Read Masana KAL-GOYTA 33 Bible Online

KAL-GOYTA 33 - Masana bible

KAL-GOYTA 33

¹Ma-Vatɗina di tam Musus: Naŋu hiɗi sum sa naŋ kalsiyay goy hay nagat Egipte pana, nigi ma tuɗgi goy hay liyn tan pa; tuɗaŋ hay nagata ta nan yi va kan ala nan min vula' mi Abraham, mi Isaak, mi Yakub hiɗi jafna visi sa bugolsina.

²Nan ma gi sunda-wuralawn kep vokaŋu, sum sa Kanaaniyana, sum sa Amoriyana, sum sa Hetiyena, sa Feresiyena, sa Heviyena hiɗi sa Yebusiyena nan ma munsi vokaŋu.

³Tuɗaŋ hay nagat na'ta ta miira hiɗi yumda ka riŋ goy haya, may nan as tuɗis kulo jargiɗi, kay a nan ma ŋalgi goy hay hagatɗi, kay nigi kayni si sum sa yigi ɗeŋ ŋolo.

⁴Hay li ma sumun hum law ma yoora namna, sutaysi to'o. Sa min cuk sligar ma ŋaa'a talam loɗi.

⁵Bugol kayni Ma-Vatɗina di tam Musus: Naŋ ma di tam gurona vi Israyel ala nisi kayni si sum sa yisi ɗeŋe. La nan coys jargi ir liyn neeɗa ɦawa kaw, nan ma ŋalgi goyo. Wulin kayni ganna vigi ma tigina nigi ma fokom goyo, nan ma wi va ma nan ma lum hiɗi nigina.

⁶Gurona vi Israyel fok ganna visi ma tisin goy kaf, nisi ter goy gine'e hiɗi hiɗiyta Horeb.

⁷Musus yaw tantana, nam vi guɗukŋa goy ir gine neeɗa hiɗi kaŋŋa visiya; nam tunum selem ala guɗuk ma fi-tuwna; nisi kaf sa min job Ma-Vatɗina tuɗ kat guɗuk ma fi-tuwna ma ka goy gine'e hiɗi kaŋŋa visina.

⁸Hay li ma Musus fok kulo'o kay tuɗ hay guɗuk namna, sumun kaf yaw kulo'o, lak kulo kay sesi vun guɗukŋa visiya, cuk irsi kuɗ Musus, ta-ta Musus kal kalaf hay guɗukŋa tuwa.

⁹Hay li ma Musus kal kalaf hay guɗukŋa, ɗugul ma no'osna jiki gaa'a coli vun guɗuk namna, nala Ma-Vatɗina ka kus yoboyn hiɗi Musus.

¹⁰Sumun kaf wi ɗugul ma no'osna ka col vun guɗukŋa visiya visiya. Nala nisi kaf fok kulo'o dab voksi gaa'a vun guɗuk namna.

¹¹Lawn ka law hiɗi Musus vun-tuwsiya, ki san ka kus yoboyn hiɗi banamna nala. Bugol kayni Musus hot hay kaŋŋa, may ma sunda valam ma joriyona ma yum ala Yosuwa goora ni Nun, nam may kal goy hay guɗukŋɗi.

¹²Musus di tam Ma-Vatɗina: Humaŋu, naŋ dan ala, sumun tani nan ma tuɗsi goyo, may naŋ min ɗekan kay sa ma tun vokannaɗi kay mige? May naŋ di ala naŋ wan goy ŋaa'a ŋolo, naŋ min lan slugota kaw naɗi su?

¹³Wulin kayni, la naŋ min lan slugota ni, naŋ ma ɗekan hagata vaŋu, ki kayn nala nan ma waŋu, nala nan ma fi slugot vok iraŋ suwa. Waŋ goy ala sumun tani si sumuna vaŋu.

¹⁴Ma-Vatɗin dumu, nan kay tuwanu ma tun vokgiya, nan ma vulgi tun-sukka kaw.

¹⁵Musus hot dumu: La naŋ kay tuwaŋ tun vokmaɗi, naŋ ma hinma yaways goy tan paɗi.

¹⁶Nan hiɗi sumuna vaŋu, a numa wi goy gasi ala naŋ luma slugotawa kayni, hay li ma naŋ ka tuni vokma'ana ɗisu? Lebo hay li nanu hiɗi sumuna vaŋu irma ma li poŋi goy valamu hiɗi sum sege sa gaa kay nagat kafna ɗisu?

¹⁷Ma-Vatɗina di tam Musus: Nan ma li kuɗ va ma naŋ joban kalamna, kay naŋ fi slugotawa vok iranu, nan waŋ naŋ kay tuwaŋu.

¹⁸Musus di'e: Hinan wi gajijita vaŋu.

¹⁹Ma-Vatɗina hot dumu: Nan hin ŋaata vanu jik vok iraŋ kafe, nan ma ɗekaŋ kay semda vanu ta ala Ma-Vatɗina, nan li slugot tam sa ma nan lum slugotna, nan as wi kir-hawta vi sa ma kiran hawn lay. Ma-Vatɗin di'e:

²⁰Naŋ as a wan vok iranɗi, sa ma wan iranu ma mus iri mayɗi.

²¹Ma-Vatɗina di'e: Liy hena ka goboy tan tani, colaŋ kulo'o kay hiɗiyna.

²²Hay li ma gajijita van ka jika, nan ma ŋayaŋ hay zul hiɗiyna, nan ma bar ɓan kaŋu ta-ta nan jik goy tuwa.

²³Hay li ma nan sli ɓanawa goyo, naŋ ma ɗuwan hay bugolanu. May vokan hayɗin naŋ as a wumɗi.