Read Masana JOB 36 Bible Online

JOB 36 - Masana bible

JOB 36

¹Elihu tuɗ vok hiɗi dita di'e:

²cubaŋ neeɗa nan min daŋ caw lawta. Nan min di law mara'a kay gut kuɗ Lawna lo.

³Nan ma yaw wida van ay goy gine'e pa, nan ma di ɗigerta kay nam ma kotanna.

⁴Kay, hay gasita, dita vanu mayn ti ɗuttaɗi, musi hiɗi naŋ damni mi sa ma gasiya hay wida valamu.

⁵Lawn dono'o, nam may noy sa goyɗi; nam dono'o hiɗi gaŋeraŋa vi wida-yalla valamu.

⁶Nam hin sa ma joona mus iriɗi, nam gut kuɗ sum sa hay sarta.

⁷Nam may muɗ iram goy gine'e hiɗi sa ma ɗigeraɗi, nam mus muliyan kay zlamda-mulda. Nam musi kay mulda kayn kay dok-doko, kay mulda visi ma ɦur kulo'o.

⁸Nisi junis hiɗi jaɓna, nisi kalis vun law ta zal ŋolo,

⁹nala nam gatsi kayni kay lopna visiya, nam lawsi kayn kay ŋel-vunda visiya hay li ma nisi ay jigal tuwsiya;

¹⁰nam disi kirsi kayni kay hatsiya, nam ɗeksi kayni kay nisi hin bay-ɗigerta goyo.

¹¹La nisi huma hot yisi gaa kuɗumu kaw, nisi ma vat buura visi hay sle'ta, nisi ma vat busata visi hay ŋaata.

¹²La nisi humɗi, nisi ma ciys goyo hiɗi kew-gaferaŋa, suksi ma sa'atis goyo kuɗ bay-wida visiya.

¹³Sum sa liwisna kal tuwsi hay ɦiyda, nisi may yi Lawna kay gut kuɗsiɗi, hay li ma nam junsiyawa hiɗi jaɓna;

¹⁴ciwta visi ba goyo hay joriyota visiya, irita visi bays goyo jar sa viyuwna.

¹⁵May sa ma vun lasta, Lawn butum goy hiɗi lasta valam kay tuwa'a, nam ɗekem kayni hiɗi lasta.

¹⁶Nam ma butaŋ goy vun-zlata kaw, naŋ ma li nala loɗi, naŋ ma fi tun-sukka ta bay tupa dig lawi, yam tablena vaŋu ma hobis hiɗi tin ma jibetna.

¹⁷La naŋ ka kitat ŋray ca ki sa ma joon nala, kitata hiɗi ɗigerta ma hot nig kaŋu.

¹⁸Hin ɦiyda ŋolda kalaŋ hay burahtaɗi. Naŋ ma var ala wurak ma ŋolla ma hulotaŋ goyoɗi.

¹⁹Siwelda vaŋu asay kay butaŋ goy vun zlat su? La hiɗi donota vaŋ kaf kaw naŋ asɗi.

²⁰Henjeta ta yaw sumun goy hay liyna visi pata, naŋ ma var ka'ɗi.

²¹Naŋ ma ŋom tuwaŋu kay muɗ iraŋ kir bay-ɗigertaɗi, kay kayni mi va ma naŋ vilekemu, kuɗ kayni joota faŋawa.

²²Lawn ɗek tuwam goy nagaya hay gaŋeraŋa valamu, sa ma as kay hat sana ki nam nala mi gige?

²³Sa ma as ɗekem hagata mi gige? Sa ma as dum ala naŋ li jiw-zlatawa mi gige?

²⁴Humaŋ ma gaŋu kay tiy sem lopna valamu, lopna valamu ma sumun ka tiyim selemu hay nul ma nisi ka gumna.

²⁵Sum-wuran kaf ka sar kayni hiɗi irsiya, sumun kaf ka sar kayni goy gine pa.

²⁶Lawn nam ŋolo, may nay may wi ŋolda valamɗi; ŋaɓta vi busata valamu sa as feka'ɗi.

²⁷Niy ma tol gaana nam yawam kulo jar simeɗna, bugolda nam hot si gaa niyo;

²⁸ɗugulla hinim jaŋay goyo, nam hinim yak gaa kay sum-wurana.

²⁹Ɗugul ma kus kulo dukalawna, sa ma wum cawam ɗawn mi gige? Sa ma as wi caw suwana vi guɗukŋa valam ɗawn mi gige?

³⁰Ɗuwgiya, nam vi haraŋa valam goy talamu, nam kusuɓ yam niy-lum ŋolla ma zulla.

³¹hiɗi slen cani nam ka kitat kay sumuna, nam vul tin ŋol dak-dak,

³²nam yaw wileta hay ɓalamu, nam vul hagata tam wileta kay na' tuɗ dur sa ma gawta.

³³Nam ɗek tuwam goyo hiɗi niy-ma-bayna valamu; farayn kaw firi kay mata valamu.