Read Masana KAL-GOYTA 39 Bible Online

KAL-GOYTA 39 - Masana bible

KAL-GOYTA 39

¹Hiɗi sligar ma tuwam ɗoy zim-zimna, ma tuwam ɗoy cih-cihna, ma tuwam ɗoy slawna, nisi kot sligara ma li lopna hay liyn ma peldetna, nisi kot sligar ma ɗifinna kay Aaron, ki Ma-Vatɗina vul hagata mi Musus nala.

²Nisi kot sligar-ŋoŋŋa hiɗi ora, hiɗi baraw ma tuwam zim-zimna, ma tuwam cih-cihna, na slawna hiɗi baraw haɓna ma duɓarayna.

³Nisi beɗ or goy heberek', kaam iram goy ki zigewn nala, nisi zlinawam jar sligar ma ciliy hiɗi tuwam zim-zimna, ma tuwam cih-cihna, ma tuwam slawna, hiɗi baraw haɓna ma duɓarayna; nam ay kotay ŋaa'a ŋolo.

⁴Nisi kot jeŋŋa ma tapam kulona, gaŋam ma ma'na pet tapay kulo'o ki kayn nala.

⁵Kantina nisi kotom hiɗi sle ma kot sligar-ŋoŋŋa kaw, nam ka juni kulo kalamu; nam kotay hiɗi ora, hiɗi ɓaraw ma tuwam zim-zimna, ma tuwam cih-cihna hiɗi ma tuwam slawna, hiɗi baraw haɓna ma duɓarayna, ki Ma-Vatɗina vul hagata tam Musus nala.

⁶Nisi ŋuy tuw or ma ciyna hiɗi hiɗiyn oniks, nisi ɓir sem gurona vi Israyel kulo kalamu, ki san ɗo hay tampoŋ nala.

⁷Nisi cum kulo hay pel sligar-ŋoŋŋa kay gi-humda kay gurona vi Israyel, ki Ma-Vatɗina vul hagat tam Musus nala.

⁸Nisi kot birim-ŋoŋŋa kotay hiɗi yal ŋolo, kotom hiɗi sle ma kot sligar-ŋoŋŋa kaw, kotom hiɗi ora, hiɗi baraw ma zim-zimna, ma tuwam cih-cihna, ma slawna hiɗi baraw haɓna ma duɓarayna.

⁹Gefem fiɗi kaf ŋray ca; birim-ŋoŋŋa kotay kayn jaɓay kay tuwam ma'; fiyokka valamu ŋa way-ɓamta kepe, buɗukka valamu ŋa way-ɓamta kepe, nam ciy kay tuwam ma'.

¹⁰Nisi ci hiɗiyn talamu, zlaram kuɗ tuwam fiɗi. Ma zlaray jewna yum ala: Sardowan, topaz hiɗi emerode.

¹¹Ma zlaray sem ma'na: grenat, safir hiɗi diyamaŋ;

¹²ma zlaray sem ɦidina: Opal, agat hiɗi Ametiste;

¹³ma zlaray sem fiɗina: krisolit, oniks hiɗi yaspis. Nam ka ciy gaa hoɗoɗ hoɗoɗ'.

¹⁴Nam noŋ pet doogo yam ma', ŋray hiɗi sem gurona vi Israyel; ɗoy gaa'a ki tampoŋ nala, jafna vi Israyel sa doogo yam ma'na semda visi ka ɗoy hayam kafe.

¹⁵Nisi kot jaɓna hiɗi or ma bay-rigasna, ciliy ki zigewn nala.

¹⁶Gaŋam ma' pete nisi lum kulo jiŋiliŋ hiɗi ora, kot girliŋ-ora ma', girliŋ-ora ma ma'na nisi cum goy gaŋ sligar-ŋoŋŋa,

¹⁷jaɓ ma ora ma ma'na nisi kalam hay girliŋ ma ka ciy goy gaŋam ma' petna;

¹⁸jaɓna ma ma'na ma ka goy hay pel sligar-ŋoŋŋa nisi vum vunam goy voko.

¹⁹Nisi kot girliŋ-ora mara ma' lo, nisi cum goy hay gaŋ birim-ŋoŋŋa ma pete, hay vunam ma kalaf ɗigiyna ma ka kulo tam sligar-ŋoŋŋa.

²⁰Nisi kot girliŋ-ora mara ma' lo, nisi cum gaa kuɗ pel sligar-ŋoŋŋa ma ma'na pete, hay gal ma vokŋa, goboy tam vunam ma tapayna, kulo'o kay kantina vi sligar-ŋoŋŋa.

²¹Nisi jun vun zigew ma tuwam zim-zimna tam girliŋ ma ka ciy vun birim-ŋoŋŋa, junum vunam hen tam girliŋ ma ciy pel sligar-ŋoŋŋa, kay birim-ŋoŋŋa ma duɓak kulo'o kay kantina vi sligar-ŋoŋŋa, kay jaram ma ja goy hiɗi namɗi, ki Ma-Vatɗina vul hagata tam Musus nala.

