiya, falayta ɗugulla ka buri kulo kisiya kay ɗeksi hagata, henjeta kut ka hay ɗugulla kay fo liyn goy kisi haraŋi, kay nisi ma tuɗ falayta hiɗi henjeta kaw.

²²Dugul ma ka buri kulo kay gurona vi Israyel hay falayta hiɗi kuta ta ka moki kulo kisi hay hay ɗugulla hay henjeta kaw may vi tuwam goy noŋɗi.