Read Masana JOB 14 Bible Online

JOB 14 - Masana bible

JOB 14

¹Sa ma cat vuɗumna irita valam giɗeŋe, dok-dok nam ka hay hiwirta.

²Nam goɗ ki ɓona nala, bugolda nisi kaamis goyo. Nam fok jaŋi ki ɗuŋus-guna nala, may col noŋɗi.

³Naŋ iraŋ mali goy kayni kalam namu. Naŋ min ala nay ma tuɗ vun kitata kuɗ tuwaya.

⁴Ma as kay kal ma peldetnay goy hay va ma liwisna mi gige? Sa mayɗi.

⁵La kaŋ naŋu buura valam ŋaɓaya, ŋaɓta vi tilla valamu, la nam as jik goy kay gaslam ma naŋ kamnaɗi,

⁶nala muɗaŋ iraŋ goy talamu, hinim gi suk neɗe, kay nam ma fi firita ki sa ma busa he' li lop kay gurjuta nala.

⁷Gun hayɗini, cubta-sle'ta valam ka'a: la kaamawa goyo, nam hot goɗa, guro-gurona valam ma li dok-doko.

⁸La sutayn vi busay gaa kuɗ nagata, hay li ma nam mitiya kaw,

⁹nam hot goɗa hay li ma niyn ka co'o, nam hot goɗa ki gu ma goora nala.

¹⁰May san mita, donota valam vat goyo; sa wurana sukam sa'ata, nam ka ara loge?

¹¹Niy ma goloŋŋa as hot goy bugolomu, niy-lumna hot gaa'a, cap so goyo;

¹²ki kayn nala kaw san bur gaa'a, hot fok kulo noŋɗi, nam as zliy kuloɗi jew a dukalawna balaw goyo, nam as fok kulo hay senda valamɗi.

¹³Awa, la naŋ min ŋayanu hay zulla vi sa mitina, la naŋ min ŋayan goyo ta-ta ɦiyda vaŋ hot gaa'a, col vatta vi buura van zaw kay humaŋ ma gaŋ kanu.

¹⁴La bugol mitta san mus iri lo, nan ma mus hay cubta hay buura irita van kaf, ta-ta hay li ma mu'da van ma co'o.

¹⁵Hay na'ta naŋ ɗawn ma yanu, nan ɗawn ma hotaŋ dita may. Naŋ ma maka bugol lop ma naŋ lum hiɗi ɓaŋŋa.

¹⁶May wulini naŋ ka ŋaɓ sen ma tunna. Naŋ ma sar sulukŋa vanɗi su?

¹⁷Jiw-zlata vanu ka juni hay buhuna, naŋ ka var sulukŋa kanu,

¹⁸may hiɗiyn nig gaa'a mun goyo hiɗiyna jok goyo,

¹⁹niyn mun hiɗiyn goyo, niy ma vidikŋa ka yaw nagata; ki kayn nala kaw naŋ ba cubta-sle'ta vi sana.

²⁰Naŋ ka ŋuyum dok-doko, may nam kala; naŋ bulakam vokomu, bugolda naŋ gum iramu.

²¹Gurona valam yisi sliy kulo su? Nam wi vaɗi; yisi hotay gaa su? Nam may wi vaɗi kaw.

²²Nam ka ci lasta kayni hay sliw tuwamu. Ti ciwta valam kay tuwam kep ta ka hay do'olla.