Read Masana KAL-GOYTA 17 Bible Online

KAL-GOYTA 17 - Masana bible

KAL-GOYTA 17

¹Tokŋa vi gurona vi Israyel kaf fokays hay fulda vi Sin pa, nisi kaliya ki Lawn ɗeksi hagat nala; nisi vi guɗukŋa visi ɗawni hay Refidim; ɗawni nisi may fi niy ma cin noŋɗi.

²Ki kayn nala nisi ci wayta hiɗi Musus, nisi dumu: Naŋ vulma niy ma cin aya. Musus hot disiya: Nigi muɗ hiy katanu kay mige? Nigi nem Ma-Vatɗina kay mige?

³Laat tun caw li sumun ŋolo ɗawni, nisi tun caw ŋurnay kat Musus. Nisi di'e: Wulin kayni naŋ kalma'ay goy hay Egipte pa, kay hinma mit goy kay laata hiɗi gurona vuma'a hiɗi farayna vuma kaw kayn kay mige?

⁴Musus siwel tam Ma-Vatɗina nam di'e: Wulin kayn sumun tani nan lisi ɗawn linige? Kay hini neeɗa ɦawa a nisi can goyo hiɗi goorhoyona!

⁵Ma-Vatɗin dumu: Kalaŋ goy voksiya, yawaŋ sum sa maariyana vi Israyel kuɗaŋu; zugulda vaŋu ta naŋ ci niy-lumna hiɗi na'ta naŋ ma sla' hay ɓaŋu, naŋ ma tuɗa may.

⁶Ɗuwaŋu nan min col goy vokaŋu kay hiɗiyta Horeb, naŋ ma to hiɗiyna, niyn ma kali goy hayam pa, sumun ma cumu. Musus li van kayni kir sa maariyana vi Israyel kafe.

⁷Liyn namna nam tunum selem ala Masa hiɗi Meriba, kay gurona vi Israyel ci wayta, nisi nem Ma-Vatɗina, kay nisi di'e: Ma-Vatɗina ka jaray dam' lebo mayɗi su?

⁸Amalek co'o kay dur hiɗi sa Israyella hay Refidim.

⁹Nala Musus di tam Yosuwa: Naŋ ma vilekay sum jufayna, kalaŋ goyo kay tuɗ dur Amalek; jifini nan min col kulo'o kay yam-hiɗiyta, hiɗi zugulda vi Ma-Vatɗina hay ɓanu may.

¹⁰Yosuwa li kuɗ va ma Musus dumta kay dur Amalekŋa. Ki kayn nala Musus hiɗi Aaron hiɗi Hur jik kulo'o kay sin-hiɗiyta.

¹¹Hay li ma Musus poŋ balam kulo'o, sum sa Israyella muɗ dono suwa; hay li ma nam hot ɓalam gaa'a, Amalek muɗ dono suwa may.

¹²Hay li ma ɓam Musus makawa, nisi sli hiɗiyna, burum gaa kuɗumu, nam mus kulo kalamu may. Aaron hiɗi Hur ka vum ɓalam kulo'o, hena hay ɓalam heta, hena hay ɓalam heta may; ɓam Musus viy kulo nala ta-ta fatta ɗika.

¹³Yosuwa kol kay Amalek hiɗi sumuna valamu, nam calsi hiɗi kew-gaferaŋa.

¹⁴Ma-Vatɗina di tam Musus: Naŋ ma ɗo kayni hay ɗerwelda, kay lawta kayni ma li ŋomiya, naŋ ma di tam Yosuwa ala nan min ɦas sem Amalek goy kay nagata.

¹⁵Musus in giwin-ma-ɗifinna, nam tunum selem ala: Ma-Vatɗina mi bogoray ma kanna.

¹⁶Nam di'e: Kay Amalek poŋ ɓalam kulo'o kat zlamda-mulda vi Lawna, duura ma jaram hiɗi Lawna as vatɗi ta-ta tam jafam vokomu vokomu.