Read Masana JOB 18 Bible Online

JOB 18 - Masana bible

JOB 18

¹Bildad ma Suwahŋa sli ditiya di'e:

²Ɓakŋa vaŋ kayni naŋ ma vatam lancitige? Faŋ yali, nala numa ma lawa.

³Numa ka ɗuwi ki muuriyan nala kay mige? Numa kiraŋ ki muuriyan ma ti hatna nala kay mige?

⁴Naŋu ma ka jet tuwaŋ goyo hay ɦiyda vaŋu, naŋ var ala nagata ma hinis goyo kuɗaŋ naŋ su? Hiɗiyna ma jok goy su?

⁵Awa, haraŋa vi sum sa joona ma tew goyo, kuta ta ka ŋal kulota ma ŋal loɗi.

⁶Caw guɗukŋa valam ma haraŋa ma muɗ jufunu, haraŋa valam ma kulo kalamna ma tew goyo.

⁷Batam ma ŋa goy jamna ma heb kulo'o; gatta valam kay tuwa'a ma pukum gaa'a.

⁸Kay nam cuk selemawa hay baaɗina, nam ka tuɗ jar ridana.

⁹Jawt vumawa hay dubukamu, zigewn ka slor kulo talamu;

¹⁰zigew ma vumna ka ŋayay gaa kuɗ nagata, Jawta ka hay hagata.

¹¹Narta ka wirim tuwamu hay galam kaf, ka digiɗim ŋoromu.

¹²Donota valam vatiya kay mayta. Lasta ka galam goboyo.

¹³Galla vi ɗigiyam loɗay goyo, ɓetna valamu muti kay gurona vi mitta sa vuɗi jewna.

¹⁴Nam yaway goyo hay guɗukŋa valamu ma nam tun ŋalda valam kalamna pa; nam ka sabis kat muliyan sa vul narta.

¹⁵Naŋ as mus hay guɗukŋa valamu, kay guɗuk namna may valam loɗi. Sufre* ka hoki kay ziyna valamu.

¹⁶So'olom ma gaan so goyo, humam ma kulon yak goyo.

¹⁷Selem ma tiyna ka vat goy kay nagata, selem may yi goy jiy loɗi.

¹⁸Nisi zutumiyawa hay haraŋa pa kalam hay jufunda, nisi gum iramawa goy hay nagat pa.

¹⁹Nam hin goor valam jar sumuna valamɗi, hin goor-ŋoloɗi kaw, sa mara may hin iri noŋɗi hay li ma nam musi hayna.

²⁰Jaf-sum sa min ma'a ma muɗ ɦuyum' kay ɓulak-goyta valamu, jaf-sum sa ka irsina ma li nar ŋolo.

²¹Ziyna vi sa ma bay-ɗigera nam ka ki kayn nala sa ma wi Lawnɗi musta valamu ka ki kayn nala.