Read Masana KAL-GOYTA 25 Bible Online

KAL-GOYTA 25 - Masana bible

KAL-GOYTA 25

¹Lawna di tam Musus ala:

²Naŋ ma di tam gurona vi Israyel ala, nisi ma mar vulda tanu, sum sa li vulda tanu hiɗi diksi kafna nigi ma vi vulda na'ta hay ɓisiya.

³Kayni mi slen ma nigi ma vum hay ɓisiya: Ora, doorota hiɗi wayna.

⁴Sligar ma tuwam zim-zimna, sligar ma tuwam cih-cihna, sligar ma tuwam slawna, hiɗi baraw ma haɓna hiɗi ɗuŋus fok-meena kaw;

⁵hiɗi bakŋa vi fok-dimina ma tuwam ɗoy slawi, hiɗi ɗigiy dofeŋŋa* hiɗi gu-kasiyana.

⁶Mula kay fitilla, aromatna kay mul ma set tuwna, hiɗi urdi ma hisna.

⁷Hiɗi hiɗiyn oniks*, hiɗiyn mara'a mara'a kay kot tuw birim ma ɗigiyna hiɗi noŋ ma giɗeŋŋa.

⁸Nisi ma kotan guɗuk ma peldetna, nala nan ma mus jarsiya,

⁹nigi ma kot tabernaklena hiɗi jakŋ ma hayamna pet ki nan min ɗekgi kotta valam ɗawn nala.

¹⁰Nigi ma kot timgilla hiɗi gu-kasiyana, fiyokom ma li goldoŋ ma' hiɗi gali, buɗugam ma li goldoŋ kep hiɗi gali, fiyokom ma kulon ma li goldoŋ kep hiɗi gali.

¹¹Naŋ ma korom tuwam hiɗi or ma may rigasayɗina, naŋ ma korom hayam ma kalafna hiɗi ŋorom ma goy jiyna kaw, gaŋam ma goyna naŋ ma kotom hiɗi or kafe.

¹²Naŋ ma yor ora mara fiɗi lo, naŋ ma ɓal girliŋ-ora goy gefemu, ma ma'na naŋ ɓalam hay galam hena, ma ma'na hay galam hena kaw.

¹³Naŋ ma kot malla hiɗi gu-kasiyana, naŋ ma korom tuwam hiɗi ora kaw.

¹⁴Naŋ ma kal malla hay girliŋ-ora ma ka ɓalay goy gef timgilla, kay nigi as ziy timgilla hiɗi namu.

¹⁵Gu-malla namna ma hin lakay kalam hay gef timgilla na lak dok-doko, sa as patam goy noŋ loɗi.

¹⁶Di-goyta[7] ta nan min vulaŋga ɗawni naŋ ma bura' gaa hay timgilla.

¹⁷Naŋ ma li goɓoloko ma kuluɓum kalamna kotay hiɗi or ma may rigasayɗina, fiyokka valam ma li goldoŋ ma' hiɗi gali, buɗukka valamu ir goldoŋ kep hiɗi gali.

¹⁸Naŋ ma kot kerubena* ma ora ma' hiɗi ora ma rigasayna, naŋ ma lakam kulo vun tuwam ma' kay goɓoloko ma kuluɓum vun timgilla.

¹⁹Naŋ ma kot kerubena kep goy hay vunam hena, kep goy hay vunam hena may, nigi ma kot keruben ɗawni, nam ma suw goy kay goɓoloko ma kuluɓum vun timgilla, hay gaŋam ma' pete.

²⁰Kerubena ma meɗ gilaŋatsi goy kalamu, nisi ma bar yam goɓolokona hiɗi gilaŋatsiya irsi ma li muɗi kir tuwamu, irsi ma li muɗi kir goɓoloko.

²¹Goɓolokona naŋ ma kuluɓum kay timgilla, di-goyta ta nan min vulaŋgi ɗawni naŋ ma bura' gaa hay timgilla.

