Read Masana JOB 29 Bible Online

JOB 29 - Masana bible

JOB 29

¹Job tun caw ɓak mara lo, nam di'e:

²Hih! Nan hot hay tilla van ma jewn hotge. Ki hay buur ma Lawn ay ŋoman nala hotge.

³Hay li ma nam ka hin fitilla valam ŋal kulo kanu, hay li ma haraŋa valamu ka gutanu kay jik hay jufunda.

⁴Ki hay buur ma nan ay hiɗi donota van nala, hay li ma Lawn ay ŋom ziyna vanu ki bananna nala.

⁵Hay li ma ma Gaŋeraŋ-Petna ay hiɗi nan tuwa, hay li ma guro-joriyona vanu ay ŋuyan tuwa;

⁶hay li ma sen ay lugut gaa hay mula tuwa, hay li ma hiɗiyna ka riŋ mula goy galan tuwana.

⁷Hay li ma nan ka kal goyo kay tuɗ mus goy hay vun-galana vi hoyok-ziyna, hay li ma nisi ka kotan liyn ma musta goy hay farana,

⁸guro sa joriyon irsi cuk kan kayn vi tuwsi goy de', sum sa maariyan fok kulo'o, lak kulo kay sesiya.

⁹Sum sa yerimana zan ɓakŋa visiya, tun ɓisi kuɗ dumsiya;

¹⁰sa ŋulona vi sumuna ba vunsiya, sinsi slraɓ kulo kuɗ narɗaksiya.

¹¹Sum sa humanna ka gan bolo, sum sa ka ɗuwanna ka li di-goyt kanu;

¹²kay mige sum sa hay hawta sa job gutda nan ka butsi goyo, sum sa kuyuna sa may fi gutda hay ɓam saɗin kaw.

¹³Sa ma min mit goyna bolda valam may goy hayan nan pa; boy sa duhulla nan ka hobsi haysi hiɗi firita.

¹⁴ɗigerta ka cuki tanu ki sligara nala. Gasita vanu cuki tanu ki sligar-tuwna hiɗi katamulla nala.

¹⁵Nan ay mi ir sum sa dukina, nan ay mi sem sum sa dirlayna kaw.

¹⁶Nan ay mi bum sum sa hawna, nan sar lawta vi sum sa pulla.

¹⁷Sum sa bay-ɗigera nan hawsi gaŋsi goyo, nan hulot sle ma tin goy hay vunsiya.

¹⁸Hay na'ta nan ka di'e: Nan ma hot goɗ mara wuli lo, nan ma fi buur ŋolo ki ŋesl ma goloŋŋa nala;

¹⁹sutiyan ma cuk gaa hay niyna, ki gu ma maɗayn bur kulo humamna nala;

²⁰gajijita vanu ma hot muɗ wuliya hayan kalafi, diŋ-diŋ ɓarawta vanu ma hot fi dono'o hay ɓanu.

²¹Nisi ay humanu, nisi ay lak hay cubta. Nisi ay lak ŋal kiliŋ kay hum gatta vanu.

²²Bugol dita vanu, sa mara as gulut noŋɗi, ɓakŋa vanu ka mer goy kisi nisi kafe;

²³nisi ay zaman ɓanu ki sumun zam niyna nala. Nisi mal vunsi goy (kuɗanu) ki sumun zam niy ma cayda nala.

²⁴Nan censi kaw nisi may vi kaynɗi. Haraŋa ma hay vokanna nisi as a vatam goyɗi.

²⁵Nan vilek kay tuɗ hiɗi nisiya, nan tun voksiya. Nan musi ki mulla nala.