Read Masana KAL-GOYTA 36 Bible Online

KAL-GOYTA 36 - Masana bible

KAL-GOYTA 36

¹Betsaleel, Oholiyab hiɗi sum sege sa Lawn vulsi yalla hiɗi wida kaf kay wi yal slena, kay lumu kaw; nisi tun caw li lopna vi slen ma lakam hay liyn ma peldetna, ki Lawna vul hagat kalam kaf nala.

²Musus yi Betsaleel hiɗi Oholiyab, hiɗi sum sege sa irsi yalla kaf. Sa Lawn vulsi widana, hiɗi sum sa tuwsi goy vuli kaf kay li lop namna.

³Vulda ta gurona vi Israyel vula'a kay li lopna vi liyn ma peldetna nisi yawa' kaf hay vok ir Musus. Graw culumta kaf, nisi ka mar vulda-minda mi Musus dok-doko.

⁴Nala sum sa irsi yalla sa ka li lop hay liyn ma peldetna hin lopna visi ay kaf,

⁵nisi co'o di tam Musus: Slen ma sumun ka maramna kayni nam suwi goy kay lopna vi liyn ma peldetna ma Lawn vul hagat kalamna.

⁶Musus vul labara goy hay kaŋŋa ala la sa jufu lebo ca'a kaw ma vul va mara'a kay inda vi liyn ma peldetna loɗi. Nisi tel sumun kay mar vulda.

⁷Slen ma nisi maramna asaya, suw goy kay lopna noŋ kaw.

⁸Sum sa irsi yalla noŋ kaf sa ka li lopna, nisi kot tabernaklena hiɗi tapina doogo hiɗi baraw haɓna ma ciliyna, hiɗi baraw ma tuwam zim-zimna hiɗi ma tuwam cih-cihna, nisi ɗo keruben* talamu, kotay hiɗi yalda ŋolo.

⁹Tapi ma kepna fiyokka valam ir goldoŋ dok-ma' yam glafandi; buɗukka valamu ir goldoŋ fiɗi; tapi ma hen noŋ kaf ŋata valam ay ki kayn nala.

¹⁰Tapi ma vaslna nisi siram gaŋam vun tuwam kep; hen ma vaslna kaw nisi siram gaŋam vun tuwam kep lo.

¹¹Nisi kot zigew-ŋokŋa ma tuwam zim-zimna hay vun tapina ma siray vun tuwam jewna; ma siray vun tuwam bugolla nisi lum ki kayn nala kaw.

¹²Tapi ma siray vun tuwam jewna nisi cuk zigew-ŋokŋa dok-vasl hay vunamu, tapi ma siray vun tuwam bugolla nisi cuk zigew-ŋokŋa hay vunam dok-vasl kaw; zigew-ŋok namna ŋiray vun tuwam ɓurut'.

¹³Nisi kot sle ma gaɓna ma ora dok-vasl, nisi kal vun tapin kulo hay tuwam hiɗi zigew-ŋokŋ namna, ki kayn nala tabernaklen kotawa.

¹⁴Nisi kot tapina hiɗi ɗuŋusna vi fok-meena, kay nam ma bar yam tabernaklena; hiɗi ɗuŋus namna nisi kot tapin doogo yam kep.

¹⁵Fiyokka vi tapi ma kepna ir goldoŋ dok-ɦidi, be'da valamu ir goldoŋ fiɗi, nam doogo yam kep kaf kayn ŋray ca ki tuwam nala.

¹⁶Tapi ma vaslna nisi siram gaŋam vun tuwamu, hen ma karkiyana nisi siram gaŋam vun tuwamu kaw.

¹⁷Nisi cuk zigew-ŋokŋa dok-vasl hay vun tapi ma siray vun tuwam jewna, nisi cuk zigew-ŋokŋa dok-vasl lo hay vun tapi ma siray vun tuwam bugoldana.

