Read Masana JOB 37 Bible Online

JOB 37 - Masana bible

JOB 37

¹Kuɗ sle namna kayni, dikan ka geɗa, goboy a pat goyo.

²Humgiya, humgi suwana vi delemu, bayna ma kali goy hay vunam pana.

³Nam ŋuyum kulo'o hay be'da vi dukalawn kafe, wileta valamu ŋuy sin nagat kafe.

⁴Bugol kayni nam baya lo, nam bay hiɗi della valam ma donona.

⁵Ŋaa'a ŋolo hay li ma Lawna bay hiɗi della valamu; nam li slen ma ŋulona ma nay may as lumɗina.

⁶Nam di tam mogoyna: yakaŋ gaa kay nagata, nam vul hagat tam niy ma butna, tam niy ma sina, tam niy ma but ŋolla kaw.

⁷Ɓam sumuna ma li lopna nam tun soona kalam kaf,[8] Kay sumun kaf ma wi ala nisiya mi lopna vi ɓalamu.

⁸Muur ma fulla kal hay zulla, nam bur gaa hay daŋamu.

⁹ɦiwliŋŋa may hay gal kayam pa, sleɗna may hay gal gaa pa.

¹⁰hiɗi sukŋa valam ma fona, Lawn mar glasna, yam niy ma ŋolla ɓok hiɓiŋ'.

¹¹Nam hob ɗugulla hiɗi niyna, ɗugul ma wilena nam merem goyo,

¹²ɗugulla ka ŋuy kayni kuɗ minda valamu, kay hob vun sle ma nam dum kafna, gaa kay yam nagata.

¹³Nam gumi kayni la kay wat sum sa hay nagatna, lebo kay ɗek ŋaata valam goyo.

¹⁴Job, jakaŋ humaŋ kat slen kayni, colaŋu kay hum sle ma ŋaana vi Lawna.

¹⁵Naŋ wi nanige Lawn ka tun vok ɗugulla su? Naŋ wi nanige nam ka hin haraŋa vi ɗugulla valam kay wile'e su?

¹⁶Naŋ wi'e nanige ɗugulla ka poy kulo kay tuwamu su? Kayni ti ŋaata vi nam ma wida valamu asay goy ŋaa'a ŋolo ɗisu?

¹⁷Naŋu ma sligara vaŋ giy ku keŋ' hay li ma nagat ka tuni kiliŋ kay simeɗ ma may kayam pana.

¹⁸Hay li ma nam kot dukalawn ɗeŋ ki way-slawn nala kayni, naŋ kaw asay kay li ki nam nala su?

¹⁹Naŋ ma ɗekma kay va ma numa ma di talamna, numa as di va talamɗi kuɗ muguruta vuma'a.

²⁰San as dum goy jew ala nan min lawa su? May san as di ala nam min ba goyo su?

²¹Liyn co'o san wi haraŋaɗi, hay li ma ɗugulla muɗ liyn jufunu, Bugolda simeɗna co'o, nam tok dukalawn goyo.

²²Haraŋa ma wilena may hay gal gaa'a pa lo. He! jifiyta vi Lawna se' tiy ŋolo.

²³Nay asay kay co tam ma Gaŋeraŋ-Petnaɗi, ŋolo hiɗi donota valamu, Hiɗi gasita hiɗi ɗigerta valamu ta vatɗita, nam may hot ditɗi.

²⁴Kuɗ na'ta kayni sumun as li nar kalamu, nam may ɗuw iram kay sa ma yal kep noŋɗi.