Read Masana KAL-GOYTA 6 Bible Online

KAL-GOYTA 6 - Masana bible

KAL-GOYTA 6

¹Ma-Vatɗina di tam Musus: Wulini naŋ ma wi va ma nan ma lum tam Farawn; dono tara'a ma suw kalamu, nala nam ma hingi kal goyo, dono tara ma suw kalamu, ta-ta nam ma digiɗgi goy hay nagata valamu.

²Lawn hot law tam Musus lo, nam dum ala: Nanu mi Ma-Vatɗina.

³Nan vul tuwan kir Abraham, kir Isaak hiɗi Yakub, ki Lawn ma gaŋeraŋ-petna nala; may semda van ta ala «Ma-Vatɗina» nan may ɗeka' kirsiɗi.

⁴Nan jun bonota van hiɗi nisiya kaw, kay vulsi nagat Kanaan, nagata ta nisi poyay haya, ta nisi li ziy haya kaw.

⁵Tiyta vi gurona vi Israyel kay lop ma sum sa Egipten tunsit kisina, nan huma'awa. Human ganawa kay bonota vuma ta jarmata.

⁶Kuɗ na'ta, naŋ ma di tam gurona vi Israyel ala nanu mi Ma-Vatɗina, nan min butgi goyo kay lop ma sum sa Egipten tunum kigina. Nan min butgi goy kay lop ma nigi lisitna. Nan min meɗ ɓan goy kisiya kay suɗgi goyo hiɗi kitata-ŋolda.

⁷Nan ma muɗgi goy sumuna vanu, nan ma muɗ mi Lawna vigiya, nigi ma wi ala nan mi Ma-Vatɗina, Lawna vigiya, nanu mi ma butgi goy hay lop ma nek ma sum sa Egipten tunum kigina.

⁸Nan min nargi hay nagata ta nan yi va kanu kay vula' mi Abraham, mi Isaak, mi Yakub kaw; nan ma vula' migiya, nanu mi Ma-Vatɗina.

⁹Musus di ki kayn nala mi gurona vi Israyel. May yorta hiɗi lop ma nekŋa hinsi a hum dita valamɗi.

¹⁰Ma-Vatɗina di tam Musus ala:

¹¹Tuɗaŋ tam Farawn mul ma Egiptena, naŋ ma dumu kay nam ma hin gurona vi Israyel kal goy hay nagata valamu.

¹²Musus hot dit mi Lawn ala: Wulin kayni gurona vi Israyel min human noŋɗi; Farawn human ɗawn humtige, kay vunan kaw di lop ŋolo?

¹³Ma-Vatɗina law tam Musus hiɗi Aaron, nam vulsi hagata kay gurona vi Israyel hiɗi Farawn mulla ma Egiptena, kay nisi ma kal gurona vi Israyel goy hay Egipte pa.

¹⁴Kayni si sa ŋulona vi jafna visiya: Gurona vi Ruben goor ma ŋolla vi Israyel nisi kayni: Henok, Pallu, Hesron hiɗi Karmi nisi lakŋi si jafna vi Ruben.

¹⁵Gurona vi Simeyon: Yemuwel, Yamin, Ohad, Yakin, hiɗi Cowar; hiɗi Sawul goora vi cat ta Kanaaniyata. Nisi lakŋi si jafna vi Simeyon.

¹⁶Kayni mi sem gurona vi Levi hiɗi jafna visiya: Gerson, Kehat hiɗi Merari. Levi nam li busat hay nagat noŋ pet kis kalam dok-ɦidi yam siɗiya.

¹⁷Gurona vi Gerson: Libni hiɗi Simey hiɗi sa hay jafna visiya.

¹⁸Gurona vi Kehat: Amram, Yitsehar, Hebron hiɗi Uziyel. Kehat nam li busat hay nagat noŋ kaf kis kalam dok-ɦidi yam ɦidi.

¹⁹Gurona vi Merari nisi kayni si Makli hiɗi Musi, Nisi kayni si sa fi Levina hiɗi jafna visi noŋ kaf.

²⁰Amram sli cat kep ya' Yokebed, na' ti maymalamta. Na' vuɗum Aaron hiɗi Musus. Amram nam li busat hay nagat noŋ pet kis kalam dok-ɦidi yam siɗiya.

²¹Gurona vi Yitsehar kayni si Kore, Nefeg hiɗi Zikri.

²²Gurona vi Uziyel kayni si Miskayel, Elsafan hiɗi Sitri.

²³Aaron sli cat kep ya' Eliseba, na' ti goota vi Aminadab, ɓasum Naksonta; na' vuɗum Nadab, Abihu, Eliezer hiɗi Itamar.

²⁴Gurona vi Kore nisi kayni: Asir, Elkana, hiɗi Abiyasaf; nisi kaf kayni si sa hay jafna vi Kore.

²⁵Eliezer goora vi Aaron, nam sli cata valam jar gurona vi Putiyel; na' vuɗum Fineyas. Nisi kayni si sa ŋulona vi Levitna, hiɗi jafna visiya visiya.

²⁶Musus hiɗi Aaron kayni si nisi sa Lawn di tisi ala: Nigi ma kal gurona vi Israyel ay goy hay Egipte pa, kuɗ vokŋa visiya visiya.

²⁷Nisi lakŋi si sa law tam Farawn mul ma Egiptena, kay kal gurona vi Israyel ay goyo. Kayni si Musus hiɗi Aaron nisina.

²⁸Hay li ma Lawn law tam Musus hay nagat Egipte kayni,

²⁹nam di tam Musus ala: Nanu mi Ma-Vatɗina. Farawn mul ma Egiptena naŋ ma dum kay sle ma nan daŋgin kaf.

³⁰Musus hot dit tam Ma-Vatɗin ala: Wulin kayn nan vunan di koloyɗi; Farawn as human ɗawn humtige?