Read Masana JOB 28 Bible Online

JOB 28 - Masana bible

JOB 28

¹Liyn ma jugoɗ doorot hayamna ka'a, liyn ma gar ora hayna ka kaw;

²kawayna fumay goy hay nagan pa, hiɗiy ma yorayna muɗ goy wayna.

³San vat jufunda goyo; nam feka, ta-ta hay liyn ma zul ŋolla, (nam fek) hiɗiy ma ŋayay hay jufunda hiɗi ŋus-mitta.

⁴Nam co zulla goy gine hiɗi ziyna, hay liyn ma sa co gut kuɗum noŋɗi, nisi gaɓay kulo'o, ka ɦiwel goy gine'e hiɗi sumuna.

⁵Nagata ta tin may goy haya' pata, haya' ma kalafna ɦoy gaa'a ki hiɗi kuta nala.

⁶hiɗiyna va' kayni mi liyn ma fi Safir haya, hiɗi ora kaw.

⁷Layayn ma gar tina may wi hagatɗi, ir kulo-kulona nay wumɗi.

⁸Muur ma siyna may tayam gaaɗi, Zlona may jik hay liy namna noŋɗi.

⁹San yaw hiɗiy ma ɗeŋŋa, nam jugoɗ hiɗiyn gaa so'olomu, kusum gaa'a.

¹⁰Nam jugoɗ zulla jar hiɗiyna, iram as cuk kay sle ma ŋaan kafe;

¹¹nam tel jaŋŋa vi niyna, sle ma ŋayayna nam maram goy hay haraŋa.

¹²May yalda, na' ka buri arige? Liyn ma musta vi wida-yalla ka arige?

¹³Sana may wi gusta va'ɗi; Na'a may hay nagata vi sum sa irinɗi.

¹⁴Zul ma wiŋŋa di'e: Na' may hay nanɗi, niy-lum ma ŋolla di'e: Na' may hiɗi nan noŋɗi.

¹⁵Sa as vul or ma bay-rigasna hay baŋala'ɗi. Sa as ŋaɓ gurjut goyo kay gusa'ɗi;

¹⁶as ŋra nekka va' hiɗi or ma hay Ofir noŋɗi, hiɗi hiɗiyn oniks noŋɗi, hiɗi hiɗiyn safir noŋɗi kaw;

¹⁷ora hiɗi gasasna as ŋra hiɗi na'ɗi, sa as muɗa' hiɗi doway ora ma yorinɗi kaw.

¹⁸Komona* hiɗi kristal* sa as yum selem kulo noŋɗi; naŋ ka hiɗi yalda kayni, na' suw kermena.

¹⁹hiɗiyna topaz ma hay Etiopiya as ŋra hiɗi na'ɗi, sa as ŋra nekka va' gaa dig or ma bay-rigasnɗi.

²⁰Nala, yalda may arige pa? Liyn ma musta vi wida-yalla ka arige?

²¹Na' ka ŋayay kir sum sa irin kafe. Na' ka ŋayay kir layayn ma dukalawna.

²²Zul ma wiŋŋa vi ba-goyta hiɗi mitta di'e: Humma' humi kay kayni.

²³Wi hagat na'ta mi Lawna, namu mi ma wi liyn ma musta va'a.

²⁴Kay namu mi ma ɗuw ta-ta hay vun dabaŋ-gu'ta vi nagata; nam wi sle ma gaa kuɗ dukalawna kafe.

²⁵Hay li ma nam ŋra nekka vi simeɗna, hay li ma nam ŋra ŋaɓta vi niyna,

²⁶hay li ma nam tun gatta kay niyna ma sina, hay li ma nam ɓir hagata mi wileta hiɗi niy-ma-bayna,

²⁷Hay na'ta nam wi yalda, nam ɗeka' goyo, nam in sem yalda gaa'a, feka'a kaw ta-ta gaa so'ola'a.

²⁸Bugolda nam di tam sana: Narta kuɗ Bum-Sumuna kayni ti yalda.[6] Ja jaraŋ goy hiɗi joota kayni ti wida-yalla.