Read Masana JOB 41 Bible Online

JOB 41 - Masana bible

JOB 41

¹Humaŋu, hay li ma naŋ ka cubumu, naŋ muɗ goy zulo'o, hay li ma iraŋ cuk kalamu naŋ cap puk goy gaa'a.

²Sa ma ɦoyaya ma jom vunamu mi gige? Nanu sa ma as col digan nanu mi gige?

³Sa ma vulan bali kay nan ma hot wurakamta mi gige? Gaa kay nagat kaf kayni, slen kaf nam vanu.

⁴Ɓetna vi tuwamu as kay zanan vunanɗi. Donota hiɗi jifiyta vi tuwamu as kay zanan vunanɗi kaw.

⁵Sa ma fokom sligar ma talamna goy kayn mi gige? Sa ma as jik jar gaŋamu mi gige?

⁶Sa ma malam vunam kulo'o mi gige? Gaŋam ma kuryumna as laŋ nari.

⁷Marayna valamu ma jifiyna ma donona slewi jar-tuwamu ki hiɗi soona nala;

⁸nam ka ciliy kulo kat tuwamu, baŋa may jaramɗi.

⁹Nam ka juni kat tuwamu, laki dok-dok nala jaram may poŋ goyɗi.

¹⁰Hay li ma nam herjehewa, haraŋa wile goyo; goŋ-iramu ki liyn ma ŋarpita nala.

¹¹Kuta kali goy hay vunam pa, kuta ta wileta piray goy hay vunam pa.

¹²Nukŋa kal ay goy hay cinamu, ki doway-firina ma giy kuna ka ŋala nala.

¹³Sukam ma gina as do veŋŋa kuwa, kuta ŋalda kali goy hay vunamu.

¹⁴Donota ka hay dekdelemu, narta pir vokom jaŋi.

¹⁵Sle ma kat tuwamna juni tam tuwam kepe, nam muɗi ɗeŋe kat tuwamu, may geɗ noŋɗi.

¹⁶dikamu muɗi ɗeŋe ki hiɗiyn nala, ɗeŋe ki goor-hiɗiyn nala.

¹⁷Hay li ma nam fok kulo'o, sa gaŋeraŋsi suwna muɗi nari, ɦod irsi goyo, sutaysi toya kay narta.

¹⁸La sa co talam hiɗi kew-gaferaŋa, nam makam mi tuwamawa, kawayta hiɗi yakana hiɗi ŋoŋŋa li va talamɗi kaw.

¹⁹Kawayna nam ɗuwum ki usna ɦawa nala, wayta nam ɗuwa' ki gu ma tiyofina nala.

²⁰Nam may pir jaŋi kay ɓarawtaɗi, hiɗiy ma vun tiwlekŋa kiram ki us ɦawa nala,

²¹kup-kupna kiram ki us ɦawa nala, nam cen kuɗ weɗna vi yakana.

²²Osl ma vunam celɓetna ka gaa kuɗ hayamu, ki kaway ma to nagan gaana nala.

²³Nam wisik niy ma zulla ki doway-firin ka zal nala, nam muɗ niy-lumna ki dowayta ta ka zal urdin nala.

²⁴Nam hin hagata ta foy goy haraŋi bugolomu, zul ma wiŋŋa muɗ ki ɗuŋus sa ma maara nala.

²⁵Sa mara ma dum lawam mayɗi; may nam ini kayni kay vul nartaɗi.

²⁶Nam pan muur ma ŋulon kafe, namu mi mulla vi muuriya ma donon kafe.