Read Masana KAL-GOYTA 40 Bible Online

KAL-GOYTA 40 - Masana bible

KAL-GOYTA 40

¹Ma-Vatɗina di tam Musus ala:

²Hay buurta jewta vi til ma jewn ɗawni, naŋ ma in tabernaklena kulo'o. Kayn di ala guɗuk ma fi-tuwna.

³Naŋ ma tun timgilla vi di-goyta hayamu, naŋ ma ŋuyum tuwam hiɗi sligar-gaɓayna.

⁴Naŋ ma mar tablena, naŋ ma lak slen goy kalamu. Naŋ ma mar va ma tun fitilla, naŋ ma kot fitilla kulo kalamu.

⁵Naŋ ma tun giwin-ma-ɗifinna ma ora ma ŋal urdina goy vok timgilla vi di-goyta, naŋ ma jun sligar-gaɓayna hay vun tabernaklena.

⁶Giwin-ma-ɗifinna ma ŋal farayn kalamna naŋ ma colom goy hay vun ma kal kalaf hay tabernaklena, guɗuk ma fi-tuwna.

⁷Doway-firina naŋ ma tunum jar guɗuk ma fi-tuwna hiɗi giwin-ma-ɗifinna, naŋ ma ɦok niy hayamu may.

⁸Wur-daŋŋa valamu naŋ ma ŋuyum talamu, naŋ ma jun sligar-gaɓayna goy hay vun wur-daŋŋa.

⁹Naŋ ma sli mul ma ɦok kamna, naŋ ma yamam goy tam tabernaklena hiɗi slen ma talamna kafe, naŋ ma lum goy peldete hiɗi slen ma hayamna kaf, ki kayn nala nam ma liys peldete.

¹⁰Naŋ ma yam mul tam giwin-ma-ɗifinna ma ŋal farayn kulo kalamna hiɗi jakŋ ma talamna kafe, giwin-ma-ɗifinna naŋ ma lum goy peldete, nam ma li goy peldet suwa.

¹¹Naŋ ma yam mul tam doway-firina hiɗi diram ma yori gaana, naŋ ma lum goy peldete.

¹²Aaron hiɗi gurona valamu naŋ ma narsi kulo goboy tam guɗuk ma fi-tuwna, naŋ ma muzsi goy hiɗi niyna.

¹³Naŋ ma cuk sligar ma ɗifinna tam Aaron, naŋ ma ɦok mul kalamu, naŋ ma lum goy peldete, kay nam ma hin dok-doko vun lopna vi ɗifinna.

¹⁴Naŋ ma mar gurona valam taŋ goboyo, naŋ ma cuksi sligar-tuwn tisiya,

¹⁵naŋ ma ɦoksi mul kisiya ki naŋ ɦok mul kay busi nala kaw, kay nisi ma hin li lopna vi ɗifinna dok-doko. Hiɗi mul ma ɦokay kisina, nisi hiɗi jafna visi bugolsi ɗawn ma vi ala lop ma ɗifinna hini hay ɓisi dok-doko.

¹⁶Musus li kuɗ slen ma Ma-Vatɗina dumtin kafe.

¹⁷Hay buurta jewta vi til ma jewna vi busata ma'ta, tabernaklen inawa kulo'o.

¹⁸Musus in tabernaklen kulo'o, nam tunum diram ma gaana, lak biremna hiɗi malla, in dolla kulo'o.

¹⁹Nam vi guɗukŋ kulo hay tabernaklena, nam lak borgona ma kotay hiɗi tantan kulo kalamu, ki Ma-Vatɗina vul hagata tam Musus nala.

²⁰Nam sli di-goyta, tuna' kalaf hay timgilla; cuk malla tam timgilla; nam tun goɓolokona kulo kay timgilla may.

²¹Nam mar timgilla hay tabernaklena, nam lak sligar-gaɓayna ma ɓuraw jar-liyna. Nam kusuɓ tuw timgilla vi di-goyta, ki Ma-Vatɗina vul hagata tam Musus nala.

²²Nam tun tablena hay guɗuk ma fi-tuwna, hay gal ma gaana vi tabernaklena, goy ŋor sligar-gaɓayna;

²³nam lak fun goy kuɗ tuwamu vok Ma-Vatɗina ki Ma-Vatɗina vul hagata tam Musus nala.

²⁴Va ma tun fitilla nam colom hay guɗuk ma fi-tuwna, goy vok tablena ɗiger, hay gal ma kayamna vi tabernaklena;

²⁵nam kot tuw fitilla, vok ir Ma-Vatɗina, ki Ma-Vatɗina vul hagata tam Musus nala.

²⁶Giwin-ma-ɗifinna ma ora nam colom hay guɗuk ma fi-tuwna, goy vok sligar-gaɓayna;

²⁷nam ŋal urdi ma his fayn kulo kalamu, ki Ma-Vatɗina vul hagata tam Musus nala.

²⁸Nam jun sligar-gaɓayna hay vun tabernaklena.

²⁹Giwin-ma-ɗifinna ma ŋal farayn kulo kalamna nam colom hay vun tabernaklena, hay vun guɗuk ma fi-tuwna, nam ŋal ɗifinna hiɗi vulda-ɦawata kulo kalamu, ki Ma-Vatɗina vul hagata tam Musus nala.

³⁰Doway-firina nam tunum jar guɗuk ma fi-tuwna hiɗi giwin-ma-ɗifinna, niy ma muz-tuwna nam ɦokom hayamu;

³¹Musus kaw, Aaron hiɗi gurona valam kaw muz sesi hiɗi ɓisi hayamu;

³²hay li ma nisi kali kalaf hay guɗuk ma-fi-tuwna, nisi co goboy tam giwin-ma-ɗifinna kayni, nisi muz tuwsi goyo, ki Ma-Vatɗina vul hagata tam Musus nala.

³³Wur-daŋŋa nam kotom kat tabernaklena hiɗi giwin-ma-ɗifinna, nam jun sligar-gaɓayna hay vun wur-daŋŋa. Musus vat lopn kayn ki kayn nala.

³⁴Bugol kayni ɗugulla li kulo guriya kay guɗuk ma fi-tuwna, gajijita vi Ma-Vatɗina hob guɗukŋa.

³⁵Musus may as kay kal kalaf hay guɗuk ma fi-tuwna noŋɗi, kay ɗugulla ka kulo kalamu, kay gajijita vi Ma-Vatɗina ka ŋuyumu kaw.

³⁶Hay li ma gurona vi Israyel ka tuɗ hay fulda kayni, la ɗugul ma gaa kay guɗuk poŋawa kulo'o, nisi kal de.

³⁷La ɗugul bay poŋ kulo'o, nisi kalɗi.

³⁸Hay falayta ɗugulla vi Ma-Vatɗina ka kulo'o kay tabernaklena, hay henjeta kut ka'a. Gurona vi Israyel kaf ka wi kayni hiɗi irsiya hay rogoyta visi kaf.