Read Masana KAL-GOYTA 30 Bible Online

KAL-GOYTA 30 - Masana bible

KAL-GOYTA 30

¹Naŋ ma kot giwin-ma-ɗifinna kay ŋal urdin kulo kalamu, naŋ ma kotom hiɗi gu-kasiyana;

²fiyokka valamu ma li ir goldoŋ kep, be'da valamu ma li ir goldoŋ kep. Gefem ma fiɗina naŋ ma ŋram ca. Fiyokka valam ta kulota ma li ir goldoŋ ma'. Naŋ ma in miyok kulo kalamu.

³Naŋ ma korom tuwam hiɗi or ma bay-rigasna, korom yalam ma kulon lay, korom tuwam kaf lay, kor tuw miyokŋ lay. Naŋ ma kor ora goy hay gaŋam kaf lay.

⁴Naŋ ma ci girliŋ ora ma' gaa kuɗ gaŋam hena; ci girliŋ ora ma' lo gaa kuɗ gaŋam hena kaw. Kayni kay cuk malla ma ziyim hiɗi namna haya.

⁵Naŋ ma kot malla hiɗi gu-kasiyana, naŋ ma korom tuwam hiɗi ora.

⁶Giwin-ma-ɗifin namna naŋ ma tunum goy vok sligar-gaɓayna ma ka ɗiger vok timgilla vi di-goyta, goy vok goɓolokona ma kuluɓi kay di-goyta, liyn ma nan ma fi tuwan hiɗi naŋ hayamna.

⁷Aaron ma ŋal urdi ma hisna haya; nam ma ŋalam hay graw culumta kaf hay li ma nam ka kot tuw fitilla;

⁸lo, hay li ma nam ka kot fitilla hay vulatita, nam ma ŋal hena lo. Nigi ma ŋal urdin ki kayn nala dok-dok, vok ir Ma-Vatɗina, ta-ta tam gurona vigi sa bugolgina.

⁹Urdina hiɗi ɗifin ma ŋal-goyna hiɗi vulda, hiɗi mul ma yamam goyna, ma maramay goy hay liyn mara pana, nigi ma lum ɗifini kulo kay giwin namna noŋɗi.

¹⁰Sem kep hay busata, Aaron ma li poora kat miyok giwin-ma-ɗifinna, hiɗi busuwna vi ɦu ma poora. Nigi ma li poora jar jafna vigi sem kep hay busata. Kayni mi va ma peldet ŋolo vok ir Ma-Vatɗina.

¹¹Ma-Vatɗina di tam Musus ala:

¹²Hay li ma naŋ min li ŋaɓta vi gurona vi Israyel, gige gige jarsiya ma wurakanu kay hot gus tuwamu. Kay hay buur ma li ŋaɓta vi sumun ɗawni, bakmaran ma nig kalamɗi.

¹³Sum sa asay kay li ŋaɓta as wurak ki kayn nala: Gal sikel kepe, ŋram hiɗi sikel ma ka hay liyn ma peldetna, ma ir gurju guray dok-ma'na. Gal sikel namna na lin mi vulda tam Ma-Vatɗina.

¹⁴Sum sa kalawa hay ŋaɓtana, tun caw tam busat dok-ma' ta-ta voko, nisi ma li vulda vi Ma-Vatɗina.

¹⁵Hay li ma nigi vul gal sikel tam Ma-Vatɗina kay gus tuwgi ɗawni, sa ma farayna as vul goy suwɗi, sa ma hawna as vul kiɗayɗi kaw.

¹⁶Gurjuta ta gurona vi Israyel, vula' kay gus tuwsit ɗawni naŋ ma va' hay ɓisiya, naŋ ma vula' hay lopna vi guɗuk ma fi-tuwna; na' ma hin ɗawni ti gi-humda vi gurona vi Israyel vok Ma-Vatɗina kay tuwsi ma gusina.

¹⁷Ma-Vatɗina di tam Musus ala:

¹⁸Naŋ ma kot doway-firi kawayna, yoraŋ wayn gaa kuɗumu, kay muz-tuwna: Naŋ ma tunum jar guɗuk ma fi-tuwna hiɗi giwin-ma-ɗifinna, naŋ ma go niy hayamu,

¹⁹Aaron hiɗi gurona valamu ma muz sesi hiɗi ɓisi hayamu.

