Read Masana JOB 17 Bible Online

JOB 17 - Masana bible

JOB 17

¹Sukan ka vat goyo, buura van ka heba, zulda ka cubanu.

²Sum sa burahta say galan lakɗi su? Iran ka cuki ŋiresl kay ɗuw ŋulda visiya.

³Naŋ ma li mi sa ma deŋan kataŋŋa; sa hena ma deŋaŋ katalamna ɗawn mi gige?

⁴Kay naŋ duksi diksiyawa, a nisi poŋ ir law loɗi; lo naŋ ma hinsi kolɗi.

⁵Nisi ka yi boniyosina kay ɓuraw vocot jar-tuwsiya, may gurona visiya ka ɦilif goyo.

⁶Nam tunan kayni kay ti mul kay jaf-sumuna, may nan muɗi ki sa ma nisi tufum nenen kiramna nala.

⁷Iran muɗi jufunu kay guruɗ ma nam guruɗanna; ɓetna vi tuwan kaf muɗi guriya.

⁸Sum sa ɗigera muɗi ɦuyum', sa ma bay li joota fok kulo'o tam sa liwisna.

⁹Sa ma ɗigera mus ɗeŋe hay hagata valamu. Sa ma ɓalam bay tun tam joota muɗ dono suwa suwa.

¹⁰May nigi kaf, tungi caw mara'a lo, nigiyay yo. Nan ma fi sa ma yal jargiɗi.

¹¹Buura van kaliya, slen ma nan var kay lumu vatay goy ɦawa. Darta vi dikanu.

¹²Nisi ka niŋa ala henjeta ti falayta, ala haraŋa ka goboyo hay li ma jufunda ka'a.

¹³Wulini cubta-sle'ta van kayni mi liyna vi sa mitina tuta ɗisu? Nan kot liyn ma buura van ɗawni hay jufunda;

¹⁴nan siwel tam zul ma wiŋŋa ala: Naŋu mi bunu. Nan siwel tam jufulla ala: Naŋu mi sunu hiɗi ɓasunta.

¹⁵Cubta-sle'ta vanu, na' ka ara loge? Cubta-sle'ta vanu, sa ma as kay wa' mi gige?

¹⁶Na' ma jik gaa hay vun-galana vi zulla vi sa mitina. Hay li ma numa ma tap kuɗ tuwma'a kay tun-suk hay buɗufna.