Read Masana JOB 38 Bible Online

JOB 38 - Masana bible

JOB 38

¹Goy jar simeɗ ma biwna pa Ma-Vatɗina hot dita tam Job, nam di'e:

²Sa ma as muɗ varta van jufunu hiɗi ɓak ma bay yalla kayn mi gige?

³Junaŋ kanti furaŋu ki sa ma jufna nala; nan min jobaŋisa, naŋ ma ɗekaniya.

⁴Naŋ ay arige hay li ma ma nan tun sem nagat gaana? Naŋ danay goyo, la hiɗi wida-yalla vaŋu naŋ as kay wi kayni su?

⁵Sa ma tun naɓta vi nagat goyo mi gige? Naŋ wi kayni su? Sa ma ŋaɓ zigewn goy kay nagata mi gige?

⁶Sem nagat jugoɗay gaa kayn hay mige? Sa ma tun hiɗiy ma gef-ziyna va'a mi gige?

⁷Kayni hay li ma mislek ma graw culumta ka gi nul ma kolda, kayni hay li mi gurona vi Lawna kaf ka ci ɓisiya.

⁸Sa ma ci vun niy-lum ma ŋolla hiɗi cokoromna mi gige? Hay li ma nam kusay goyo, kulfutay goyo hay zulam pa;

⁹hay li ma nan kot ɗugulla ki sligar ma cuk talamna nala, jufunda ki borgon ma kusuɓ talamna nala.

¹⁰Hay li ma nan col gatta kalamu, hay li ma nan kotom vunam hiɗi kokona, hiɗi cokoromna;

¹¹hay li ma nan di ala: Naŋ ma co ta-ta tani, naŋ ma jik goy bugol kaynɗi, subur-tuwta vi billa vaŋu yalam ma dab ta-ta tani.

¹²Hay li ma naŋ vuɗ hay nagat pa, naŋ vul hagata tam liyn ma graw culumtana sem kep su? Ŋarpita naŋ ɗeka' liyna va'a,

¹³kay na' ma co sin nagat kafe kay sum sa joona ma geɗa su?

¹⁴Kaf as muɗa ki naga-dirginna ma ɗo talamna nala, nam ɗuw ki sligar cuki talam nala.

¹⁵May sum sa joona haraŋa visi mayɗi, gilaŋ ma poŋ kulona kusis goyo kaw.

¹⁶Naŋ co ta-ta tam vun zul ma niy-lumna riŋay goy hayna su? Naŋ poyay hay zul ŋol ma wiŋŋa su?

¹⁷Zulla vi mitta mali goy kiraŋ su? Naŋ wi vun-galana vi ŋus-mitta ay su?

¹⁸Naŋ wi buɗukŋa vi nagatawa su? Daŋay goyo, la naŋ wi slen kayni kafe.

¹⁹Hagata ta kal hay ziyna vi haraŋa ka arige? Liyn ma jufunda tuni hayamna ka arige?

²⁰Naŋ as mok sin jufunda ma dabin kaŋ su? Naŋ wi hagata ta kal hay ziyna va'ta su?

²¹Naŋ wumu! Kay hay na'ta naŋ ay vuɗiya, ŋaɓta vi buura vaŋ ŋolo kaw.

²²Naŋ co ta-ta tam liyn ma futuw-mogoyna ka koti hayna su? Naŋ wi liyn ma mogoyna ka hayna su?

²³Namu ma nan ŋayam goyo kay buura vi zlata, ma nan ŋayamu kay buura vi duura hiɗi ci-tuwta.

²⁴Hagata ta haraŋa iram ɓuraw haya'ta ka arige? Simeɗ ma gal kuɗuwna mer goy hay nagat kayn gal arige pa?

²⁵Sa ma mal hagat goy kay niy ma butna, ɓir hagata vi wileta hiɗi niy-ma-bayna kaw mi gige?

²⁶Kayn hin niyn siys gaa kay nagata ta sum say haya'ɗita, hay fulda ta sum-wurana say haya'ɗita,

²⁷kay vul niyn mi liyn ma ɓulaki goyo hiɗi liyn ma hosay goyna, kay hin usna day kulo haya!

²⁸Niy-ma-sina bulum ka su? Sa ma hin maɗayn gi hum usna kayn mi gige?

²⁹Glasna vuɗum mi gige? Roɗona ma dukalawna vuɗum mi gige?

³⁰Niyna mol yam tuwamu ki hiɗiyn nala, yam niy ma zulla ɓala.

³¹Naŋ as jun jar dahaŋalla su? Naŋ as ŋra zew ma juni jar bajaara goy su?

³²Mislek ma moli yam tuwamna naŋ as ŋaɓam liyna valam su? Mislek ŋolda hiɗi guro ma kuɗa'na naŋ asay kay tuɗa' su?

³³Naŋ mi gatta vi wuralawna su? Naŋ asay kay ɗiger gaŋeraŋa va' ma gaa kay nagatna su?

³⁴Siwelda vaŋ as co ta-ta tam ɗugulla, kay niy-ma-riŋŋa ma ŋuy taŋu su?

³⁵Wilena vi ɗugulla naŋ asay kay gum iram su? Nam as di taŋ ala numa lakŋi su?

³⁶Sa ma tun yalda hay ŋayayta vi dikga mi gige? Sa ma vul wida-yalla mi ŋusta vi sana mi gige?

³⁷Sa ma hiɗi yalla valamu as ŋaɓ ɗugulla, muɗ vun tiliyn ma dukalawn ay gaa'a kaw,

³⁸kay butuw ma ɓoka, kay naga ma boki goyna ma ɓok kulo yam tuwamu kaw mi gige?

³⁹Naŋ asay kay digiɗ muura mi zlo-tancata su? Naŋ asay kay vat mayta vi guro-zlon su?

⁴⁰Hay li ma nam ka ŋayay hay zulamu, hay li ma nam ka baray goyo ki hay liy ma lakŋa valam nala?

⁴¹Hay li ma gurona vi jarakŋa ka ciriy tam Lawna, ka meri goyo kay tin mayɗi, sa ma kotom tina mi gige?