Read Masana KAL-GOYTA 27 Bible Online

KAL-GOYTA 27 - Masana bible

KAL-GOYTA 27

¹Naŋ ma kot giwin-ma-ɗifinna hiɗi gu-kasiyana, fiyokka valam ma li ir goldoŋ vasl, buɗukka valam ma li ir goldoŋ vasl lay, galam fiɗi pet ma li ŋray ca, fiyokka valam ta kulota ma li ir goldoŋ ɦidi.

²Gefem ma fiɗin pet naŋ ma in miyok kalamu, naŋ ma korom tuwam hiɗi wayna.

³Kay giwin-ma ɗifinna naŋ ma kot ŋarak ma ko butuwna, kot pella, kot tasa ma ŋulona, kot va ma yaw sliwna, kot ganuna kaw. Nam kaf naŋ ma kotom hiɗi wayna.

⁴Naŋ ma kal kaway-ciliyn hayamu, kotom ki dena nala, yorom mi wayna. Naŋ ma hormos wayna fiɗi goy gaaŋ den namna.

⁵Naŋ ma vum gaa kuɗ vun giwin-ma-ɗifinna, hay gal ma gaan pa, nam ma co kulo hoyok giwin-ma-ɗifinna.

⁶Naŋ ma kot malla ma fiyokŋa kay giwin-ma-ɗifinna, malla namna mi gu-kasiyana, naŋ ma korom tuwam hiɗi wayna.

⁷Gu-malla namna ma kalam hay girliŋ-kawayna, malla namna ma lak hay gef giwin-ma-ɗifinna ma ma'na kay ziyim hiɗi namu.

⁸Naŋ ma kotom hiɗi hayam gaa zulu, hiɗi biremna, naŋ ma kotomu ki nan ɗekem kiraŋu kulo kay hiɗiyt nala.

⁹Naŋ ma kot wur-daŋŋa vi tabernaklena hay gal ma kayamna, kay kot daŋ namna kayni, naŋ ma cil sligara hiɗi baraw ma haɓna, kay gal ma jewn kayni, fiyokka valam ma li ir goldoŋ kis,

¹⁰hiɗi dolla dok-ma', hiɗi wayn yori gaa kuɗum dok-ma' kaw; sle ma gaɓna ma tam dolla hiɗi silik ma sligar gaɓay talamna ma li yori hiɗi doorota.

¹¹Hay gal ma gaan kaw, naŋ ma cil sligara ma fiyokka valam goldoŋ kis, hiɗi dolla dok-ma', hiɗi wayna yori gaa kuɗum dok-ma' kaw, sle ma gaɓna ma tam dolla hiɗi silik ma gaɓ sligar talamna ma li yori hiɗi doorota.

¹²Hay gal ma vulatina, naŋ ma cil sligara ir goldoŋ dok-vasl kay be'da vi wur-daŋŋa, dolla doogo hiɗi wayn yori gaa kuɗum doogo lay.

¹³Hay gal ma kuɗuwna, kuɗ goldoŋ ma dok-vaslna vi sligar ma kay wur-daŋŋa kayni,

¹⁴naŋ ma hin goldoŋ goy doogo yam vasl kay gefem ma kepna, hiɗi dol ma ɦidina hiɗi kaway ma yori gaa kuɗum ɦidin kaw.

¹⁵Sligara goldoŋ doogo yam vasl lo kay gefem ma gal ma'na, hiɗi dolla hiɗi kaway ma yori gaa kuɗumna ɦidi kaw.

¹⁶Kay vun wur-daŋŋa, naŋ ma kot sligar-gaɓayna ma goldoŋ dok-ma', tuwam zim-zim, cih-cih, hiɗi slawi hiɗi baraw haɓna ma duɓarayna kaf ciliy hiɗi bamta, hiɗi dolla fiɗi, kaway yori gaa kuɗum fiɗi kaw.

¹⁷Dolla ma ŋuy wur-daŋŋa kaf, silik ma kal sligar hayamna ma li kotay hiɗi doorota, sle ma gaɓna kotay hiɗi doorota diram ma gaan ma li yori hiɗi wayna.

¹⁸Fiyokka vi wur-daŋŋa namna ma li ir goldoŋ kis, buɗukka valamu ma li ir goldoŋ dok-vasl hay galam kafe, fiyokka valam ta kulota ma li ir goldoŋ vasl, sligar-gaɓay ma talamna ma li mi baraw haɓna ma duɓarayna, diram ma gaan ma li mi wayna may.

¹⁹Jakŋa kaf ma kotom kay li lop hiɗi namu hay tabernaklena, gu ma piy gaana valam kaf, hiɗi gu ma piy gaana ma tam wur-daŋŋa kaf ma liys mi wayna.

²⁰Naŋ ma vul hagata tam gurona vi Israyel kay nisi maraŋ mul olive ma kilira kay ɦokom hay fitilla ma ka lakay kay va ma tun fitilla, kay fitilla ma li dok-dok ŋaliya.

²¹Aaron hiɗi gurona valamu ma kotom ɗawni, hay guɗuk ma fi-tuwna, goy bugol sligar-gaɓayna ma ka vok va ma di-goyna. Nisi ma kotomu kay fitilla ma ŋal hay vok ir Ma-Vatɗina tun cawis hay vulatit pa ta-ta liyn fo goyo. Gatta kayni hini kay jafna vigiya kay dok-doko, gurona vi Israyel ma li kuɗa'a.