Read Masana JOB 27 Bible Online

JOB 27 - Masana bible

JOB 27

¹Job tun caw ɓak mara lo nam di'e:

²Lawna ma noy gasita van goyna ka iriya. Ma Gaŋeraŋ-Petna hob ciwta vanawa hiɗi galakka.

³Hay li ma nan ka gi suk dok-doko tuwa, hay li ma sukka vi Lawna ka hayan tuwa,

⁴vunan as di law ma bay-ɗigeraɗi, sinan as purat goy hay law ma guniɗi.

⁵Gine hiɗi nanu varta kay di ala lawta vigi hay liya'a. Nan as raw goyɗi ta-ta sukan kal goyo.

⁶Nan coli kay ɗigerta vanu, nan as muɗ maŋayɗi. Buura vi irita van kaf, nan may yor tuwan kay mara kep jaram noŋɗi.

⁷Hin sa ma gaw kanna muɗ ki sa ma joon nala, hin sa ma fok kulo kanna muɗ ki sa ma bay-ɗigera nala.

⁸Sa ma liwisna cubta-sle'ta ta hini kuɗumta ti tarige? Hay li ma buura valam ma kay nagatna dabawa, hay li ma Lawn yaw irita valamawa goyo?

⁹Lawna as hum tiyta valamu su? Hay li ma lasta coowa kalamu?

¹⁰Ma Gaŋeraŋ-Petna as sleɗem hayam su? Nam as sem Lawn hay liyn kaf su?

¹¹Nan min ɗekgi kay gaŋeraŋa vi Lawna, nan min ŋay varta vi ma Gaŋeraŋ-Petna kigiɗi.

¹²May nigi kaf, nigi wum goy ŋaa'a ŋolo; may nigi hin tuwgi kal hay law ma waana kay mige?

¹³Kayni mi galla vi sa ma joona ma Lawn ŋomomtina, vocota ta sa ma ɦawlana fa' hay ɓam ma Gaŋeraŋ-Petna;

¹⁴la nam ka hiɗi guron ŋolo, kayni kay kew-gaferaŋa, jafna valamu as hob hiɗi funɗi;

¹⁵sa hin goy kuɗumna mitta ma pisi gaa'a, boyna visi sa duhulla ma tiysi loɗi.

¹⁶La nisi tok gurjuta ki butuwn nala, la nisi mol sligar yam tuwam ki naga-gusloɓina nala kaw,

¹⁷namu mi ma molomna, may sa ma ɗigera mi ma cukum talamna, ma yaw gurjut ɗawn mi sa ma ɗigera.

¹⁸Nam in ziyna valamawa ki ziyna vi tenɗena nala, ki sa ma ŋomda pi balakŋa nala.

¹⁹Nam bur gaa faraya, may nisi ma pum ɗawn ki kayn naɗi; nam mal iram goyo, may iram wi vaɗi.

²⁰Narta nig kalamu ki niyna nala, ɦiwliŋŋa slum goyo hay henjeta.

²¹Simeɗ ma kuɗuw pana dolomu, nam kaliya kaw; simeɗn slum goy hiɗi dono'o hay liyn ma nam ka hayna pa.

²²Nisi gum hiɗi ɓarawta bay kir-hawta, nam as pir jaŋi kay ŋay kisiya.

²³Nisi ci ɓisi kuɗum kuɗulu' kuɗulu', nisi feɗ kuɗum kuy-kuy'.