Read Masana JOB 34 Bible Online

JOB 34 - Masana bible

JOB 34

¹Elihu sli ditiya di'e:

²Nigi sa yalla, humgi dita vanu, nigi sa ka hiɗi wida, jakgi humgi tanu.

³Kay humda poŋ ir lawta, ki sinda jugo tin nala kaw.

⁴Nay ma vilek gasita kay naya, nay ma wi goy jaraya kay sle ma ŋaana.

⁵Job di'e: nan li jooɗi, may Lawn yaw ɗigerta vanawa goyo;

⁶hiɗi ɗigerta van pet nan muɗi mi sa ma sinda; mil ma citɗin tan kayn ɦawa'a, bay nan li suluku.

⁷Sa ma ki Job nala ka su? Burahta kiram ki niy ma cin nala,

⁸tuɗ kuɗ tuwsi hiɗi sum sa li bay-ɗigerta, poy kuɗ tuwsi hiɗi sum sa joona,

⁹Kay nam di ala: a san tun minda valam kay Lawn kayn mi mak tuw ɦawa.

¹⁰Wulin kayn nigi humanu, nigi sa ka hiɗi varta ta ŋaata, Lawna may min joot noŋɗi, Lawna may min bay-ɗigerta noŋɗi.

¹¹Nam vul mi sa-wurana kuɗ lopna valamu, nam wurak gigekaw kuɗ hagata valamu valamu.

¹²A'a, gasiya, Lawna may min jootɗi. Ma Gaŋeraŋ-Petna may min ala gasit ma tayis gaa'aɗi.

¹³Sa ma vulum hagat kay ŋom nagata mi gige? Sa ma vulum nagat kaf hay ɓalamu mi gige?

¹⁴La nam var kayn kay tuwam toŋ', la nam hot ŋusta valamu hiɗi sukka valam talamu,

¹⁵sumun kaf ma mitis ɗawn goy vun tuwsi kirɓicik', san hot ɗawn hay nagana.

¹⁶La naŋ ka hiɗi yalda, humaŋ kayni, jakaŋ humaŋ tam ɓakŋa vanu.

¹⁷Sa ma ka gaw hiɗi ɗigerta as ti mul gasi su? Naŋ as kay tun kitat kay sa ma ɗigera, ma gaŋeraŋa su?

¹⁸San as di tam mulla ala naŋ wi vaɗi su? San as di tam sa hay jaf mulda ala nigi joo su?

¹⁹May Lawn hayɗin wi sa ma yerimaɗi, nam may poŋ ir sa ma farayn goy hiɗi sa ma hawnɗi, kay nisi kaf kayni si sa nam kotsina.

²⁰Hay liyn neeɗa ɦawa nisi mita, hay henje ta kepta ɦawa, jaf-sum sa kepn geɗiya, nisi cima; sa ma donon vatis goy ɦawa bay mak-tuwta.

²¹Kay Lawna iram ka cuki kay ɗuw poyta vi sumuna, nam ɗuw sem san ma tunna kafe.

²²Jufunda hiɗi ŋus-mitta ta sum sa li jiw-zlata ŋay haya tayɗi.

²³Lawn may gar a tun ŋalda valam goy kay san ta-taɗi, jew a nam ka kitat jaram hiɗi sana.

²⁴Nam kus sum sa donon goyo bay job caw lawta, nam tun sum sara'a hay baŋalsiya;

²⁵kay nam poŋ ir lopna visiya, nam cuksi gaa'a hay henjeta, nala nisi kirapis goyo;

²⁶nam cisiya ki sum sa joona nala, hay liyn ma sa as kay wisiya.

²⁷Kay mige nisi ja jarsi goy hiɗi namu, kay nisi may wi yali kay poŋ ir hagata valam kafɗi.

²⁸Kay sa ma hawna nisi hin tiyta valam co ta-ta kulo tam Lawna, nam humi tiyta vi sa ma vun lasta.

²⁹La nam vul tun-sukka, sa ma ka kitat ɗawni mi gige? La nam ŋay iram goyo, sa ma as kay ɗuwum ɗawni mi gige? Nam ka kitat kay san ŋray ca hiɗi jaf-sumuna;

³⁰kay sa ma haramna ma ti muldaɗi, kay nam ma lin ti jawta ta vok sumunɗi,

³¹kay la san di tam Lawna ala: Nan ziy zumalda vanawa, nan min li joo loɗi;

³²ɗekan kay va ma nan may wumɗina, la nan li bay-ɗigertawa, nan hot la' loɗi!

³³Varta vaŋ ala Lawn ma vul wurakŋa su? Kay naŋ wi dit kaynɗi, li vilekka mi naŋu, may mi nanɗi, va ma naŋ wumna, naŋ ma di goy kalamu.

³⁴Sum sa hiɗi ŋalda visi tisina ma di tanu, ŋray ca hiɗi sa ma yalla ma ka humanu:

³⁵Job law kayn bay wida, dita valamu ira' may poŋayɗi.

³⁶Hin Job fi wakka voko voko, kay nam ka hot dit ki sum sa bay-ɗigera ka li nala.

³⁷Kay nam ka tap suluk ma ŋolo tam joota nam la'ta: Nam ka ci ɓalam til' til' jaraya, nam ka jor ɓakŋa valam voko kat Lawna.