Read Masana KAL-GOYTA 16 Bible Online

KAL-GOYTA 16 - Masana bible

KAL-GOYTA 16

¹Tokŋa vi gurona vi Israyel fokays hay Elim pa, nisi co hay fulda vi Sin, ta ka jar Elim hiɗi Sinay. Kayni hay buurta doogo yam vaslta vi til ma ma'na vi kalta-goyta visi hay nagat Egipte pa.

²Tokŋa vi gurona vi Israyel kaf tun caw ŋurnay kat Musus hiɗi Aaron hay fulda.

³Gurona vi Israyel di tisiya: Hay li ma numa ay hay nagat Egipten kayn sliwn ka dak-dak, fun kaw suwma suwi goyo. Lali numa mit miti ɗawni kayn ŋaa'a suwa; may wulini sum sa ŋol ki kayn nala, nigi marsi goy mit hay fulda kay mayta kayn kay mige?

⁴Ma-Vatɗina di tam Musus: Nan min hin fun si gaa kisiya, nam ma yakay kulo dukalawn pa nisi ma cuk goyo kay yawam hay buurta buurta a as tina visiya, kay nan min waksiya, kay nan min ɗuwa la nisi tuɗ kuɗ gatta vanu lebo tuɗi su?

⁵Tin ma nisi yawamay hay buurta karkiyat ɗawni, hay li ma nisi kotomawa, nam ma muɗ ŋol sem ma' suw ma nisi ka yawam hay buurta kafna.

⁶Musus hiɗi Aaron di tam gurona vi Israyel kaf ala: Vulatin ɗawni nigi ma wi ala kalgiyay goy hay nagat Egipte kayn mi Ma-Vatɗina.

⁷Hay grawt ɗawni, nigi ma wi gajijita vi Ma-Vatɗina, kay nam hum ŋurnayta vigiya ta talamtawa. Kay numa lakŋi si sarige a nigi ŋurnay katma'a?

⁸Musus di'e: Vulatini Ma-Vatɗin min vulgi sliw ma tina, grawt ɗawni nam min vulgi fun ŋol suw asa, kay nam hum ŋurnay ma nigi ka ŋurnay talamnawa; kay numa lakŋi si sarige a nigi ŋurnay katma'a? Ŋurnayta vigi kayn kat Ma-Vatɗina!

⁹Musus di tam Aaron: Daŋ tam tokŋa vi gurona vi Israyel kaf ala: Nisi ma lak vok Ma-Vatɗina, kay nam hum ŋurnayta visiyawa.

¹⁰Hay li ma Aaron ka law tam vokŋa vi sa Israyel kayni, nisi muɗ irsi hay gal ma fulla. Duw na kayni, gajijita vi Ma-Vatɗina ɗek tuwa' goy hay ɗugulla.

¹¹Ma-Vatɗina di tam Musus ala:

¹²Nan hum yor-tuwta vi gurona vi Israyellawa. Naŋ ma disi ala, hay vulatita nisi ma ti sliwna, hay graw culumta nisi ma ti funa may, nala nisi ma wi ala nanu mi Ma-Vatɗina Lawna visiya.

¹³Hay vulatita, gaɓurumna co ŋolo nam hob guɗukŋa visi noŋ kafe; co graw culumta kayni, maɗayn ka giy ŋolo goy gal guɗukŋa visiya.

¹⁴Hay li ma maɗayn vatawa, slen ma guray vertetet' ma ki mokoy ma haɓna nala kaw ka kay yam nagata.

¹⁵Gurona vi Israyel ɗuw na kayni, nisi ka di tuwsi jar-tuwsi ala: Nam kayni mi meloge? Kay nisi may wi va namnaɗi. Musus disiya: Nam kayni mi funa ma Ma-Vatɗina vulgiya kay ti'e:

¹⁶Humgiya, Ma-Vatɗina vulgi hagat ala, gigekaw ma yaw kayni ŋray gaf tina valamu valamu. Kay sa ma kepna nigi as yaw ir goto kep kep, ŋram kay sum sa vo hay ziyna vigina; gigekaw as yaw kay sum sa ka vo hay ziyna valamu valamu.

