Read Masana KAL-GOYTA 29 Bible Online

KAL-GOYTA 29 - Masana bible

KAL-GOYTA 29

¹Kayni mi va ma naŋ ma lumu kay lisi goy peldete, kay nisi ma lak goy vun lopna van ma ɗifinna. Naŋ ma vi put ma joriyo kep hiɗi fok-gamalan ma' ma moy may talamɗina.

²Naŋ ma kot fun-bay-kufna hiɗi futuw ma digeɗna vi alkamarena, naŋ ma kot hambulla ma bay-kufna ma hiliɓiy hiɗi mula yamay mula, li hambulla ma bay-kufna ma mula yamay kalamna.

³Naŋ ma lakam hay tikisina, tapam hiɗi put joriyona hiɗi fok-gamalan ma ma'na, ma naŋ min lum ɗifinna.

⁴Aaron hiɗi gurona valamu naŋ ma narsi kulo goboy tam guɗuk ma fi-tuwna, naŋ ma muzsi goy hiɗi niyna.

⁵Naŋ ma yaw sligara; naŋ ma gan tuw Aaron hiɗi sligar-tuwna ma fiyokŋa, hiɗi ŋoŋ-ma-fiyokŋa, hiɗi sligar-ŋoŋŋa, hiɗi birim-ŋoŋŋa. Naŋ ma junum kantin talamu goy bugol ŋoŋ ma giɗeŋŋa.

⁶Naŋ ma tun jakawat kulo kalamu, naŋ ma pi velevella vi peldetta kulo kay jakawata.

⁷Naŋ ma sli mula, naŋ ma hokom kalamu, kay gum ɗifini.

⁸Naŋ ma mar gurona valam taŋu, naŋ ma cuksi sligar-tuwn tisiya.

⁹Naŋ ma jun kantin tam Aaron hiɗi gurona valamu, naŋ ma tun pokina kay gurona vi Aaron. Gatta vuliya ala lop ɗifinna hini kisi dok-doko. Aaron hiɗi gurona valamu naŋ ma gisi ɗifin hay lopna.

¹⁰Put-gujuna naŋ ma naram goy vun guɗuk ma fi-tuwna, Aaron hiɗi gurona valamu ma tun ɓisi kay putna.

¹¹Bugol kayni naŋ ma ŋat putna hay vok iran nan Ma-Vatɗina, ŋatam vun liyn ma kal kalaf hay guɗuk ma fi-tuwna.

¹²Naŋ ma yaw kuɗ busuw put-gujuna, hiɗi cita-ɓaŋu, naŋ jo busuw namna kulo tam miyok giwin-ma-ɗifinna. Busuw hen kaf naŋ yamam gaa sem giwin-ma-ɗifinna.

¹³Naŋ ma yaw mul ma tam ruwatna kafe, hiɗi mul ma tam dukka, glesna ma ma'na hiɗi mul ma talamna. Nam cani naŋ ma ŋalam kulo kay giwin-ma-ɗifinna.

¹⁴May put-gujuna naŋ ma tuɗ ŋalam sliwam goy bugol guɗukŋa. Naŋ ma ŋalam bakam goy lay, ŋalam suɗoyom goy lay. Kayni mi ɗifin ma kay sulukŋa.

¹⁵Naŋ ma vi ɦu-gamala ma kepna, Aaron hiɗi gurona valam ma tun ɓisi kalamu.

¹⁶Naŋ ma ŋat ɦu namna; naŋ ma vum busuwamu, yamam goy tam giwin-ma-ɗifinna, goy hay galam kafe.

¹⁷Naŋ ma pow sliw ɦun goyo, muzaŋ sle ma hayna hiɗi gayn goy kafe, bugolda naŋ ma lakam kulo kay sliw ma naŋ powom goyna hiɗi yamda.

