Read Masana JOB 15 Bible Online

JOB 15 - Masana bible

JOB 15

¹Elifas ma Teman sli ditiya di'e:

²Sa ma yalla as hot dita hiɗi wida ta jar simeɗna su? Nam as bub war-digamu hiɗi simeɗ ma may gal kuɗuw pan su?

³Nam as gut kay tuwamu hiɗi yoboy ma waan su? Hiɗi yoboy ma gutɗina nala su?

⁴Naŋu, naŋ ka ɦo narta kuɗ Lawna gaa noŋo, varta ta vok Lawna naŋ ka yawa' goyo.

⁵Kay mige poŋaŋ vunaŋ kulo kayn ti jiw-zlata vaŋu, naŋ ka dum kayn mi dina vi sum sa milena.

⁶May mi nanɗi, may ka kitat kaŋ kayn mi vunaŋu. Tun lawt kaŋ kayn mi vunaŋu.

⁷Naŋ vuɗ jew sumun kafe su? Naŋ vuɗ gaa kay nagat jew hiɗiyn su?

⁸Naŋ hum ŋayayta vi Lawnawa su. Naŋ muɗ yaldawa goy ir vaŋu su?

⁹Va ma naŋ wum may numa wumɗin mi mige? Va ma naŋ humumu, may numa humumɗin mi mige?

¹⁰Sum sa hiɗi ɗuŋus haɓn ka jarma'a, sa maariyana, hobay hiɗi buura suw buŋu.

¹¹Yoboy ma teŋ-irta Lawna vul hay vunma'a, ma lumaɗna naŋ ɗuwum ki va goor ɦawa nala su?

¹²Kay dikaŋ ka zutaŋu, kay iraŋ ka ci mirik-mirik',

¹³kay naŋ muɗ ɦiyda vaŋ kayni kat Lawna, kuɗ na'ta vunaŋ ka di yoboyn ma ki kayn nala.

¹⁴Sana mi mige a nam li bay-liwisi? Sa ma cat vuɗumna li ɗiger litige?

¹⁵La Lawn may tun ŋalda valam kay sa peldetna valamɗi, la dukalawn may goy peldet vok iramɗi,

¹⁶sa ma liwisna as li joo vokom sem gaage? Sa ma ci jiw-zlata ki niyn nalana!

¹⁷Nan min daŋ caw lawta, naŋ humanu, nan min vaŋ labara kay va ma iran wumu.

¹⁸Va ma sum sa yalla dum goyna, va ma nisi may ŋayamɗi ma may goy vi sumaysi pa.

¹⁹Nagat ay vuli kayni misi nisi tuta, sa ma pul may kali jarsi noŋɗi.

²⁰Sa ma joona jik jar bonayta[3] hay buura vi irita valam kaf. Sa ma taŋgasna busata valam ŋaɓay ŋaɓ'.

²¹Winekŋa ma muɗ san nari suwa hay humamu. Sa ma ti ɓuraŋŋa co kalamu hay li ma toyta ka'a;

²²nam may var kay hulot goy vun jufundaɗi. Kew-gaferaŋa ka kaam vokomu;

²³nam tilar goyo kay gar tina, nam wi ala buura vi jufunda ka cubumu.

²⁴Nam ka vun-zlata hiɗi yorta dok-doko. Na' ŋuyumu ki mulla min mok sa gawta nala;

²⁵kay nam yaw ɓalam kulo'o kat Lawna, kay nam col dig ma Gaŋeraŋ-Petna.

²⁶Nam tos iramu kay jaŋ dur Lawna hiɗi marayta valamu ta ŋora' diɓilikka.

²⁷Iram kori hiɗi mula, zuroɓom goy bubiya;

²⁸may nam ma mus hay hoyok-ziy ma ɦoy gaana, hay ziy ma sa may musi hayamɗina, ma goboy ɦo gaana.

²⁹Nam ma muɗ faray loɗi, farayna valam ma hotay loɗi, jafna valam ma mer goy hay nagat loɗi.

³⁰Jaram ma ja goy hiɗi jufundaɗi, kuta ma ŋal gurona valam goyo, Lawn ma cum goyo hiɗi sukŋa vi vunamu.

³¹Nam ma tun ŋalda valamu kay sundaɗi, la naɗi nam ma ɗutum mi tuwamu. Kay sinda ma vulis talamu kay.

³²Van kayni vunam ma hob jew vatta vi buura valamu, ɓam gomona valamu ma goɗ loɗi.

³³Nam ma yak goyo ki vuɗna vi gulda-guldana yak goy hay li ma humam ka goɗay tuwa nala, ki gu-olivena nala, vuɗna valamu ma yak goyo.

³⁴Jafna vi sa ma liwisna ma geɗa, kuta ma ŋal ziyna vi sa ma haramna.

³⁵Ziy joot hayaŋu, kayni ŋray ca hiɗi vuɗ joota ta co kaŋu. Kayni ŋray ca ki nam ka ziy hayamu vuɗna vi ɗutta nala kaw.