Read Masana JOB 24 Bible Online

JOB 24 - Masana bible

JOB 24

¹Ma Gaŋeraŋ-Petna may tun liyn mara goy valamɗi kay mige? Nisi sa wumna may wi buura valamɗi kay mige?

²Sumun jok jar-liyn goyo, sumun kul farayna, ŋomomu;

³nisi kal hiɗi kurona vi sa kuyuna, nisi deŋ luwayna vi boy sa duhulla;

⁴Sa ma kuyuna nisi calam goy hay hagata, sum sa maŋayna hay nagata nisi lisi dono'o kay nisi tuɗ ŋay goy yam tuwsiya.

⁵Ki kuro ma fulla ka goy hay fulda nala, nisi kal goy hay lopna hay ŋarpita kay gar tina, kay gar tin mi gurona visiya, nisi fa' kayn ti fulda ɦawa;

⁶goy hay fulda, nisi za hatna, nisi ja gulda-guldan mi sa ma joona,

⁷henjeta nisi kaf bur goy nala'a, bay sligar tisiya, borgon ma nisi baram tisi kay sleɗn mayɗi,

⁸nisi ŋuruɓi kay niy ma tam hiɗiyna, liyn ma nisi ŋay hayam mayɗi, nisi mok hiɗiyn hiɗi ɓisiya.

⁹Sa ma hawna nisi hulotom goy hiɗi dono'o, nisi deŋ slen hay ɓam sum sa hay lasta.

¹⁰Nisi kaf ka goy nala'a, bay sligari, mayt ka lisiya, hay li ma nisi ka ziy yam wana.

¹¹Nisi ka kesl mula kalaf dik gulmunna, nisi ka kesl gulda-guldana hiɗi laata;

¹²goy hay hoyok-ziyn pa sum sa vun mitta tiyta visi ka pat kulo'o, sum sa tuwsi kaay goyna ka pat tiyna. may lasta ta ŋol ki kayn nalata Lawn may tun ŋalam ka'ɗi.

¹³Segena tap tuwsi hiɗi sa ka gaw hiɗi haraŋa, nisi may poŋ ir hagata valamɗi, nisi may lak hay hagata valamɗi.

¹⁴Sa ma ci matna fok kulo'o hay li ma haraŋa vul tuwamawa, nam ci goyo sa ma ka hay sarta hiɗi sa ma hawna, henjeta nam muɗi ki sa ma kulla nala.

¹⁵Sa ma zlata-bulona iram ka cuki kay cigeɗ liyn ma jufunna; sa as wanɗi, nam di ki kayn nala, nam ɗut yalam tep-tep'.

¹⁶Hay jufunda, nisi co ziyna, hay falayta nisi duk vunsi kalafi. Nisi may wi haraŋaɗi.

¹⁷Liyn ma graw culumna kirsi ki ŋus-mitta nala,

¹⁸Mi gige! Sa ma liwisna nam dol kulo kay niyna, galla valam ma gaa kay nagatna ti be'da-goyta, nam as tun iram hay hagata vi gulda-guldanɗi.

¹⁹Ki koɓorona hiɗi zalla ɦilay niy ma ɓalay tam tuwamna goy nala, sa ma li sulukŋa kaw, liyna vi mitta as dolom ki kayn nala.

²⁰Na'a ta vulumta ya' ma jokomu, jufulla hayam ma sleɗ hiɗi namu, hum sa as gum kalam loɗi. Jiw-zlata ma kusis goyo ki guna nala.

²¹Cata ta getayta ta goor mayɗita nam foka' goy nala'a. Cata duhulta nam may la' ŋaaɗi.

²²A'a, Lawna hiɗi donota valamu, ka ɦur buura vi sum sa ɦawlana, nisi hot col kulo lo hay li ma nisi may var kay irita visiɗi;

²³nam ŋomsiya, nisi deŋ tuwsi tam ŋomda valamu, may iram ka cuki kay poyta visiya.

²⁴Nisi sli yisiyawa kulo'o; hay liyn neeɗa ɦawa nisi may loɗi, nisi puk gaa'a, nisi co tam dabta visiya ki sumun ka nala, nisi kaay goyo ki yam wana nala.

²⁵La may ki kayn naɗi, sa ma as ci way hiɗi nanu mi gige? Sa ma as vat ɓakŋa van goy ɦawa'a mi gige?