Read Masana JOB 4 Bible Online

JOB 4 - Masana bible

JOB 4

¹Elifas ma hay Teman sli ditiya di'e:

²La numa min di va taŋu, sutiyaŋ as to su? May sa ma as mus hiɗi vunam duki ɓurut ɗawn gige?

³Naŋu ma vul hattawa mi sumun ŋolo, naŋu ma vul donotawa mi sum sa sutaysi toyna.

⁴Sum sa tupa tiŋtiŋŋa dita vaŋu yawsiyawa kulo'o, naŋ vul donotawa mi sum sa ŋulofsi kusi gaa kuɗsina.

⁵May wulin kayni hay li ma lawt coowa kaŋ naŋu, Naŋ hiwir tuwaŋ lo su?

⁶Narta vaŋ kuɗ Lawna kayni mi gutda vaŋɗi su? Cubta-sle'ta vaŋu, kayni ti ɗigerta vi hagata vaŋɗi su?

⁷Kisaŋ kaŋ tige, sa ma fi mitta hay li ma nam li jooɗin mi gige? Sum sa ɗigera ba goy gal arige?

⁸Ki nan wum nala, nisi sa zum bay-ɗigerta hiɗi nisi sa was joota feɗ vuɗna valamu;

⁹sukŋa vi Lawna as cisi goyo, nisi loɗis goyo kay simeɗna vi ɦiyda valamu.

¹⁰Zlo ma ci gumna, muur ma siyna ma buwna, hiɗi guro zlo-joriyon kaf nam kusum siyam goyo;

¹¹Zlon mit goyo kay nam fi va ma tiɗi, gurona vi zlo tan-cata mer goyo kaw.

¹²Law mara cuk hay human ne' ne', human hum yoboy namna seŋ-seŋ'.

¹³Hay li ma varta ta yorta may goy hay va ma vul tuwam kiraŋu hay henjeta, hay li ma sumun kali hay senda ŋolda.

¹⁴Narta hiɗi yakarana coowa kanu, zokan kaf geɗawa.

¹⁵Simeɗ mara kep jik kanu, ɗuŋus ma tanna yaw kulo jimim'.

¹⁶Sa ka coli hay liy namna zaw, nan may wi jifna valamɗi. Sa ka coli vok iran zaw, nan humum delem ka ŋurnay hiɗi ŋal ala:

¹⁷Sa wurana nam as li ɗiger vok Lawn su? Sana as li peldete vok nam ma lumna su?

¹⁸La Lawn may tun vida valam kay sa sunda valamɗi, la nam fi va ma joo kat sa sunda valamu,

¹⁹kayni ma li sem gaage suwa kat nisi sa lak hay ziy nagana? Nisi sa sesi ma gaana ini kay butuwna, sa san as jiweslsi goy ki tenɗena nala?

²⁰Hay graw culumta pa ta-ta vulatita nisi ka ciys goyo, nisi ka vatis goyo kay dok-doko, sa ma jak humam kisi mayɗi;

²¹zigewna vi irita visiya jay goyo, nisi ka mita, may hiɗi yaldaɗi.