Read Masana KAL-GOYTA 35 Bible Online

KAL-GOYTA 35 - Masana bible

KAL-GOYTA 35

¹Musus tok sum sa Israyel noŋ kaf, nam ka disi ala: Humgi slen ma Ma-Vatɗin di kay nigi ma lumna.

²Nigi ma li lop jar buur karkiya, may buurta siɗiyat kayni na' kigi peldete; kayni ti buurta sabatna, buurta tun sukŋa, na' ti buurta vi Ma-Vatɗina. La sa li lop hay buur na'ta, kitata valamu ti cita-goyta.

³Hay buurta vi sabatna nigi as kay ŋal kut vo hay ziyna vigi noŋɗi.

⁴Musus di tam tokŋa vi gurona vi Israyel ala: Humgi va ma Ma-Vatɗin dumu:

⁵Slena vigiya nigi ma mar mara goy kuɗum mi Ma-Vatɗina. Sum sa diksi ŋaana kaf ma mar vulda tam Lawna; nigi ma mar ora, doorota hiɗi wayna;

⁶sligar ma tuwam ɗoy zim-zimna, ma tuwam ɗoy cih-cihna hiɗi baraw haɓna, hiɗi ɗuŋus fok-meena;

⁷bak fok-gamalana ma tuwam ɗoy slawna, hiɗi bakŋa vi dofeŋŋa, hiɗi gu-kasiyana.

⁸Hiɗi mul ma ɦok hay fitilla, hiɗi hadaf aromatna kay kot mul ma ɦok-kamna hiɗi urdi ma his fayna;

⁹hiɗi hiɗiyn oniks, hiɗi hiɗiy mara'a kay cum tam ŋom ma giɗeŋŋa hiɗi birim ma ɗigiyna

¹⁰sum sa irsi yalla jargi kaf, nisi ma co'o kay li lop ma Ma-Vatɗin di kalamna:

¹¹tabernaklena, guɗuk ma hayamna, va ma baara, sle ma gaɓamna, gu-biremna, malla, dolla hiɗi diram ma mokay gaana;

¹²timgilla hiɗi malla ma talamna, goɓolokona, sligar ma gaɓayna kay ŋuy tuw timgilla.

¹³tablena hiɗi zugul ma talamna, hiɗi jak ma talamna kafe, funa ma vuli goyna;

¹⁴va ma tum fitilla hiɗi jak ma talamna, hiɗi fitilla, mul ma ɦokom hay fitilla kaw;

¹⁵giwin-ma-ɗifinna ma ŋal urdina hiɗi malla ma talamna, mul ma ɦok-kamna, hiɗi urdi ma his fayna, hiɗi sligar-gaɓayna ma lakam hay vun tabernaklena,

¹⁶giwin-ma-ɗifinna ma ŋal farayn kulo kalamna, hiɗi kaway-ciliyna ma cuf sliwna, mal ma talamna, jak ma talamna kafe, doway-firina hiɗi diram ma ini gaana;

¹⁷sligar ma gaɓay tam wur-daŋŋa, dolla valamu, diram ma ini gaana, sligar-gaɓayna ma juni tam vun ma kal kalaf hay wur-daŋŋa,

¹⁸Gu-ɓalla ma ŋuyi tam tabernaklena, gu ma piy gaana ma tam wur-daŋŋa, zigewna valamu hiɗi sligar ma li lop ɗifinna kalaf hay liyn ma peldetna,

¹⁹sligar ma peldetna vi mul-ma-ɗifinna Aaron, sligara ma gurona valam li lop ɗifinna hiɗi namna.

²⁰Tokŋa vi gurona vi Israyel noŋ kaf hin Musus, nisi kali goyo.

²¹Nisi kaf sa diksi vi lawt kayni hiɗi sa ka hiɗi varta ŋaata hay diksina, nisi co'o, mar vulda visi tam Ma-Vatɗina kay inda vi guɗuk ma fi-tuwna, kay lopna valam noŋ kaf, kay lopna vi sligar ma peldetna kaw.

²²Sum sa jufayn co lay, sa boyn co lay; nisi kaf sa diksi tuni ŋaana mar sle ma pum cinna, girliŋŋa, tujuna, way ta ɓamta, slen ma ora kuɗ jafam kafe; gigekaw li vulda vi ora ma nam ŋomomay mi Ma-Vatɗina.

²³Nisi kaf sa ka hiɗi sligar ma tuwam ɗoy zim-zimna, ma tuwam ɗoy cih-cihna, ma tuwam ɗoy slawna, baraw-haɓna hiɗi ɗuŋus fok-dimina, hiɗi bakŋa vi fok-gamalana ma tuwam ɗoy slawna, hiɗi bakŋa vi dofeŋŋa*, nisi maram kafe.

²⁴Nisi kaf sa ka hiɗi doorota lebo wayna kaf maram tam Ma-Vatɗina, nisi geɗ vulda na'ta. Nisi kaf sa ka hiɗi gu-kasiyana kaw nisi maramu kay li lopna hiɗi namu.

²⁵Boyn kaf sa irsi yalla duɓar barawn kay tuwsiya, lop ma nisi lumna nisi maramu, baraw ma tuwam ɗoy zim-zimna, ma tuwam ɗoy cih-cihna, ma tuwam ɗoy slawna, hiɗi baraw haɓna kaw.

²⁶Boyn kaf sa diksi ka tuni ŋaana, sa irsi yalla, nisi duɓar ɗuŋus fok-meena.

²⁷Sum sa ŋulona jar sa Israyella nisi mar hiɗiyn oniks hiɗi hiɗiy hena hena kay cum tam sligar-ŋoŋŋa hiɗi ŋoŋ ma ɗigiyna.

²⁸Nisi mar hadaf aromatna hiɗi mula, kay fitilla, kay kot mul ma ɦok kamna hiɗi urdi ma his fayna.

²⁹Gurona vi Israyel kaf jufayna hiɗi boyna kaw, sa diksi tuni ŋaa'a kay vul slena kay li lopna vi Ma-Vatɗina, vulda-ɦawata ta Ma-Vatɗina di Musus ka'ta kaf nisi mara'a tam Ma-Vatɗina.

³⁰Musus di tam gurona vi Israyel: nigi ma wi ala Betsaleel goora vi Uriyas, goor-ŋolona vi Hur ma hay jafna vi Yudana, Ma-Vatɗin vilekemawa.

³¹Nan hobomawa hiɗi Ŋusta-Lawna, hiɗi yalla, hiɗi wida, nam vulum widawa kay kot slena kuɗ batam kaf.

³²Nam muɗum nagaya kay fi yal kotta vi slena, kay yor ora, doorota hiɗi wayna.

³³Kay ɗo slen tam hiɗiyna, kay ceɗ guna, kay li lop ma yalla kuɗ jafam kafe.

³⁴Nam vul talamu vulda kay hat sumuna, Oholiyab goora vi Ahisamak ma hay jafna vi Dan kaw nam tapam hiɗi namu.

³⁵Nam hobsiyawa hiɗi wida kay nisi ma li lop ma ceɗ guna, ma ɗo tam slena ma cil sligara, kay ci sligara ma tuwam ɗoy zim-zimna, ma tuwam ɗoy cih-cihna, ma tuwam ɗoy slawna, hiɗi baraw ma haɓna, kay li lopna kuɗ jafam kaf, kay niŋa yalla kaw.