Read Masana JOB 22 Bible Online

JOB 22 - Masana bible

JOB 22

¹Elifas ma Teman sli ditiya di'e:

²Sana as nafa Lawna su? A'a, sa ma yalla nam as nafam mi tuwam namu.

³La naŋ ɗigere, ɗigerta vaŋ as sleɗ dik ma Gaŋeraŋ-Petna de su? La naŋ ka ɗigere hay hagata vaŋu, ma Gaŋeraŋ-Petna as fum kuɗ kayni mi mige?

⁴Nam wataŋ kayni kuɗ gasita vaŋ su? Kitat ka jaram hiɗi naŋ kayn kuɗ gasita vaŋ su?

⁵Joota vaŋu na' suwi ŋolo naɗi su? Raw-goyta vaŋu vuna' may dabɗi naɗi su?

⁶Kay naŋ yaw slen kay ɓosiyoŋŋa bay lawta, sum sa bay sligara naŋ hinsi goy nala'a;

⁷sa ma laat lumna naŋ may vulum niy ma ciɗi, sa ma mayt cumna naŋ min vulum va ma tiɗi.

⁸Nagat hini goy mi sa ma donona, sa ma subur tuwamna ka ti mul ka'a,

⁹boy sa duhulla naŋ ka gisi irsi goy hiɗi ɓisi ɦawa'a. Sum sa kuyuna gilaŋsi kusiya.

¹⁰Kuɗ na'ta kayni jawt slewaŋawa, narta baŋawa wulini wulini kaw.

¹¹Jufun na'ta kayni naŋ may wa'ɗi su? Niy ma kulfuti goyna ma min ɗubaŋŋa naŋ may wumɗi su?

¹²Lawna nam may kulo hay wuralawnɗi su? Ɗuwaŋ gineta vi mislekŋa; nam ka kulo gine'e natige.

¹³May naŋ di'e: Lawn wum mige? Nam as ka kitat jar jufunda su?

¹⁴Ɗugulla kayni mi va ma ŋayayna vok iramu, nam may wi va noŋɗi. Nam ŋuy kayn sin dukalawn ɦawa.

¹⁵Kayn mi gige? Naŋ min ŋom hagata jewta ta sum sa bay-ɗigera jik haya'ta su?

¹⁶Nisi ay doliya jew liyn bay co'o, so'olsi ma tuni gaana mi niy-ɓatna ma riŋa.

¹⁷Nisi di tam Lawn ala: Vaŋ tuwaŋ goy katma'a, ma Gaŋeraŋ-Petna as lum katma'a mi mige?

¹⁸May dolay kayni namu mi ma hob hay ziyna visiya hiɗi farayna, gatta vi sum sa joona vi tuwa' goy gine hiɗi nanu.

¹⁹Sum sa ɗigera, hay li ma irsi wumawa, diksi ma li firiya, sa ma tam jootɗina ma cen kuɗsiya;

²⁰sa ma fok kulo kayna vatawa goyo ɗisu? Kut ŋal fita valamawa ɗisu?

²¹Ŋraŋ vunaŋ hiɗi Lawna, nala naŋ ma fi sle'ta; hiɗi kayni, sle ma ir vaŋŋa ma li ŋaa'a.

²²Vaŋ gatta ta hay vunamta, tun yoboyna valamu hay dikaŋu.

²³La naŋ hotay kat ma Gaŋeraŋ-Petna, naŋ ma hot fi dono'o. Naŋ ma ja jar ziyna vaŋ goyo hiɗi jiw-zlata.

²⁴Gaŋ ora goy gaa hay butuwna, gaŋ ora ma hay Ofira goy jar goorhoyo ma goloŋŋa;

²⁵nala ma Gaŋeraŋ-Petna ma muɗ mi ora vaŋu, nam ma muɗ mi dooro ma tokayna,

²⁶nala ma Gaŋeraŋ-Petna ma muɗ ti firita vaŋ ta ŋolda, naŋ ma poŋ iraŋ kulo vok ir Lawna.

²⁷Naŋ ma yum selemu, nam ma humaŋu. Naŋ ma hob vun dita vaŋu.

²⁸La naŋ min li va'a, va namna vunam ma hoba; haraŋa ma wile hay hagata vaŋu.

²⁹La hot-yamda gaata coowa, naŋ ma siɗawa kay fok kulo lo, Lawn suɗ sa ma cok yalam gaana.

³⁰Sa ma joon noŋ kaw nam butum goyo. Sa ma as but tuwam goyo hiɗi ɓalam ma bay-gesna mi gige?