Read Masana JOB 1 Bible Online

JOB 1 - Masana bible

JOB 1

¹San kep ay hay nagata vi Us, yum ala Job. Namu mi sa ma gasiya, ɗigere kaw; nam li nar kuɗ Lawna, tun ɓalam tam jootɗi kaw.

²Nam vuɗ guro-jufayn siɗiya, guro-boyn ɦidi.

³Farayna valam ka ŋolo: Fok-dimin birim siɗiya, lamgan birim ɦidi, luway-jufayn jub-jub' kis vasl, kuro ma boyn kis-vasl, sum sa sunumna ka ŋolo kaw. San kayni selem tiy ŋolo suw sum sa hay nagata kuɗuwta.

⁴Gurona valam ka tuɗ kuɗ tuwsi hay ziyna visiya visiya kay li yuldeta, nisi ka vul yit mi ɓosiyosi sa boyna sa ɦidina kaw kay co ti tin hiɗi nisiya.

⁵Hay li ma buura vi yuldeta vatawana, Job gi sunda kay gar gurona valam aya, nam porsiya, bugolda nam fok kulo graw culum culum, nam li ɗifin ma ŋal-goyna kay gige gige jarsi kafe, kay Job di'e: La li ŋalɗi, gurona van li suluku lebo nisi ka ŋul Lawna hay diksi klasige. Job ka li ki kayn nala dok-doko.

⁶Van li nala, hay buur kep gurona vi Lawna co'o vok ir Ma-Vatɗina, Satan kaw co jarsi zaw.

⁷Ma-Vatɗina di tam Satan: Naŋ may arige pa? Satan hot dit tam Ma-Vatɗina: Kay ŋuy yam nagata, kay poy haya'a kaw.

⁸Ma-Vatɗina di tam Satan: Naŋ wi Job sa ma sunda vanawa su? Sa ma ki nam nala may kay nagatɗi, kay namu mi sa ma gasiya, ɗigere kaw, kay nam li nar kuɗ Lawna, tun ɓalam tam jootɗi kaw.

⁹Satan hot dit tam Ma-Vatɗina: Job li nar kuɗaŋ kayni goy ɦawa'a su?

¹⁰Naŋ may ŋomomu hiɗi ziyna valamu hiɗi slena valam kaf ɗisu? Naŋ gi bolawa kay lopna vi ɓalamu, farayna valamu ka biya goy hay nagata kaw.

¹¹May meɗaŋ ɓaŋ goy tige, tunaŋ ɓaŋ tam slena valam kafe, nan wi goy haraŋ ala nam ma ŋulaŋu.

¹²Ma-Vatɗina di tam Satan: Humaŋu, slena valam kaf ka hay gaŋeraŋa vaŋu, may naŋ tun ɓaŋ talamɗi. Ki kayn nala Satan vi tuwam goy vok ir Ma-Vatɗina.

¹³Fat tara kep guro sa jufayna hiɗi guro sa boyna vi Job ka ti'e: Ka ci vinna kaw hay ziyna vi ɓasusi ma ŋolla,

¹⁴san kep mar Labara tam Job, nam dum ala, hay li ma luwayn ka goy zuma, kuron ka ti hat goy galamu kaw,

¹⁵sum sa Sabeen co kalamu, nisi vurumumu, ci sa sunda goy hiɗi kew-gaferaŋa kaw, piray goy kayni mi nan van kepe kay maraŋ labara.

¹⁶Hay li ma nam ka law tuwa, sa mara kep lo co'o di'e: Kuta vi Lawna nigay kulo dukalawn pa, farayna hiɗi sa sunda kaf na' ŋalsi goyo. Piray goy kayni mi nan van kepe kay maraŋ labara.

¹⁷Hay li ma nam ka law tuwa, sa mara kep co lo di'e: Sum sa Kaldeena hiɗi vokŋa visi kuɗ tuwam ɦidi, nisi co tukusi' kay lamgana, nisi yawamu, sa sunda nisi cisi goy hiɗi kew-gaferaŋa. Piray goy kayn mi nan kepe kay maraŋ labara.

¹⁸Hay li ma nam ka law tuwa, sa mara kep co'o di'e: Hay li ma gurona vaŋu sa jufayna hiɗi sa boyna ka ti'e hiɗi ci'e hay ziyna vi ɓasusi ŋolla;

¹⁹simeɗ ma ŋolla may hay galla vi fulda pa, nam wat tam gef-ziyn ma fiɗin pet; ziyda ɦo gaa kay gurona vaŋu, nisi mitiya may. Piray goyo mi nan van kepe kay maraŋ labara.

²⁰Ki kayn nala Job fok kulo'o, nam jet sligar-tuwna valam goyo, wel yalam goyo, bugolda nam gi tuwam gaa kay nagata, nam girif gaa'a,

²¹di'e: Goy nala'a, nan kali goy hay sun pa, nan ma hot ɗawni goy nala'a kaw. Ma-Vatɗina vul slenawa, Ma-Vatɗina hot yawamawa lo, suburta tam Ma-Vatɗina.

²²Hay slen kayni kaf, Job min li sulukɗi, nam min li law ma dab sem tam Lawnɗi kaw.