Read Masana KAL-GOYTA 4 Bible Online

KAL-GOYTA 4 - Masana bible

KAL-GOYTA 4

¹Musus hot dit ala: Ɗuwaŋu, nisi ɗawn ma van vunanɗi, nisi ma hum dita van noŋɗi. May nisi ma di ala: Ma-Vatɗin may vul tuwam kiraŋ noŋɗi.

²Ma-Vatɗin hot dumu: Hay ɓaŋ kayn mi mige? Nam hot dit ala ti zugulda.

³Ma-Vatɗin di'e: Gaŋgi gaa kay nagat tige. Nam ga' gaa kay nagata, na' muɗ goy guya, Musus pir voka' jaŋi.

⁴Ma-Vatɗin di tam Musus: Meɗaŋ ɓaŋ goyo vaŋgi giɗera'a. Nam meɗ ɓalam goyo bowa' giɗera'a, guyt hot muɗ goy hay ɓalam zugul lo.

⁵Ma-Vatɗin dumu: Kayni mi va ma naŋ ma li'e; kay nisi ma vi ala vul tuwam kiraŋ kayn mi Bum Sumuna, Lawna vi sumaysiya Lawna vi Abraham, Lawna vi Isaak, Lawna vi Yakub.

⁶Lawn hot dum lo: Tunaŋ ɓaŋ hay war-digaŋu. Nam tun ɓalam hay war-digamu; bugolda nam hot sla' goyo, ɗuw na kayn ɓalam ɓoy haɓ tal-tal kay moy-kuturuna.

⁷Ma-Vatɗin dumu: Hotaŋ ɓaŋ kulo war-digaŋu, nam hot ɓalam kulo war-digamu; bugolda nam hot sla'ay goy war-digam na kayni, ɓalam hoti goy hay liya' ma jewna.

⁸Ma-Vatɗin dumu: La sum sa Israyella min vi dita vaŋɗi, la nisi min vi kuɗ ɗekka ta jewtɗi, nisi ma vi kuɗ ɗekka ta bugolda may.

⁹La ɗekka ma' pet lakŋi nisi vi kuɗa'ɗi, la nisi min vi dita vaŋ noŋɗi, naŋ ma tuɗ hay niy-lumna, cal niyna, naŋ ma yamam gaa kay nagata; niy namna ma naŋ gomay goloŋŋa ma muɗ goy busuwu gaa kay nagata.

¹⁰Musus di tam Ma-Vatɗina: A'a! Bum-Sumuna, nan may mi sa ma vunan di koloyɗi, kamata, kama-heta, jew ɓa-ɓa kaw naŋ ka law hiɗi sa ma sunda vaŋu; kay nanu mi sa ma vunan di neke.

¹¹Ma-Vatɗin dumu: Ma kot vun sana mi gige? Ma li san numulu lebo ŋeliya mi gige? Ma muɗ san ɗuwa lebo muɗum dukiya mi gige? May mi nan Ma-Vatɗinɗi su?

¹²Tuɗaŋ maŋ hay! Nan ka hiɗi vunaŋ ma dina, nan min ɗekaŋ slen ma naŋ ma di'e.

¹³Musus di'e: A'a, Bum-Sumuna, gaŋ sa mara ma naŋ mina.

¹⁴Nala Ma-Vatɗin dikam muɗi ɦiya kat Musus, nam di'e: Ɓasuŋŋa Aaron ma Levitna mayɗi su? Nan wi ala nam mi sa ma vunam law goy gaŋiya. Nam kaw ma tuɗay kiraŋu hay li ma nam waŋawana, nam ma li firi hay dikam kalafi.

¹⁵Naŋ ma law hiɗi namu, naŋ ma hin lawt hay vunamu. Nan ka hay vunaŋu, hay vunam namu kaw, nan ma ɗekgi va ma nigi ma lumna.

¹⁶Nam ma law hay baŋalaŋu tam sumuna; nam ma muɗ ki vunaŋ naŋ nala, naŋ vurnay ki Lawna valam nala may.

¹⁷Zugulda kayni slaŋgi hay ɓaŋu, naŋ ma li ɗekka hiɗi na'a.

¹⁸Musus kaliya. Bugolda hay li ma nam co kat kunomna Yetro, nam dumu: Nan siɗawaŋu, naŋ hinan tuɗa kat guro-biyonna hay Egipte, kay nan min tuɗ ɗuwsiya la nisi ka iri tuwa. Yetro di tam Musus: Tuɗaŋ ŋaa'a.

¹⁹Ma-Vatɗina di tam Musus hay Madiyan ala: Tuɗaŋu, hotaŋ hay Egipte, kay nisi kaf sa gar kay caŋ goyna nisi mitiya.

²⁰Musus yaw cata hiɗi gurona valam kuɗumu, nam ɓesi kay kurona, hotay hay nagata Egipte, nam sli zugulda vi Lawn hay ɓalamu.

²¹Ma-Vatɗina di tam Musus: Hay li ma naŋ ka tuɗa kay hot hay Egipte, ɗuwaŋ ɗekka ma nan min hin hay ɓaŋ kafe. Naŋ ma li ɗek na'ta kir Farawn. Nanu, nan ma muɗum dikam ɗeŋe, nam ma hin sum sa Israyella kal goyɗi.

²²Naŋ ma di tam Farawn ala: Israyel kayni ki goora vanu ma vuɗi jewna nala.

²³Nan min daŋu: Hinaŋ gurona van kal goyo, kay nisi ma sunanu. La naŋ hinsi kal goyɗi, goora vaŋ ma vuɗi jewna nan ma cum goy mati.

²⁴Hay rogoyta valamu, Musus bur hay liyn mara'a, Ma-Vatɗin co kalamu, gar kay cum goy mati.

²⁵Sefora sli hiɗiy ma vunam fetna, ka goora va' gosaya, na' jo sem jufa'a di'e: Naŋu mi juf ma busuwu kanu.[2]

²⁶Bugol kayni Ma-Vatɗin hinimu. Na' di ala juf ma busuwu kayn kuɗ gosay ma na' kaam mi goora va'na.

²⁷Ma-Vatɗina di tam Aaron: Tuɗaŋ hay fulda kay ŋaf ir Musus. Aaron kaliya; nam ŋaf hiɗi Musus kulo kay hiɗiyta vi Lawna; nisi firi tuwsiya.

²⁸Musus di Aaron kay yoboyn ma Lawn gumay hiɗi namna kaf, hiɗi ɗekka ma Lawn dum kay nam ma lumna kafe.

²⁹Musus hiɗi Aaron kali voksiya; nisi tok sa maariyana jar gurona vi Israyel kafe.

³⁰Aaron di labara ma Lawna dum mi Mususna mi sumun kaf, nam li ɗekka goy kir sumun kafe.

³¹Sumun vi kuɗ dita visiya. Nisi hum ala Lawn humam gumawa kay gurona vi Israyel, nam wi lasta visiyawa; nisi her gaa'a, dab voksi gaa'a.