¹⁸Nisi kot sle ma gaɓna dok-vasl hiɗi wayna, kay ci tapin vun tuwamu kay kotta vi guɗukŋa.

¹⁹Kay guɗuk namna nisi kot borgona ma tuwam ɗoy slawna, hiɗi bakŋa vi fok-gamalana, nisi kot borgon mara lo hiɗi bakŋa vi dofeŋŋa*, kay gum kulo kalamu.

²⁰Nisi kot biremna kay tabernaklena; kotom mi gu-kasiyana; nisi lakam kulo hiɗi selemu.

²¹Fiyokka vi birem ma kepna ir goldoŋ doogo, buɗukka valamu ir goldoŋ kep hiɗi gali.

²²Birem ma kepna kona ka talam ma' ma', kali hay tuwamu tuwamu, biremna vi tabernaklen noŋ kaf nisi lum ki kayn nala.

²³Nisi kot biremna dok-ma' kay gal ma kayamna vi tabernaklena.

²⁴Nisi yor kaway doorota dok-fiɗi gaa kuɗ biremna ma dok-ma'na. Birem ma kepna hiɗi kona valam ma ma'na nisi yor dooron gaa kuɗum ma' ma'.

²⁵Nisi kot biremna dok-ma' lo hay gal ma ma'na vi tabernaklena, gal ma gaana,

²⁶yor doorot gaa kuɗum dok-fiɗi kaw, birem kep kayni yor dooron gaa kuɗum ma' ma'.

²⁷Nisi kot biremna karkiya gaa kuɗ guɗukŋa, hay gal ma vulatina.

²⁸Nisi kot biremna ma' kay gef tabernaklena ma gaa kuɗumna;

²⁹nam ay tapay tam tuwamu, tun caw ay gaa pa, sinem ma kulon juni tam tuwam ŋaa'a ŋolo hiɗi girliŋŋa; nam ma' kafe nisi lum gefem ki kayni nala.

³⁰Biremna ay noŋ pet glafandi, hiɗi doorot yori gaa kuɗumu, doorot ta yorit noŋ pet doogo yam karkiya, gaa kuɗ birem ma kepna doorot ay ma' ma'.

³¹Nisi kot malla vasl hiɗi gu-kasiyana kay ziy biremna ma hay gal ma kepna vi tabernaklena.

³²nisi kot malla vasl lo kay gal ma ma'na vi tabernaklena, malla vasl kay biremna ma ka hay galla vi tabernaklena, ma gaa kuɗumna hay gal ma vulatina;

³³nisi kot malla ma jaara kay jikis hay gaŋ biremna pa ta-ta goy gaŋam gal hena.

³⁴Biremna nisi korom tuwam hiɗi ora, girliŋ ma talamna ma kal malla hayna kaw nisi korom tuwam hiɗi ora, malla kaw nisi korom tuwam hiɗi ora.

³⁵Sligar-gaɓayna nisi kotom hiɗi baraw ma tuwam zim-zimna, ma tuwam cih-cihna hiɗi ma tuwam slawna, hiɗi baraw haɓna ma duɓarayna, nisi kotom hiɗi yal ŋolo, nisi ɗo keruben* talamu may.

³⁶Nisi kot dolla valam fiɗi hiɗi gu-kasiyana, korom tuwam hiɗi ora; sle ma gaɓna ma talamna mi ora, nisi yor doorota gaa kuɗum fiɗi.

³⁷Kay vun-guɗukŋa, nisi kot sligar-gaɓayna hiɗi ma baraw ma tuwam zim-zimna, ma tuwam cih-cihna hiɗi ma slawna, hiɗi baraw haɓna ma duɓarayna, nam ciliy ŋaa'a ŋolo.

³⁸Nisi kot dolla valam vasl hiɗi sle ma gaɓ talamna, yalam ma dilarayna hiɗi zigew ma kal sligar hayamna, diram ma yori gaa kuɗum vaslna mi wayna.