¹⁸Naŋ ma lakam kulo kay giwin-ma-ɗifinna, ŋalam goy noŋ kaf. Kayni mi ɗifinna ma ŋalay hay kuta, hista valamu ŋaa'a ŋolo kir Ma-Vatɗina.

¹⁹Naŋ ma hot vi ɦu-gamala hena lo, Aaron hiɗi gurona valamu ma tun ɓisi kalamu.

²⁰Naŋ ma ŋat ɦu namna, naŋ ma vum busuwamu. Naŋ ma jo busuw namna hay zeŋ-hum Aaron ta jufta, hay zeŋ-hum gurona valam ta jufta kaf lay. Naŋ ma jom hay cita-ɓisi ta ŋolda ta jufta, jom kay cita-sesi ta ŋolda ta jufta kaf kaw. Bugol kayni naŋ ma yam busuw namna goy tam giwin-ma-ɗifinna, ŋuyum talam kaf.

²¹Bugolda naŋ ma sli busuw ma ka kulo kay giwin-ma-ɗifinna, hiɗi mul ma setna, naŋ ma yamam tam Aaron hiɗi gurona valamu, yamam tam sligara visi lay. Ki kayn nala Aaron hiɗi gurona valamu hiɗi sligar ma tisin kaf ma vulis goy ɗifini.

²²Naŋ ma yaw mul ɦu-gamalana, giɗeremu, mul ma kay ruwatna, mul ma kay dukka, gles ma ma'na hiɗi mul ma talamna, bigiy-hun ma gal jufna. Kay namu mi ɦuna ma giy goy ɗifini.

²³Naŋ ma sli tikisita ta fun-bay-kufna ka haya'ta, ta ka tuni vok ir Ma-Vatɗina, sli hambul ma beɗayna, hambul ma hiliɓi hiɗi mula hiɗi hambul ma ɦawana.

²⁴Sle namna kaf naŋ ma vulum hay ɓam Aaron hiɗi gurona valamu, nisi ma muɗum galam kaf vok ir Ma-Vatɗina.

²⁵Bugolda naŋ ma hot yawam goy hay ɓisiya, naŋ ma lakam kulo kay giwin-ma-ɗifinna, naŋ ma ŋalam goy kafe. Kayni mi ɗifinna ma ŋalay hay kuta vok ir Ma-Vatɗina, nam his fay ŋolo vok ir Ma-Vatɗina.

²⁶War-dig ɦu-gamala ma gi Aaron ɗifin hiɗi namna naŋ ma hot slumu, naŋ ma muɗum galam kaf kulo vok Ma-Vatɗina: Nam kayni mi galla vaŋu.

²⁷War-dig ɦuna hiɗi bigiy-ɦuna, ma gi Aaron hiɗi gurona valam goy ɗifin hiɗi namna, naŋ ma lum goy peldete. War-dig ɦuna naŋ ma muɗum galam kafe. May bigiyamu naŋ ma meɗ ɓaŋ kulo vok Ma-Vatɗin hiɗi namu.

²⁸Namu ma li ir vi Aaron hiɗi gurona valamu. Kayni ti gatta ta hini dok-dok mi gurona vi Israyel kay nisi ma li kuɗa'a, kayni ti vulda ta meɗ ɓam kulo'o hiɗi na'ata, hay li ma gurona vi Israyel ka li ɗifinna vi lop ma slugona, vulda ta meɗ ɓam kulo hiɗi na'ta ma li vi Ma-Vatɗina.

²⁹Sligar ma peldetna vi Aaron ma hin bugolom ɗawn vi gurona valamu, hay li ma ɦok mulawa kisiya, hay li ma gisiyawa ɗifini, nisi ma cukum tisiya.

³⁰Goora vi Aaron ma vurna baŋalam hay lop ɗifin ɗawni, nam ma cuk sligar namna talam ir buur siɗiya, hay li ma nam kal kalaf hay guɗuk ma fi-tuwna, kay li lopna hay liyn ma peldetna.

