Read Masana JOB 12 Bible Online

JOB 12 - Masana bible

JOB 12

¹Job hot dita:

²hay gasita, ɗuw ki sa wuran kayn si nigi tuta nala, ki yalla mit ɗawn hiɗi nigi nala.

³Nan kaw, nan ka hiɗi yalla ŋray ca ki nigi nala. Nan may kiɗay goy katgiɗi. Slen ki lakŋi nala sa ma as kay wumɗi mi gige?

⁴Nanu mi sa ma boniyomna ka cen kuɗumu, hay li ma nam yi sem Lawna kay Lawna hotom dita; sa ma ɗigera, sa ma gasina, mi sa ma sumun cen kuɗumu.

⁵Sa ma vun lasta burahamu! Kayni ti varta vi sum sa ka lakay ŋal kiliŋ lakŋa; sa ma selem geɗ goyna nam fi burahta.

⁶Sum sa vurum slena vi sumuna ka lakay hay sle'ta, sum sa li joo kat Lawna ka lakay hay sle'ta kaw, sum sa kot lawayna visi hiɗi donota visi kay tuwsin kaw.

⁷May jobaŋ muuriyan tuwa tige, nam ma ɗekaŋ yali, jobaŋ layay ma dukalawna, nam ma pataŋ dir lawt goyo;

⁸varaŋ lawta vi nagat kaŋ tige, na' ma hataŋ yali; kuluf ma goloŋ hay niyn kaw ma vaŋ labara.

⁹Va ma ɗek ala kotom kaf kayn mi Lawna, san as wumɗi ɗawn witige?

¹⁰Ciwta vi slen ma irin kaf ka ŋomi hay ɓalamu, sukka vi sumun kaf hay ɓalamu kaw.

¹¹Humda may poŋ ir yoboynɗi su? Ki sinda jugo tin nala ɗisu?

¹²Yalda fa' vun sa maariyana, wida-yalla fa' kayni hay sa ma busata valam liy ŋolla.

¹³Yalla hiɗi donota ka kayni hay Lawna. Gatta hiɗi wida ka hay namu.

¹⁴La nam ɦo vanawa goyo, sa as inim kulo loɗi; la nam duk vun sanawa kalafi, sa as hom vunam goyɗi kaw.

¹⁵La nam cak niynawa, slen kaf so goyo, la nam malam vunamawa, nam to nagata.

¹⁶Donota hiɗi yalla talam namu, sa ma viy goyo hiɗi sa ma viy san goyo kaf ka hay ɓalam namu.

¹⁷Sum sa vul gatta nam narsi goy gorvo'o; nam viy lawt kir sa ka kitata,

¹⁸nam but kantin goy hay fur muliyana, nam junsi zigewn hay fursiya.

¹⁹Nam nar muliyan-sa-ɗifinna goy daŋgaya, muliyan sa lakay kiliŋ lakŋa nam ɦo mulda visi gaa'a.

²⁰Nam sli dit goy hay vun sum sa dita visi mu'ɗina; nam yaw yoboy ma poŋ ir lawta goy hay ɓam sa maariyana.

²¹Nam gi panta gaa kay sum sa donona; nam zoɓ kantina vi sum sa asayna,

²²slen ma hay zulla vi jufunda nam maram goy haraŋi, nam mar ŋus-mitta goy hay haraŋa.

²³Nam vul wulda mi jaf-sumuna, nam cisi goyo kaw; nam mer jaf-sumun goy hay liy ma ginena, nam as hotsiyaya kaw.

²⁴Nam yaw yalda goy hay ɓam sa ŋulona vi jaf-sumuna, nam hinsi viy goy hay fulda bay haga'a.

²⁵Nisi ka tupa hay jufunda bay haraŋa; nam hinsi viy goyo ki sum sa ɦoyayna nala.