Read Masana JOB 33 Bible Online

JOB 33 - Masana bible

JOB 33

¹Wulin kayni, Job, humaŋ ɓakŋa vanu, tunaŋ humaŋ tam dita van noŋ kafe.

²Wulin kayni nan ka mal vunan goyo; vunan ma lawa.

³Nan law ɗawni hiɗi ɗigerta vi dikanu. Vunan ma da' ɗawni ti wida ta bay-rigasta.

⁴Ŋusta vi Lawna kotanawa, sukŋa vi ma gaŋeraŋ-petna ŋomanawa iriya,

⁵la naŋ as kay li kayni, naŋ hotan ditiya, colaŋ goy vok iran ŋaa'a.

⁶Vok Lawna, nan ki naŋ nala kaw, nan kaw, nan koti hiɗi naga-dirginna lay;

⁷kuɗ na'ta kayni narta kuɗanta as muɗaŋ ɦuyumɗi, gaŋeraŋa vanu as toŋ sutiyaŋɗi.

⁸May naŋ law hay humanu, nan hum dita vaŋu kaw, naŋ di ala:

⁹Nan peldete, nan bay-suluku, nan asiya, jiw-zlata may hay dikan noŋɗi.

¹⁰Lawn garanu kay ka gaw hiɗi nanu, nam ka lan ki sa ma gawta valam nala;

¹¹nam cukan sen hay dirlana, nam ka giy kuɗanu kay ŋomanu.

¹²Naŋ hotaŋ dit ala hiɗi kayni naŋ may di hay liyamɗi, kay Lawna nam ŋolo suw sana.

¹³Lebo naŋ min ci way hiɗi nam su? Kuɗ ta ala lopna valamu nam may slum selemɗit su?

¹⁴May Lawn ka lawa, nam law hiɗi yal mara'a, hot law hiɗi law mara'a, may san may jak humam kay kaynɗi.

¹⁵Nam law hay duwayta, hay sle ma vul tuwam kiraŋ hay henjeta, hay li ma sumun ka hay senda ŋolda, hay li ma nisi ka buri gaa hay va ma buura visiya.

¹⁶Nala nam vulsi ɗekka, tun soona kay hatta valamu,

¹⁷kay san ma cal goy hiɗi joota, kay san ma ŋom tuwam kay subur-tuwta.

¹⁸Kay ŋom ciwta vi san kay zulla, kay suɗ irita vi san goy vun kew-gaferaŋa.

¹⁹hiɗi tuw-tita san fi watta gaa hay liy ma buura valamu, hay li ma ŋafta ta vatɗita co'o geɗem zokomu.

²⁰Nala fun muɗ kiram bisi, tin ma ŋaan noŋ kaw;

²¹sliwam sota cap vat goyo, zokŋa valam ma san wumɗina hin goy nala'a;

²²ciwta valamu co vun zulla, irita valamu hin hay ɓam sa vul mitta.

²³May lali sunda-wuralawna ma job Lawn kalamu ka kepe, la kep ɦawa jar kis kaw, sunda-wuralawna ma ɗek sana kay lopna valamu,

²⁴Nala nam ma lum slugota, ma di ala: But san kayn goyo, kay nam ma jik gaa hay zul ma ŋollaɗi; nam fi yal ma vulum gidawa.

²⁵Sliwam hot goɗ wuli ki hay joriyota valamu nala, nam hot ki hay buur ma nam ay goor-joriyo tuwa.

²⁶Nam as li siɗawta valamu tam Lawna ma as lum slugota, nam wi vokomu hiɗi siwelda vi firita. Lawna vul mi sana kuɗ ɗigerta valamu.

²⁷Nam gi nul vok sumuna nam di'e: Nan li sulukawa, nan slugut law ta ɗigertawa, nan may fi watta ŋray dig sle ma nan lumnaɗi.

²⁸Lawn but ciwta vanawa goyo, kay na' ma kal gaa hay zul ma ŋollaɗi, nan ma wi haraŋa sem mara lo.

²⁹Kayni mi slen ma Lawn lumna kaf, sem ma', sem ɦidi tam sana.

³⁰Kay hulot ciwta valamu goy vun zul ma ŋolla, kay fom tuwam goyo hiɗi haraŋa vi sa irina.

³¹Musaŋ kiliŋ Job, humanu, ɓak ɗawn mi nanu,

³²la naŋ ka hiɗi va'a kay di'e: Hotan ditiya. Daŋiya, kay nan min di gasit kaŋu.

³³La may naɗi, naŋ hayɗin humanu, baŋ vunaŋu, kay nan min hataŋ yalda.