Read Masana KAL-GOYTA 2 Bible Online

KAL-GOYTA 2 - Masana bible

KAL-GOYTA 2

¹San kep hay jafna vi Levi, nam sli cata hay jafna vi Levi kaw.

²Cat na'ta sli haya, na' vuɗ gooro. Na' wi kayni nam jifiy ŋolo, na' ŋayam goyo ir til ɦidi.

³Hay li ma na' wi ala yal ma ŋayam may loɗi, na' sli lumda ta goota, ta ciliy hiɗi cerewna, na' kora' tuwa' hiɗi naga-dirginna hiɗi dubaŋŋa, na' bur goor hayamu, kalam goy kel niy-lumna, ŋayam goloŋ jar cerewna.

⁴Basulumta col goy talam ir gine neeɗa, kay ɗuw va ma min co talamu.

⁵Goota vi Farawn co kele'e kay muz tuwa'a, nuriyo' sa kuɗa'na ka poy kel niy-lumna. Na' wi lumda goota goy goloŋ jar cerewna, na' gi ta sunda va'a kay sla'tiya.

⁶Na' malam vunam goy na kayni na' wi goor tiy waŋ', nam mi goor ma jufu. Nam muɗ kira' hawi, na' di'e: Nam kayni mi goora vi sum sa Hebrena.

⁷Nala ɓasulumta di tam goota vi Farawn: Nak min ala nan tuɗ garag cat ta wulumta jar boyna vi sa Hebrena su?

⁸Goota vi Farawn di ta'a: Awa, tuɗagu. Goot-cat kayni kaliya, na' gar sum goor aya.

⁹Goota vi Farawn da'a: tuɗag hiɗi goor kayni, nak wulanta, nan ma wurakagu. Sulum slumu, na' wulumu may.

¹⁰Hay li ma nam wulawa, na' tuɗum mi goota vi Farawn, na' muɗum ki goora va' nala. Na' tunum selem ala Musus, kay na' di ala, nan slumi goy goloŋ hay niyn pa.

¹¹Hay liyn ma Musus muɗawa goy ŋolo, nam kali ɗuw guro-biyomna, nam wi lop ma nekŋa ma nisi lumna hiɗi iramu. Nam wi sa ma Egiptena ka to goor-bulum ma Hebren mara kep.

¹²Nam ɗuw goy galam gulu, jufu; hay li ma nam wi ala sa mayɗi kayni, nam ci sa ma Egipten goy mati, nam pum gaa kuɗ ŋeslna.

¹³Hay buurta ka'ta, nam kali goyo lo. Nam ɗuw na kayni sum sa Hebren ma' ka nef tuwsi lak'. Ma nefna nam ka dum ala: Naŋ to goor-buŋŋa kay mige?

¹⁴San kayni hot dum ala: Tunaŋ mul kuma'a kay ka kitat kuma'a mi gige? Naŋ min can goyo ki naŋ ci sa ma Egipten goy nala kaw su? Nala Musus tuwam li nari, nam di'e: Wulin kayn diran patawa goy gasiya.

¹⁵Farawn hum labara kay va ma lina, nala nam gar kay ci Musus goyo. May Musus pir goy vok ir Farawn, nam kal ŋay goy hay nagata vi Madiyan, nam kaliya coli del kaata.

¹⁶Mul-ma-ɗifinna ma hay Madiyanna guro-boyna valam ka siɗiya. Nisi co'o kay go niyna. Nisi hob palkatamna kay vul niyn mi farayna vi busiya.

¹⁷Sum sa ŋom farayn co'o, digiɗsiya. Nala Musus fokay kulo'o, nam gut kuɗsiya, nam vul niy mi farayna visiya.

¹⁸Hay li ma nisi hot tam busi Rewel, nam disiya: Nigi vaydi hotay gosoy nala kayn litige?

¹⁹Nisi dumu: Sa ma Egipten kep butma goy hay ɓam sum sa ŋom farayna, nam goma' niyo kaw, nam vul niyn mi farayna vuma'a.

²⁰Nam di tam guro-boyna valamu: Nam ka arige? Nigi hinim ay bugolgiya kay mige? Tuɗgi yumiya, kay nam ti fu neɗe.

²¹Musus miniya kay kay mus kat san kayni. San kayni goota valam Sefora, nam vula' ca mi Musus.

²²Na' vuɗ goor kepe, nam tunum selem ala Gersom, kay nam di'e: Nan li ziy damni hay nagat ta pulu.

²³Mus bugolda ŋol neeɗa kayni, mul ma Egipten mitawa, gurona vi Israyel ka yor tuwsi kay gorvo ta nisi ka ta'ta dok-doko. Nisi ka tiy, tuwsi ŋolo; tiyta visi ta vun gorvota co ta-ta kulo tam Lawna.

²⁴Lawn hum yorta visiya, nala humam gum kay bonota valam ta nam juna' jaram hiɗi Abraham, hiɗi Isaak, hiɗi Yakub kaw.

²⁵Lawn ɗuw gurona vi Israyella, nam wi hawta visiya.