Read Masana JOB 20 Bible Online

JOB 20 - Masana bible

JOB 20

¹Sofar ma Naama sli ditiya di'e:

²Varta vanu ka lan dono'o kay hot dita, kuɗ hiwira vanu.

³Nan hum law ma nigi lawanu ma muɗan zulo'o; sukka vi yalda vanu ma hot dita.

⁴Naŋ may wiɗi su? Ala hay liyn kaf kayni, tun caw tam buur ma san musi gaa kay nagat pa,

⁵kolda vi sa ma joon kayn na' giɗeŋe, firita vi sa ma liwisn kayn na' mus ta-taɗi.

⁶La fiyokka valam co ta-ta kulo wuralawn goŋ kaw, la yalam dab ta-ta kulo tam ɗugulla kaw,

⁷nam ma vatis goy ɗawni kay dok-doko, ki suɗoyom ɦawa nala, sum sa ay wumna ma di ala: nam ka arige?

⁸Nam ma sahis goyo ki duwayta ta daŋga ɦawa nala, sa as fum loɗi; nam ma digiɗiys goyo, ki va ma vul tuwam kiraŋ hay henjeta ɦawa nala;

⁹ir ma ay ɗuwumna ma ɗuwum loɗi, liyn ma nam ay musi hayna as fum loɗi.

¹⁰Sum sa hawna ma ɗub gurona valamu, sle ma nam yawam donona, nam ma hotom goyo.

¹¹Gilaŋamu ay hobay hiɗi donota hay joriyota valamu, may gilaŋam namna ma sileɗ gaa jar butuwna.

¹²Joot ay sleɗ helel' hay vunamu, nam ka coɗ joot hiɗi sinamu,

¹³la nam ŋoma'a ga' goyɗi, la nam ŋoma' gaa kuɗ sinamu,

¹⁴tina valam namna ma muɗ kalaf hayamu, nam ma muɗ hayam kalafi ki sinawna vi makayt nala.

¹⁵Nam lig faraynawa, may nam ma vinim goyo; Lawn ma yawam goy hayamu.

¹⁶Nam coɗ samna vi guy makayta, may sin tugulgulla ma cum goy mati.

¹⁷Nam ma cuk iramu kay ɗuw kay goloŋŋa hiɗi niy-lumna, hiɗi niy-ma-riŋ goyna vi yumda hiɗi mul miira loɗi.

¹⁸Slen ma nam fum hiɗi zumalda nam ma ligim gaa loɗi; slen ma nam fum kuɗ filiw ma nam lumna, nam ma sleɗ hayam hiɗi nam loɗi.

¹⁹Kay nam curoɗ sum sa hawna, nam taysi gaa'a, nam ɦo gaa'a ziyn ma nam as hot inim kulo loɗi,

²⁰nam may vi ŋalam tam garta vi faraynɗi, hay darta farayna valamu nam may hin va peŋ goy noŋɗi,

²¹va may ra goy kuɗ goslta valam noŋɗi; may musta ŋaata valamu ma mus ta-taɗi.

²²Goy jar asta valam pa nam ma kal vun-zlata; lop ma nam lumna kaf ma vulum sarta.

²³La nam hob hayam cep-cep' kaw, Lawn ma gi ɦiyda valam ta ŋolda gaa kalamu, ma hin ɓarawta si gaa kalamu, ɓarawta ma ɗik kuɗ sliwamu.

²⁴La nam pir jaŋi vok sle-ma-duura ma kawayna, ɓarawna ma wayna ma jikimu.

²⁵La nam pat ɓarawta goy kuɗ sliwamu, la nam pat kewta ta wileta goy hayamu, narta ma nig kalamu.

²⁶Jufunda kaf ka ŋomi kay cub farayna valamu, kuta san may jiwa' cawa' kuloɗita ma ŋalamu. Sle ma hin goy kuɗ guɗukŋa valamu ma ti goy ɓuraŋi.

²⁷Dukalawna ma pat dir joota valam goyo, nagata ma fok kulo kalamu.

²⁸Faray ma hay ziyna valamna ma tokis goyo, yawis goyo hay buur ma ɦiyda vi Lawna.

²⁹Kayni ti ir ɓurawta vi sa ma joona ta Lawna vul talamu. Kayni mi galla valamu ma Lawn vulumta kuɗ ɓakŋa valamu.