Read Masana JOB 32 Bible Online

JOB 32 - Masana bible

JOB 32

¹Sum nisi sa ɦidina hin ɓakŋa visi ma tam Jobna, kay nam ka sar tuwam ɗigere.

²Ki kayn nala Elihu goora vi Barakeel ma Buzna, ma hay jafna vi Ram, nam muɗ ɦiy ŋolo kat Job, kay Job di ala nam ɗigere vok Lawna.

³Nam muɗ ɦiya kat boniyom sa ɦidina, kay nisi may fi va ma hot ditɗi, lo, nisi ka kitat kay Job.

⁴Kay nisi segena si sa ŋulona vi Elihu, nala nam cub bugolo kay law hiɗi Job.

⁵May hay li ma Elihu wi ala sum sa ɦidin lakŋi va ma hot dit hiɗi nam may loɗi, nam muɗ ɦiy ŋolo.

⁶Elihu goora vi Barakeel ma Buzna sli ditiya di'e: Nan mi ma goora, nigi si sum sa maariya'a; kuɗ na'ta kayni tuwan ka wiranu, nan li nari kay ɗek wida van goyo.

⁷Nan ka di ala: Busata ta kali ŋolda ma law kay tuwa'a, busata ŋol dak-dakka ma ɗek varta goyo.

⁸May hay gasita, hay san kayni, vulum wida-yalla ti ŋusta hiɗi sukŋa vi ma Gaŋeraŋ-Petna.

⁹Busata ta ŋol dak-dakka may vul yal kafɗi. Poŋ ir lawt kayn may si sum sa maariyan tutaɗi.

¹⁰Kuɗ na'ta kayni nan di'e: Naŋ humanu, nan min ɗek wida van goyo.

¹¹Nan cubum kayn mi vatna vi yoboyna vigiya, nan jak human tam dita vigiya, ta-ta nigi fek lawta valam gaa zul tuwa.

¹²Nan tun ŋalda van kigi kafe, may sa kuɗgi kep kaw lawta valam may vi Job noŋɗi, sa may hot dit kuɗ ɓakŋa valam noŋɗi.

¹³May nigi ma di ala numa fi yalda hayamuɗi, vat lawta vi Job goy kayn mi Lawna, may mi saɗi.

¹⁴Nam may ɓak tan nan kay tuwanɗi, kuɗ na'ta kayni nan min hot dit talam hiɗi yoboyna vigiɗi.

¹⁵Nisi muɗi nari, nisi may hot dit loɗi, va ma nisi di'e may loɗi.

¹⁶Nan cubiya, may nisi may law loɗi, kay nisi ba vunsiyawa, kay nisi may hot dit loɗi,

¹⁷liyn coowa kan yo, kay nan kaw ma hot dita, nan kaw min ɗek wida van goyo.

¹⁸Kay nan ka hobi hiɗi ɓakŋa, ŋusta ka zutanu hay dikan kalafi;

¹⁹Humgiya, dikan kalafi muɗi ki vinna ma san min keslemu nala, ki tiliyn ma wuliya ma min mun goyo nala.

²⁰Nan min lawa kay gi suk goy ŋaa'a, nan ma mal vunan goyo, nan ma hot dita,

²¹nan ma poŋ ir sa noŋɗi, nan as kay ɗut sa-wuraɗi,

²²kay nan may wi ɗuttaɗi, la nan ɗuta, ma kotanna ma slanis goy koloyo.