Read Masana KAL-GOYTA 37 Bible Online

KAL-GOYTA 37 - Masana bible

KAL-GOYTA 37

¹Betsaleel kot timgilla hiɗi gu-kasiyana; fiyokka valamu ir goldoŋ ma' hiɗi gali, buɗukka valamu ir goldoŋ kep hiɗi gali, fiyokka valam ta kulota ir goldoŋ kep hiɗi gali.

²Hayam ma kalafn lay, ŋorom lay, nam korom hiɗi or ma bay-rigasna. Gaŋam kaf nam korom hiɗi ora.

³Nam yor girliŋ-ora fiɗi, lakam goy hay gefem ma fiɗina, girliŋ-ora ma ma'na hay gefem ma hena, ma ma'na lo hay gefem hena may.

⁴Nam kot malla hiɗi gu-kasiyana, korom tuwam hiɗi ora:

⁵Nam kal malla hay girliŋŋa ma ka ciy goy gaŋ timgilla kay ziy timgilla hiɗi namu.

⁶Nam kot goɓolokona hiɗi or ma bay-rigasna; fiyokka valamu ir goldoŋ ma' hiɗi gali, buɗukka valamu ir goldoŋ kep hiɗi gali.

⁷Nam kot keruben* ma' hiɗi ora; nam kotom hiɗi or ma tayayna, nam lakam goy hay vun timgilla gal ma' pete.

⁸Keruben ma kepna goy hay vunam hena, kep goy hay vunam hena may; nisi kot keruben kayni, nam suw goy kay gaŋ goɓolokon ma' pete.

⁹Kerubena gilaŋatsi ka meɗay goy kay goɓolokona, gilaŋatsi ka bar yam goɓolokona, ka ɗuw tuwsiya, irsi ka muɗi kir goɓolokona.

¹⁰Nam kot tablena hiɗi gu-kasiyana, fiyokka valam ir goldoŋ ma', buɗukka valamu ir goldoŋ kep, fiyokka valam ta kulota ir goldoŋ kep hiɗi gali.

¹¹Nam korom tuwam hiɗi or ma bay rigasna, nam ŋuyum gaŋam hiɗi or kafe.

¹²Nam kot gu mara'a, ŋuyum goy gaŋam cusl', be'da valam ŋaɓ cita-ɓamta fiɗi', nam korom tuwam noŋ kaf hiɗi ora.

¹³Nam yor girliŋ-ora fiɗi', cum goy hay gefem ma fiɗina, ma ka tam selem ma fiɗina kaw.

¹⁴Girliŋŋa ɓalay kulo goboy tam gaŋamu, malla ka kali hayamu kay ziy tablena.

¹⁵Nam kot malla hiɗi gu-kasiyana, korom tuwam hiɗi ora; lopna valam kayni kay ziy tablena.

¹⁶Nam kot jak ma lakam kay tabella; zlarak ora, kaway ma niyna, tasana hiɗi ŋalayna, kay li vulda ta yama' goyta; nam kot kayni kaf hiɗi or ma bay-rigasna;

¹⁷nam kot va ma tun fitilla hiɗi or ma bay-rigasna; nam kot va ma tun fitilla hiɗi or ma tayayna; selem ma gaana, zokomu, yalamu, gaslamu hiɗi ɓalamu, nam tapay kulo tam tuwamu.

¹⁸Ɓalam karkiya kali goy talam pa, ɓalam ma ɦidina kali goy hay galam hena, ɓalam hen ma ɦidina kali goy hay galam hen pa kaw.

¹⁹Hay ɓalam ma kepna yalam ma kulon moki ki vuɗna vi moŋgon nala, gaslam hiɗi ɓalam ka'a, ma hena kaw ay nala. Ɓalam karkiya kaf ma kal ay goy talam pan kayni nam ay ki kayn nala.

²⁰Hay zok va ma tun fitilla, yalam ma moki ki vuɗna vi moŋgon nalan ka fiɗi, gaslam ka'a, ɓalam ka'a kaw.

²¹Ɓalam ma kali goy hay tuwam pana gaslna ka mokay gaa kuɗumu, gaslna ka gaa kuɗ hen ma ma'na, hen ma ma'n lo, nam noŋ kaf ay ki kayn nala.

²²Gaslna hiɗi ɓam va ma tun fitilla tapay kulo tam tuwamu, nam kaf ay kotay hiɗi or ma tayayna hiɗi ma bay-rigasna.

²³Nam kot fitil ma siɗiyana, sle ma do kuta, hiɗi ŋarak ma ko butuwn hayna, kotom kaf hiɗi or ma bay-rigasna.

²⁴Nam yaw or ma bay-rigasna ir kilo dok-ɦidi, kay li va ma tun fitilla hiɗi jak ma talamna.

²⁵Giwin-ma-ɗifinna ma ŋal urdin kulo kalamna, nam kotom hiɗi gu-kasiyana; fiyokka valamu ir goldoŋ kep, be'da valamu ir goldoŋ kep; gefem fiɗi pet ŋray ca, fiyokka valamu ir goldoŋ ma', miyokŋa ka kal goyo hay gef giwin-ma-ɗifinna.

²⁶Nam korom tuwam hiɗi or ma bay-rigasna: Yalam ma kulona, galam noŋ kafe, hiɗi miyokŋa, nam korom gaŋam hiɗi or noŋ kafe.

²⁷Gaa kuɗ gaŋamu nam lak girliŋ-ora hay gal hen ma', hay gal hen ma' lay, kay kal malla ma ziyim hiɗi namna haya.

²⁸Nam kot malla hiɗi gu-kasiyana, korom tuwam hiɗi ora.

²⁹Nam kot mul ma peldetna ma ɦok kamna, hiɗi urdin ma his fayna, bay gese. Kotom kayni mi sa ma wi yal kotta vi urdina.