²²Nisi kot ŋoŋŋa ma fiyokŋa, nisi cilim kaf kayn hiɗi baraw ma tuwam zim-zimna.

²³Ŋoŋ ma fiyok namna nisi hinim wayam goy baŋa'a. Delem ma kal yam hayna nam diŋasli ŋolo kay a nam jet goyɗi.

²⁴Gaa hay gaŋamu nisi jun ɦoro-ɦorona ma tuwam ɗoy zim-zimna, ma tuwam ɗoy cih-cihna ma tuwam slawna hiɗi baraw haɓna ma duɓarayna.

²⁵Nisi kot gilereŋŋa hiɗi ora ma bay-rigasna, nisi jun gilereŋ jar ɦoro-ɦorona, ŋuyum goy hay gaŋ ŋoŋ-ma-fiyokŋa noŋ cusl' jar ɦoro-ɦorona.

²⁶Gilereŋ kep, ɦoro-ɦoro kep; gilereŋ kep, ɦoro-ɦoro kep, ŋuyum goy hay gaŋ sligar fiyokŋ kafe, kay li lopna, ki Ma-Vatɗina vul hagata tam Musus nala.

²⁷Nisi kot sligar-tuwna hiɗi baraw-haɓna, ciliya, kotom kay Aaron hiɗi gurona valamu;

²⁸jakawata hiɗi pokita nisi kotom hiɗi baraw haɓna, kayni mi ganta visiya; kalesoŋŋa nisi kotom hiɗi baraw haɓna ma duɓarayna;

²⁹kantina nisi kotom hiɗi baraw haɓna ma duɓarayna, tuwam ɗoya; tuwam zim-zim, tuwam cih-cih, slawi kaw, ki Ma-Vatɗina vul hagata tam Musus nala.

³⁰Nisi beɗ or ma bay-rigasna goy goor heberek', kay bogoray ma ɗifinna, nisi ɗo hayamu ki san ɗo hay tampoŋŋa nala, nisi ɗo ala: Peldetta tam Ma-Vatɗina.

³¹Nisi junum tam jakawata, kulo kalamu, ki Ma-Vatɗina vul hagata tam Musus nala.

³²Ki kayn nala lop inda vi tabernaklena hiɗi inda vi guɗuk ma fi-tuwna vatawa yo. Gurona vi Israyel li kuɗ slen ma Ma-Vatɗina dum mi Mususna noŋ kaf.

³³Nisi mar tabernaklena mi Musus, guɗukŋa hiɗi slen ma talamna noŋ kaf, sle ma gaɓna, biremna, malla, dolla hiɗi diram ma yori gaana;

³⁴va ma baara ma bak fok-dimina ma tuwam ɗoy slawna, va ma baara ma kotay hiɗi bak dofeŋŋa*, sligar-gaɓayna ma poŋ jar-liyna,

³⁵timgilla vi di-goyta hiɗi mal ma talamna, hiɗi goɓolokona;

³⁶tablena, hiɗi jak ma kalam kafna, hiɗi fun ma vuli goyna

³⁷va ma tun fitilla ma kotay hiɗi or ma bay-rigasna, fitil ma tunum kalamna, fitilla valam ma tuwam kotayna, hiɗi jak ma kalamna noŋ kaf, hiɗi mul ma ɦok hay fitilla;

³⁸giwin-ma-ɗifinna ma ora, mul ma ɦok kamna hiɗi mul ma his fayna, sligar ma gaɓam kulo hay vun guɗukŋa;

³⁹giwin-ma-ɗifinna ma kawayna, kaway ma ciliy jar-tuwamna, malla, hiɗi sle ma hayam kafna, doway-firina hiɗi diram ma yori gaana;

⁴⁰sligar ma gaɓay tam wur-daŋŋa, dolla valamu diram ma yori gaana, sligar ma gaɓay tam vunna vi wur-daŋŋa, zigew ma kalam hayamna, gu ma piy gaana; hiɗi jakŋa ma li lop hay tabernaklen noŋ kafe, kay guɗuk ma fi-tuwna.

⁴¹Sligar ma li lop hiɗi namu hay liyn ma peldetna, sligar ma ɗifinna vi Mul-ma-ɗifinna Aaron, sligara vi gurona valamu kay lop ma ɗifinna.

⁴²Lop namna gurona vi Israyel lum kafe. Slen ma Ma-Vatɗin dum mi Mususna noŋ kaf nisi hum kuɗumu.

⁴³Musus sar lop namna noŋ kaf, nam ɗuw kayni lop namna liya ki Ma-Vatɗin vulum hagat kay lum nala. Musus gi bolo kay lop namna.