Read Masana JOB 30 Bible Online

JOB 30 - Masana bible

JOB 30

¹Wulin kayni!. Nisi sa joriyo suwan nanu ka cen kuɗanu, nisi sa sumaysi ay kiran bis ŋolo, sa sumaysi ay tapay jar durnayna ma hay farana vanu.

²Wulin kayni donota vi ɓisiya gutanawa hay mige? Nisi may nagay kay vi busayɗi.

³Nisi ŋoliya kay kiɗata hiɗi birim-hayta, nisi pir goyo hay liyn ma soy goyna, liyn ma ay hosay goy jew ɓa-ɓa, ma hini goyna.

⁴Nisi rat us ma fulla ma tam gu-zigiyna, tina visiya mi zanina may.

⁵Sumun digiɗsi goy jarsiya, sumun ciriy kuɗsi ki kuɗ kuliyan nala,

⁶kay nisi ma ŋay goy hay zul ma liwisna, ma niyn jugoɗomna, hay zul ma gaa kuɗ nagata hiɗi zul hiɗiyna;

⁷nisi tuɗ ci gorslomo jar gu-zigiyna, nisi mol gaa kuɗ us ma joona,

⁸sum sa waa ɗaara sa sesi may yi noŋɗina, nisi digiɗiy goy hay nagata pa.

⁹May wulin kayni nan muɗi mi va ma nisi gi nul hiɗi namu, nan muɗi va ma gi junna visiya.

¹⁰Nan muɗi kirsi liwisi, nisi vi tuwsi goy katanu may. Tuwsi may wirsi kay cireɗen nenen kulo kiranɗi.

¹¹Kay (Lawn) patan diranawa goyo, hotan yanawa gaa'a kaw, kuɗ kayni nisi min vi ŋalsi tan loɗi.

¹²Sum nisina sa hay hawta fok kulo'o hay galan ma jufna, zutan gayanu, nisi kot hagata ta gunita kanu;

¹³nisi lak hay hagata vanu, li lopo kay ban goyo kaw, nisi sa sa ay gutsi noŋɗina.

¹⁴Nisi co'o ki hay baŋa ma ŋolla nala, nisi jaŋ jar liyn ma ɦoy gaana.

¹⁵ɦuyumda muɗawa kanu, mulda vanu simeɗn dolo'awa, su'da vanu capawa ki ɗugul nala.

¹⁶Wulin kayni, irita vanu ɦoowa gaa'a, buura vi lasta ŋuyanawa.

¹⁷Henjeta ka con zokanu hayan kalafi, zumalda ta ka hiwiranta may bur gaaɗi.

¹⁸Kuɗ donota vi moyna, sligara vanu jafam muɗi valamu, nam huɓoŋ kulo tanu ki sligar-tuwna van nala.

¹⁹Lawn ligatanawa gaa jar nagana, nan muɗi ki butuwna hiɗi butuw-kun nala.

²⁰Nan yaŋu kay naŋ co gut kanu, may naŋ min hot ditɗi. Nan col kulo'o, kay naŋ tun ŋalda vaŋ kanu.

²¹Naŋ muɗi mi sa ma can mati, naŋ min duranu hiɗi donota vi ɓaŋu.

²²Naŋ poŋanawa kulo'o, naŋ ɦiwelanawa kulo jar simeɗna, naŋ sehanawa goy jar simeɗna.

²³Kay nan wi'e, naŋ ka naran hay mitta, hay liyn ma sum sa irin fi tuwsi hayam kafna.

²⁴May nam ma min mitna as meɗ ɓalam goyɗi su? Nam ma ka vun lasta as job gutdaɗi su?

²⁵Nan kaw zimiyn may cuk kiranu, kuɗ sum sa irita visi ay lop ŋolla ɗisu? Ciwta van ay yora kuɗ sa ma hawna ɗisu?

²⁶Kay nan ka cub ɓam ŋaata, may joota maawa; nan ay cub haraŋa, may jufunda maawa.

²⁷Dikan ka wisik dok-doko, buura vi lasta coowa kanu,

²⁸nan tuɗ kayni ɓoy haɓi, may ɓon haɓ kayn ti fattaɗi, nan fok kulo hay tokŋa, nan siwela.

²⁹Nan muɗi mi ɓasum cekemna, sa ma poy hiɗi rigetna kaw,

³⁰Ɗigiyan ɓoy haɓ pulvaŋ', zokan ŋalay goyo kay moyna,

³¹dilla van gum mi nul ma yorta tuta, Difna van buw kayni hay della vi sum sa tiyna tuta.