²⁰Hay li ma nisi min kal hay guɗuk ma fi-tuwna, nisi ma muz goy hiɗi niy namna, kay nisi ma fi mittaɗi; (nisi ma li muziya) hay li ma nisi co tam giwin-ma-ɗifinna, kay li ɗifinna, kay vul slen ma ɗifinna tanu.

²¹Nisi ma muz ɓisi goyo, muz sesi goyo kaw kay nisi ma fi mittaɗi. Gatta kayni hini dok-doko kay Aaron hiɗi gurona valamu, hiɗi jafna visi ma bugolsina kaw.

²²Ma-Vatɗina di tam Musus ala:

²³Yawaŋ aromatna ma ŋaana, dubaŋŋa miir ma tol gaa kay tuwamna ir sikel kis-vasl, gun sinamom ma his fayna ir sikel kis-ma' hiɗi diram dok-vasl, cerew ma his fayna kaw ir sikel kis-ma' hiɗi diram dok-vasl.

²⁴gun kas ir sikel kis-vasl, ŋram hiɗi sikel ma ka li lop hay liyn ma peldetna, mul olive ir goŋgoŋ kepe may.

²⁵Naŋ ma rigasam hiɗi mula kay ɦokom kay sana a lum peldete. Ma kotom mi sa ma wi yal kotta vi urdina; kayni mi mula kay ɦokom kay sana kay lum peldete.

²⁶Naŋ ma yamam tam guɗuk ma fi-tuwna hiɗi timgilla vi di-goyta,

²⁷tablena hiɗi jak ma hayamna kafe, va ma tun fitilla hiɗi jak ma hayamna kafe, giwin-ma-ɗifinna ma ŋal urdin kulo kalamna,

²⁸giwin-ma-ɗifinna ma ŋal farayn kulo kalamna ma hiɗi jakŋa ma hayamna kaf, doway-firina hiɗi diram ma gaana kaw.

²⁹Slen namna kaf naŋ ma lum goy peldete, nam ma muɗ goy peldet suwa, slen kaf ma tun balam talamu muɗi goy peldete.

³⁰Naŋ ma ɦok mul kay Aaron hiɗi gurona valamu, naŋ ma lisi goy peldete, kay nisi ma lak hay lopna vanu dok-dok hay liyn ma peldetna.

³¹Naŋ ma di tam gurona vi Israyel ala: Kayni ma hin dok-dok mi mul ma peldetna ma ɦok kamna, ta-ta tam gurona vigiya.

³²Nigi as yamam goy tam sa ma ɦawaɗi, nigi as kot mara ki nam nalaɗi, ŋra mul mara hiɗi namɗi kaw, kay nam peldete. Nigi ma ɗuwum dok-dok peldete.

³³La sa kot mul mara ki nam nala, lebo setem tam sa ma pulu, ma kaam selem goy jar sumuna valamu.

³⁴Ma-Vatɗina di tam Musus: Naŋ ma yaw hadaf aromatna, hiɗi dubaŋŋa vi gun stakte, oniks hiɗi galbanum, hiɗi urdi-haɓna ma kilira, naŋ ma ŋram ca ki tuwam nala.[8]

³⁵Hiɗi nam cani, sa ma wi yal kotta vi urdina ma lum ŋaa'a ŋolo; ma cuk mandan kuɗumu kotom kiliri, bay-gese kaw.

³⁶Naŋ ma lut hen goy futuwu, naŋ ma tunum vok liyn ma di-goyna, hay guɗuk ma fi tuwna, liyn ma nan ma ŋaf hiɗi naŋ hayamna. Nam kayni ma li ɗawn mi va ma peldet kigiya.

³⁷Urdina vigi ma kay tuwgina nigi as a lum ki kayn nalaɗi, ŋra mara hiɗi namɗi; nigi ma ɗuwum dok-dok peldete, nam ir vi Ma-Vatɗina.

³⁸La sa mara kot urdi mara'a ma hista valam ki kayn nala, ma kaam selem goy jar sumuna valamu.