¹⁷Sum sa Israyella li ki kayn nala, nisi yaw kayni, segen yaw ŋolo, segen yaw kiɗaya may.

¹⁸Bugol kayni nisi ŋaɓam goyo hiɗi gotona, nisi sa yaw ŋolla nam may kisi ŋolɗi, nisi sa yaw ir kiɗayna, nam may kiɗa goy kisiɗi. Gigekaw yaw kayni gaf tina valamu valamu.

¹⁹Musus disiya: nigi ma hin mara bur kulo'o kay cub grawtɗi.

²⁰Nisi min hum vun Mususɗi, sum segen hinim bura kay cub grawta; nala juful cukumu, nam muɗ hisa. Musus dikam muɗ ɦiy kat sum nisina.

²¹Hay graw culumta kaf, gigekaw yaw kayn kay as tina valamu valamu; hay li ma fatta tun caw ti'e, nam ɦuwal goyo may.

²²Hay buurta karkiyata, nisi yaw sem ma' ma' kay sa ma kepna, kayn di ala goto ma' kay sa kep. Sa ŋulona vi farana mar labar namna tam Musus.

²³Musus disiya, Ma-Vatɗin vul hagatiya, jifin ɗawni mi buur ma tun sukŋa, buur ma sabatna ma vuli goy mi Ma-Vatɗina; nigi ma kot slena vigiya ma nigi min tumna, diram ma hin goyna nigi ma ŋayam kulo'o ta-ta grawta.

²⁴Nisi hinim kulo'o ta-ta grawta ki Musus vulsi hagat nala, nala nam may buw goy loɗi, juful may cuk jaramɗi kaw.

²⁵Musus disiya: Vaydi nigi ma tumu, kay kayni mi buur ma sabatna, kay vaydi nigi as fi mara goy vor loɗi.

²⁶Nigi ma yawamu ir buur karkiya, may hay buurta siɗiyata, buurta ta sabatna, nigi as fumɗi.

²⁷Hay buurta siɗiyata, segen cuk goyo kay yawamu, may nisi fum noŋɗi.

²⁸Ki kayn nala Ma-Vatɗina di tam Musus: Vun-ma-gatna vanu hiɗi slen ma nan dum dina, nigi ma rawam goyo ki kayn nala dok-doko ta-ta lancitige?

²⁹Nigi ma vi goy kigi ala nan vulgit hay buurta karkiyata, nam ir buur ma'. Nan min kayn ala gigekaw ma mus hay liyna valamu valamu hay buurta siɗiyata tun selem goy hay liy maraɗi.

³⁰Ki kayn nala nisi tun suksiya hay buurta siɗiyata.

³¹Tin namna gurona vi Israyel tunum selem ala «manna»[4] Nam sli wal degen nala; nam haɓaya, nam ti ŋray ca ki hambul ma kotay hiɗi yumda nala.

³²Musus di'e: Humgi va ma Lawn di'e: Nigi ma hob goto kep hiɗi manna, ŋomom kulo'o kay jafna vigi ma bugolgina, kay nisi kaw ma wi funa ma nan vulgita ti'e hay fulda, hay li ma nan yawgiyay goy hay Egipte pana.

³³Bugol kayni Musus di tam Aaron, naŋ ma sli dowayta kepe, naŋ ma sel manna haya'a ir goto kepe, naŋ ma tunum vok ir Ma-Vatɗina. Kay nam ma li ŋomiya kay jafna vigi ma bugolgina.

³⁴Ki Ma-Vatɗina vul hagata tam Musus nala, Aaron tunum vok liyn ma di-goyna, kay nam ma li ŋomiya.

³⁵Gurona vi Israyel ti manna ir busat dok-fiɗi, ta-ta hay li ma nisi co hay liy ma ziyna, nisi ti manna ta-ta hay cota visi kulo vun Kanaan dab'.

³⁶Gotota ta nisi ya' omer kayni mi gal-ma-doogona vi dutta ta kusta.