Read Masana JOB 39 Bible Online

JOB 39 - Masana bible

JOB 39

¹Muurina vuɗ gurona valam kayn lancitige, naŋ wi kayni su? Hay li ma dukŋ vuɗ gurona valam kayn naŋ ka saram zaw su?

²Naŋ asay kay ŋaɓ til ma nam ziy guron hayamna su? Naŋ wi buur ma nam vuɗ gurona valamna su?

³Nam guɗof gaa'a, vuɗ gurona valam goyo, nala nam buti goyo kay tuw-tita valamu.

⁴Gurona valam muɗ dono'o, wul goy hay haraŋ ma puɗak-ɗakŋa, nam kal goy gine'e, hotay tam sulum loɗi.

⁵Kuro ma fulla sa ma hinim goy butin kayn mi gige? Sa ma but dirlan goy selem kayn mi gige?

⁶Nan vulum liyn ma musta valamu hay fulda, nan vulum ziyna valamu jar naga ma mandana.

⁷Nam cen kuɗ winekŋa ma hay hoyok-ziyna, nam may hum bayta vi sa ma kuɗ keke ma ziy jakŋaɗi.

⁸Nam ŋuy kay hiɗiyna kay gar hatna, nam gar hat ma ŋulomna kafe.

⁹Funna naŋ as gum vo kay sunaŋ su? Nam as kay bur gaa hay gulina vaŋ su?

¹⁰Naŋ as cuk jaman vun funna kay nam ɓiraŋ boron kulo su? Nam as to naga ma ɗeŋŋa gaa bugolaŋ su?

¹¹Naŋ as tun vida vaŋ kalamu kuɗ donota valam ta ŋolda su? Naŋ as hinim wan ma naŋ zumum hiɗi makka su?

¹²Naŋ as kay tun ŋalda vaŋ kalamu kay nam ma yawaŋ wana vaŋu, kay tokom hay muɗakŋa su?

¹³Rigetta meɗ zlamiya' goy hiɗi firita; ŋray ca ki zlamiyna vi lay-joriyon nala.

¹⁴May hay li ma rigetta hin sena va' gaa vi nagata, na' hinim gi ku jar butuwna,

¹⁵huma' may ga' ala sem va as tom goyoɗi, huma' may ga' ala muur ma ful as tayam gaa'aɗi.

¹⁶Na' bursak tam gurona va'a ki nam may mi gurona va'ɗi nala; dika' may ta' kay mak ma na' mak tuwa' kisinɗi.

¹⁷Kay Lawna may vula' yalɗi, nam may ɓuraw wida-yalla mi rigetnaɗi.

¹⁸Hay li ma na' cola, fok jaŋi, na' cen kuɗ kulumna hiɗi sa ma ɓey kalamna.

¹⁹Kulumna vulum donot kayn mi naŋ su? Duŋus ma kulo pelemna gumti kayn mi naŋ su?

²⁰Pirim ki baar nala kayn mi naŋ su? Tiyna valam ma hiɗi dikam goy butina mar narta.

²¹Nam sigaw hay lokŋa, firi kay donot ta talamta, nam piris jaŋi kir sle-ma-duura;

²²nam cen kuɗ narta, tuwam may wirimɗi, nam hot bugolom vok kew-gaferaŋa noŋɗi.

²³Ŋuloŋ-ɓarawna ka tiy kulo kalamu, kawayta ta wileta hiɗi kew-gaferaŋa.

²⁴Nam pir hiɗi donom kif' kayni, kal goboyɗi, hay li ma nam hum buwna vi difnawa, ŋalam as vi noŋɗi.

²⁵Hay li ma difna buwawa, nam ŋurnaya, cinam his duur ay goy gine'e pa, del ma bayna vi sa ŋulona vi duura hiɗi luluna kaw.

²⁶Hay li ma bakŋa ka hal kulo (dukalawna), hay li ma nam ka gi dumar kulo'o kaw hay gal ma kayamna kayni, ɗekem yal mi naŋ su?

²⁷Hay li ma bakŋa ka fok kulo'o, hay li ma nam tun ziyam kulo hay liy ma ginena kaw, vulum hagat kayni mi naŋ su?

²⁸Ziyna valamu ka laki kayni kulo sin-hiɗiyna, nam bur ɗawni kaw, kulo kay sin-hiɗiyna, ki liyn ma donona nala.

²⁹Ɗawni pa nam sar va ma tina valamu, goy gine'e pa iram cuk kay va ma tina valamu,

³⁰gurona valamu ci busuwna; hay liyn ma ŋumna ka haya, nam ka haya kaw.