²²Kayni mi liyn ma nan ma ŋaf hiɗi naŋ hayamna: Kulo'o kay goɓolokona jar kerubena sa ma'na sa ka lakay kulo kay timgilla vi di-goyta, slen ma naŋ ma ɗekem mi gurona vi Israyella nan min vulaŋga kafe.

²³Naŋ ma kot tablena ma ceɗi hiɗi gu-kasiyana; fiyokka valamu ma li ir goldoŋ ma', be'da valamu ma li ir goldoŋ kep, fiyokka valam ta kulota ma li ir goldoŋ kep hiɗi gali.

²⁴Naŋ ma korom tuwam hiɗi ora ma bay-rigasna, naŋ ma kotom gaŋam kaf hiɗi ora.

²⁵Naŋ ma kot gu mara lo, ŋuyum goy gaŋam cusl', be'da valam ma ŋaɓ cita-ɓamta fiɗi, naŋ ma korom tuwam hiɗi or kaf kaw.

²⁶Naŋ ma kot girliŋ-ora fiɗi kay table namna, naŋ ma cum goy hay gaŋam ma fiɗina, ma ka tam selem ma fiɗina kaw.

²⁷Girliŋ-ora naŋ ma gaɓam goboy hiɗi gu ma goy gaŋamna, ma kal malla haya kay ziy tablena.

²⁸Naŋ ma kot malla ma ziyimna hiɗi gu-kasiyana, naŋ ma korom tuwam hiɗi ora; lopna valam kayni kay ziy tablena.

²⁹Naŋ ma kot slen ma lakam kalamna: Zlarakŋa, kaway ma niyna, ŋalayna hiɗi tasana, kay li vulda ta yama' goyta hiɗi namu, naŋ ma kotom hiɗi or ma may rigasayɗina.

³⁰Tin ma vuli goyna naŋ ma lakam kay tablena, dok-dok naŋ ma hinim lakay vok iranu.

³¹Naŋ ma kot va ma tun fitilla hiɗi or ma bay-rigasna, va ma tun fitilla namna naŋ ma kotom hiɗi or ma rigasayna; selem ma gaana, zokomu, yalamu, gaslamu hiɗi ɓalamu ma li tapay kulo talamu.

³²Ɓalam karkiya ma kali goy talam pa, balam ma ɦidina ma kali goy hay galam hena, ɓalam hen ma ɦidina ma kali goy hay galam hena pa kaw.

³³Hay ɓalam ma kepna yalam ma kulona moki ki vuɗna vi moŋgon nala, gaslam hiɗi ɓalam ka'a, hay ɓalam ma hen lo yalam ma kulona moki ki vuɗna vi moŋgon nala lo, gaslna valam ka'a ɓalam ka'a kaw. Ɓalam ma karkiya ma kali goy hayam pana ma li nala kaw.

³⁴Hay zokŋa vi va ma tun fitilla yalam ma mokayn ma li fiɗi, sli vuɗna vi moŋgon nala, gaslam ka'a, ɓalam ka'a kaw;

³⁵Ɓalam ma' ma ɓet goy hay zokom ma ŋol pana ma li hiɗi gaslna moki gaa jaramu ma ma' hena kaw ma li nala, ma ma' hena kaw ma li nala; kayn di ala nam karkiya kaf, ma kali goy hay zok va ma tun fitil pan kayn ma li nala.

³⁶Gaslna hiɗi bamta vi va ma tun fitilla ma li tapay kulo tam tuwamu; nam kaf ma liys hiɗi or ma tayayna ma bay rigasna.

³⁷Naŋ ma kot fitilla ma siɗiyan kalamu, ma lakam kulo kalamu, kay a nam ma fo liyn goy vokom haraŋi.

³⁸Va ma do kuna hiɗi ŋarak ma butuw-kun ko hayna ma li kotay hiɗi or ma bay rigasna

³⁹kay kot va ma tun fitilla hiɗi sle ma talam kafna, naŋ ma gar ora ir talente kepe.

⁴⁰Naŋ ma ɗuwa, naŋ ma lum ɗawn ŋray ca ki ma nan ɗekem kiraŋ kulo kay hiɗiyta nala.