Read Masana KAL-GOYTA 32 Bible Online

KAL-GOYTA 32 - Masana bible

KAL-GOYTA 32

¹Hay li ma sum sa Israyel wi ala Musus mus kulo kay hiɗiyt ta-ta bay jikay gaa'a, nisi tok tuwsi kat Aaron, nisi dumu; fokaŋ kulo'o, kotma lawna mara'a ma tun vokma'a, kay sa namna ma yum Musus ma kalma'ay goy hay nagat Egipte pana, wulin kayni la nam ɦod ɦodtige kla kirmaɗi.

²Aaron di tisiya: Ganna ma ora ma ka hay hum boyna vigiya hiɗi gurona vigi sa jufayn lay, sa boyn layna nigi ma patam goyo, margit tanu.

³Nisi kaf pat ganna ma ora ma hay humsin goyo, nisi maram tam Aaron.

⁴Nam yawam hay ɓisiya, yoromu, kot goor-put ma yorina. Nisi ka di'e: Israyel lawna vay ma kali ay goy hay nagat Egipte pan zawni.

⁵Hay li ma Aaron wi kayni, nam in giwin-ma-ɗifinna kulo vokomu, nam ka siwelsi ala: Jifin ɗawni, nay ma li yuldeta kay subur sem Ma-Vatɗina.

⁶Co hay buurta ka'ta kayni, nisi fok kulo graw culum culum', nisi li ɗifin ma ŋal-goyna hiɗi ɗifinna vi lop ma slugona. Nisi lakay gaa'a kay ti'e hiɗi ci'e, bugol kayni nisi yaw kulo'o kay liwa.

⁷Ma-Vatɗina di tam Musus: Jikaŋ gaa'a, kay sumuna vaŋu sa naŋ kalsiyay goy hay nagat Egipte pana muɗ tuwsiyawa liwisi.

⁸Wulin de', hagata ta nan ɗeksi ka'ta nisi hina'awa goyo. Nisi yor goor-putnawa, nisi girif gaa vokomu, nisi li ɗifin talamu, nisi ka di ala: Israyel, lawna vay ma kali ay goy hay nagata Egipte pan zawni.

⁹Ma-Vatɗina di tam Musus: Nan wi ala sumun kayni si sum sa yisi ɗeŋe.

¹⁰Wulin kayn naŋ hinan yo; nan min muɗ ɦiy katsiya, nan min ŋalsi goyo; may naŋu, nan min muɗaŋ jafaŋ ŋolo.

¹¹Musus tiy tam Ma-Vatɗina Lawna valamu, nam ka dum ala: Wulin kayni, Ma-Vatɗina, sumuna vaŋu sa naŋ kalsiyay goy hay Egipte hiɗi gaŋeraŋa vaŋu, hiɗi ɓaŋ ma donon pana, naŋ muɗ ɦiy katsi ɗawn kay mige?

¹²A sum sa Egipten ma di ala nam kalsi goy kayn kay lisi joo, kay cisi goy kuɗ hiɗiyna, kay vatsi jafsi goy hay nagata kayn kay mige? Wulin kayn hinaŋ ɦiyda vaŋ goyo, varta vaŋu kay li joo tam sum nisin kayni naŋ ma hina' goyo.

¹³Humaŋ ma gaŋu kay Abraham, Isaak hiɗi Israyel sa sunda vaŋu, sa naŋ yi va kaŋu hay humsiya hiɗi semda vaŋ ala: Nan ma biya jafna vigiya ki mislek ma dukalawn nala, nagat na'ta ta nan digi ka'ta kaf nan min vulgita, na' ma hin ir vigi nigi dok-doko.

¹⁴Varta kay li joo tam sum nisin kayni Ma-Vatɗina hina' goyo.

¹⁵Musus jik gaa'a kay hiɗiyta, hiɗiy beɗayna vi di-goyta ma' ka hay ɓalamu; hiɗiy namna galam ma' kafe ka ɗoya, hayam ɗoy lay ŋorom ɗoy lay.

