Read Masana KAL-GOYTA 31 Bible Online

KAL-GOYTA 31 - Masana bible

KAL-GOYTA 31

¹Ma-Vatɗina di tam Musus ala:

²Wulin kayn naŋ ma wi ala Betsaleel goora vi Uriyas goor-ŋolona vi Hur ma hay jafna vi Yudana nan vilekemawa.

³Nan hobomawa hiɗi ŋusta vanu, hiɗi yalla, hiɗi wida, nan vulum widawa kay kot slen kafe.

⁴Nam nagawa kay fi yal kotta vi slena, kay kot ora, kot doorota hiɗi wayna kaw,

⁵kay ɗo slen tam hiɗiyna, kay ceɗ guna, kay li lop kuɗ jafam kafe.

⁶Ɗuwaŋu, nan vulum Oholiyab, goora vi Ahisamak ma hay jafna vi Dan, kay nam ma gut kuɗumu. Nan vul ŋusta ta wida hay dik nisi kaf sa irsi yalla, kay nisi ma li slen ma nan ɗekem kiraŋ kafna.

⁷Guɗuk ma fi-tuwna, timgilla vi di-goyta, goɓoloko ma ka kuluɓi kalamna, hiɗi jakŋa ma hay guɗukŋa kaf;

⁸tablena hiɗi jak ma hayamna kaf, va ma tun fitilla ma ora hiɗi jak ma kalamna kaf, giwin-ma-ɗifinna ma ŋal urdina;

⁹giwin-ma-ɗifinna ma ŋal farayn kulo kalamna hiɗi sle ma talamna kafe, doway-firina hiɗi diram ma gaana.

¹⁰Sligar ma li lopna, sligar ma peldetna vi mul-ma-ɗifinna Aaron, sligara vi gurona valamu ma li lop ɗifinna;

¹¹mul ma ɦok kamna, urdi ma hisna kay liyn ma peldetna. Slen ma nan disitna kaf nisi ma li kuɗumu.

¹²Ma-Vatɗina di tam Musus:

¹³Naŋ ma di tam gurona vi Israyel ala: Yigi ma jok buur ma sabatna noŋɗi, kayni ti ɗekka ta jaran nan hiɗi nigiya, jar gurona vigi kaw, a nigi ma wi ala nanu mi Ma-Vatɗina ma ligi goy peldete.

¹⁴Nigi ma li kuɗ sabatna, kay namu mi va ma peldete kigiya. Sa ma li kuɗ sabatnaɗina, kitata valam ti cita-goyta; la sa li lop hay buur namna, ma bam iram goy jar sumuna valamu.

¹⁵Nigi ma li lop ir buur karkiya, may buurta siɗiyat kayni mi sabatna, buur ma tun-sukŋa, buurta vi Ma-Vatɗina, la sa li lop mige kaw hay buur namna, kitata valam ti cita-goyta.

¹⁶Gurona vi Israyel ma li kuɗ sabatna, nisi as tun suksi hayamu, nisiya hiɗi gurona visiya; ki bonota ta vatɗita nala.

¹⁷Nam ma hin jaran nan hiɗi gurona vi Israyel ɗawni ti ɗekka ta mus ta-ta hay vatɗita. Kay Ma-Vatɗina li wuralawna hiɗi nagat kayni hay buur karkiya, may hay buurta siɗiyata nam vat vun lopna valamu, nam tun sukamu.

¹⁸Hay li ma Lawn vat vunam hiɗi Musus kulo kay hiɗiyt Sinay vatna, nam vulum hiɗiy beɗayna vi di-goyta ma', ɗoy hayam mi ɓalam nam Lawn tuwamu.