Read Masana KAL-GOYTA 3 Bible Online

KAL-GOYTA 3 - Masana bible

KAL-GOYTA 3

¹Musus ka ŋom farayna vi kunomna Yetro, Mul-ma-ɗifinna hay Madiyan; nam kal farayn goy hay fulda, nam co kat hiɗiyta vi Lawna, hay Horeb.

²Sunda-wuralawna vul tuwam kiramu jar kuta ta ŋalta, jar biremna. Musus ɗuw na kayni, hum gu-ma-zigiyna ka sliy kuwa, may hum gu-ma-zigiyna may ŋal goyɗi.

³Musus di'e: Nan min muɗ iran bugolanu kay ɗuw va namna ma laŋ ɦuyumna kayn tige. Hum gu-ma-zigiyn ka sliy kuwa, may kut may ŋalamɗi kay mige?

⁴Ma-Vatɗin wi ala nam ka tuɗ goboy talamu kay ɗuwumu kayni, goy jar gu-ma-zigiyn pa nam yi Musus, ka dumu: Musus, Musus! Musus hot dit ala: Nanis zawni!

⁵Lawn di'e: Naŋ ma ɦuray kulo goboy tanɗi, pataŋ tuguruna vaŋ goy seŋu, kay liyn ma naŋ coli hayamna zawni ti nagata peldetta.

⁶Nam hot dum lo ala: Nanu mi Lawna vi buŋu Abraham, Lawna vi Isaak, Lawna vi Yakub kaw. Musus ŋay iramu, kay nam li nari kay ɗuw vok Lawna.

⁷Ma-Vatɗin dumu: Nan wi lasta vi sumuna vanawa hay Egipte, tiyta visiya hay ɓam sum sa curoɗsina nan wa'awa, kay nan wi makka visiyawa.

⁸Nan jikiyawa gaa'a kay butsi goyo hay ɓam sum sa Egiptena, kay yawsi goy hay nagat tan pa, kay narsi hay nagat ta ŋaata ta beɗay hiriŋ hiriŋga, hay nagata ta miira hiɗi yumda ka jaŋ goyo, hay liyn ma sum sa Kanaaniyana, sa Hetiyena, sa Amoriyana, sa Feresiyena, sa Heviyena hiɗi sa Yebusiyena ka li ziy haya.

⁹Humaŋu, tiyta vi sum sa Israyella coy ta-ta tanu, nan wi curoɗa ta sum sa Egipten ka curoɗsi hiɗi na'tawa.

¹⁰Wulin kayni, tuɗaŋu, nan min gaŋ kat Farawn, sumuna vanu, gurona vi Israyella naŋ ma kalsiyay goy hay Egipte pa.

¹¹Musus di tam Lawna: Nanu nan mi gige kay tuɗ tam Farawn a kal gurona vi Israyel ay goyo?

¹²Lawn di'e: Nan ka hiɗi naŋu; kayni mi va ma min ɗekaŋ ala gaŋ sun mi nanu: Hay li ma naŋ yaw sumuna vaniyawa goy hay Egipte pa, nigi ma sunan kulo kay hiɗiyt zawni.

¹³Musus di tam Lawna: Wulin kayn nan ma tuɗ tam gurona vi Israyel, nan ma disi ala: Lawna vi sumaygi gani katgiya yo; may la nisi jobonawa ala semda vaŋ anige ni, nan hotsi dit ɗawn anige?

¹⁴Lawn di tam Musus: Nanu mi nam ma ka'a.[1] Nam hot di lo: Naŋ ma di mi gurona vi Israyel ki kayn nala: Nam ma yum ala «nan ka'a» ganay tigi mi namu.

¹⁵Lawn hot di mi Musus lo: Naŋ ma di tam gurona vi Israyel ala: Ma-Vatɗina Lawna vi sumaygiya, Lawna vi Abraham, Lawna vi Isaak hiɗi Lawna vi Yakub ganay katgiya. Kayni mi semda vanu ta-ta hay vatɗita, kayni mi semda vanu tam jafgi vokgi lo, vokgi lo.

¹⁶Tuɗaŋu, tokaŋ sum sa maariyana vi Israyel, naŋ ma disi ala: Ma-Vatɗin Lawna vi sumaygi vul tuwam kiranu, Lawna vi Abraham, Isaak hiɗi Yakub kaw. Nam di ala: Nan wigiyawa, slen ma nisi lum tigi hay Egiptena nan wumawa,

¹⁷nala nan di'e: Nan ma kalgi goyo hay nagat Egipte ta nigi ka ci lasta haya pa, nargi hay nagata vi sum sa Kanaaniyana, sum sa Hetiyena, sum sa Amoriyana, sum sa Feresiyena, sum sa Heviyena hiɗi sum sa Yebusiyena, hay nagata ta miira hiɗi yumda ka jaŋ goy haya.

¹⁸Nisi ma humaŋ vunaŋu, naŋ ma tuɗa, naŋu hiɗi sum sa maariyana vi Israyel, nigi ma tuɗ kat mul ma Egiptena, dum ala: Ma-Vatɗina, Lawna vi sum sa Hebrena vul tuwam kirma'a, naŋ malma hagata kay numa tuɗ ir buur ɦidi hay fulda, kay numa ma li ɗifin tam Ma-Vatɗina Lawna vuma'a.

¹⁹Nan wi ala mul ma Egiptena ma hingi kal noŋɗi, la dono tara suw kalamɗina.

²⁰Nan ma meɗ ɓan goyo, nan ma wat Egipte hiɗi ɗekka ta nan min la' jarsiya kuɗ bata' kafe. Bugol kayni nam ma hingi kal goyo.

²¹Nan ma muɗgi hawi kir sum sa Egiptena kay nisi ma ligi slugota, kay hay li ma nigi kal ɗawni, nigi ma tuɗ hiɗi ɓigi ɦawa kiɗaŋ kiɗaŋɗi.

²²Cat tarige kaw ma job doway doorona hiɗi ora hiɗi sligara tam cat ta ziya' hiɗi na' kepta, hiɗi ta na' musi vo va'ta, nala nigi ma ganam tam guro-joriyona hiɗi guro-boyna vigiya. Nala nigi ma hin sum sa Egipten goy haw ko' ko'.