¹⁶Hiɗiy namna ceɗem mi Lawn kay tuwamu, ɗota ta ɓiri talamta ɓira' mi Lawn kay tuwamu.

¹⁷Yosuwa hum del sumun ka ciriya, nam di'e: Sumun ciriy kayn duur ka hay kaŋŋa.

¹⁸Musus hot dumu: Kayn may ciriyna vi koldaɗi, ciriyna vi maŋaytɗi ka. Nan ka hum del sumun lum kayn mi nulla.

¹⁹Hay li ma nam co goboy tam kaŋŋa, nam wi goor-putna hiɗi pirta-nulla. Musus muɗi ɦiy ŋolo; hiɗi ɓalam ma' nam gi hiɗiy-beɗayna gaa sem hiɗiyn kirit', nam to goyo.

²⁰Nam sli put ma nisi yoromna, ŋalam goy hay kuta; lutum goy futuwu, fat futuw namna kulo kay niyna, vulum vun gurona vi Israyel kay nisi cumu.

²¹Musus di tam Aaron: Sumun kayni lum taŋ mige a naŋ hinsi kal hay suluk ma ŋol ki kayn nala?

²²Aaron hot dita: Mulanna, naŋ muɗ ɦiy katanɗige, kay naŋ wi ala sum nisin kayni diksi mina' dok-dok ti joota.

²³Nisi dan ala: Naŋ ma kotma Lawn mara'a ma tun vokma'a; kay Musus namna ma kalma'ay goy hay nagat Egipten pan kayni, la nam ɦod ɦodtige kla numa wi loɗi.

²⁴Nan disi ala: Sum sa or ka ganay tisina nisi ma fokom goyo maram tanu. Nisi maram tanu may. Nan cukum hay kuta, goor-putna kayni kali goyo may.

²⁵Hay li ma Musus wi ala sumun kayni minim mi law ma gijum-gijumna, Aaron kaw hinsiyawa hay ma gijum-gijumta, dirsi patawa goyo kir sa gaw kisina kaw,

²⁶nam col goy hay vun-galana vi kaŋŋa ka di'e: Nisi sa min Ma-Vatɗin kaf ma co tan tani. Jafna vi Levi kaf tok tuwsi talamu.

²⁷Nam disiya: Ma-Vatɗina Lawna vi Israyel di ala: Gigekaw ma gaɓ kew-gaferaŋa valam galamu, nigi ma jik kulo way kaŋŋa nigi ma ŋuy vun ziyn kaf, gigekaw ma ci ɓasulumna, sugolomna.

²⁸Gurona vi Levi li kuɗ va ma Musus dumna; hay fat na'ta sumun mit jarsi birim ɦidi.

²⁹Musus di'e: Vulgi tuwgi goy mi Ma-Vatɗin vaydi, la nigi li ɗifin hiɗi gurona vigiya, hiɗi ɓosiyogina kaw, kay nam ma vulgi bolda.[9]

³⁰Hay buurta ka'ta, Musus di tam sumun ala: Nigi li suluk ma ŋolawa. Wulini nan min jik kulo kat Lawna; la nam vulan gida kay sulukŋa vigi klasige?

³¹Musus hot kat Lawna nam dumu: Hih! Sumun kayn li suluk ma ŋolawa. Nisi kot lawna ma orawa.

³²Wulin kayn naŋ vulaŋ gida kay sulukŋa visiya, la naɗi naŋ ma ɦasan sen goy hay ɗerwella vaŋu ma naŋ ɗomna.

³³Ma-Vatɗina di tam Musus: Nan ɦasam selem goy hay ɗerwelda van kayni mi sa ma li suluk katanna.

³⁴May naŋu, tuɗaŋu, naraŋ sumun hay liyn ma nan daŋ kalamna. Humaŋu, sunda-wuralawna vanu ma tun vokaŋu, may hay buur ma nan ma job yanna ɗawni, nan ma ka kitat kisiya kay sulukŋa visiya.

³⁵Ma-Vatɗina ci sa Israyella, kuɗ goor-putna ma Aaron kotsitna.