³¹Naŋ ma vi ɦu-gamala ma vuli goy ɗifinna, naŋ ma zalam sliwam hay liy ma peldete.

³²Aaron hiɗi gurona valam ma ti sliw ɦu-gamala namna hiɗi fu ma hay tikisita. Nisi ma tun goy vun guɗuk ma fi-tuwna.

³³Ki kayn nala nisi ma ti ɗifin ma kay poora vi sulukŋa, kay nisi ma vulis goyo, kay nisi ma liys peldete. Sa ma pul as tumɗi, kay kayni mi slen ma peldete.

³⁴La dir sliw ma ɗifinna hiɗi dir fun hin goyo ta-ta grawta, naŋ ma ŋalam goy hay kuta, sa as kay tum loɗi, kay namu mi slen ma muɗi peldete.

³⁵Slen ma nan di taŋu kay naŋ ma lum tam Aaron hiɗi gurona valamu naŋ ma lum kafe. Naŋ ma yaw buur siɗiya kay tunsi hay lopna.

³⁶Hay buurta kaf naŋ ma li ɗifin hiɗi put-guju kep kep kay poora vi sulukŋa; hiɗi kayni naŋ ma por giwin-ma-ɗifinna, naŋ ma yam mul talamu kay muɗum peldete.

³⁷Naŋ ma por tuw giwin-ma-ɗifinna ir buur siɗiya naŋ ma lum goy peldete; giwin-ma-ɗifinna ma muɗ goy peldet suwa, va ma tun tam giwin-ma-ɗifinna namna kaf muɗi goy peldete.

³⁸Nan min ɗekaŋ kay faray ma naŋ ma ŋatam kulo kay giwin-ma-ɗifinna: Hay buurta kaf naŋ ma ŋat guro fok-dimina ma busata valam kepn ma' ma'. Naŋ ma li kayni ta-ta dok-doko.

³⁹Goor-ɦu-dimi ma kepna naŋ ŋatam graw culumta, ma hena naŋ ŋatam hay vulatita.

⁴⁰Hay li ma naŋ li ɗifin hiɗi goor ɦu-dimi ma kepna, naŋ ma yaw futuw digeɗna hay gal-ma-doogona vi dutta-kusta, hiliɓim hiɗi mula olive ma kilira ir goŋgoŋ kep hiɗi gali.

⁴¹Goor ɦu-dimin hena naŋ ma lum ɗifini hay vulatita, sle ma vulda hiɗi mula ma naŋ tapam kuɗumna naŋ ma tapam kuɗum ŋray ca ki ma graw culumta nala; kayni mi ɗifin ma ŋalay hay kuta, hista valam ŋaa'a ŋolo kir Ma-Vatɗina.

⁴²Kayni mi ɗifinna ma ŋalam goy ta-ta dok-dokŋa, ma gurona vigi ma lum dok-doko hay vun guɗuk ma fi-tuwna, vok ir Ma-Vatɗina, kayni mi liyn ma nan ma ŋaf hiɗi nigi hayamu, nan ma kus yoboy hiɗi nigi kaw.

⁴³Hay liy namna nan ma ŋaf hiɗi gurona vi Israyel, gajijita vanu ma muɗ liy namna goy peldete.

⁴⁴Guɗuk ma fi-tuwna hiɗi giwin-ma-ɗifinna nan ma muɗum goy peldete, Aaron hiɗi gurona valamu nan ma muɗsi goy peldete, kay nisi ma lak li lopna van ma ɗifinna dok-doko.

⁴⁵Nan ma mus jar gurona vi Israyel, nan ma muɗ mi Lawna visiya.

⁴⁶Nisi ma wi ala nanu mi Ma-Vatɗina, Lawna visiya, ma yawsiyay goy hay nagat Egipte pana kay mus jarsiya. Nanu mi Ma-Vatɗina Lawna visiya.