Read Masana JOB 6 Bible Online

JOB 6 - Masana bible

JOB 6

¹Job hot dita:

²Hih! La asa kay ŋa nekka vi tuwan ma ka guruɗanna klasige, lasta van kayni la tapa' kepe, tuna' kulo kay va ma ŋa nekka klasige.

³Nan var ala fa' ɗawni nek ŋolo suw ŋesl ma goloŋŋa. Kuɗ na'ta kayni sle ma nan dumna sa may jiɓer kalamɗi.

⁴Kay ɓarawta vi ma Gaŋeraŋ-Petna cokanawa; ŋusta vanu ka ci sinawna, purcakka vi Lawna motanawa kay duranu,

⁵Kuro ma fulla tiy kuɗ hat ma ŋulomna lay su? Lebo put gujun tiya hay li ma zugol ka gaa galam lakŋa su?

⁶San as kay ti va ma huwlukŋa ma mandan kuɗumɗin su? ɦulum-ɦulumda ka hay gal haɓna vi sena su?

⁷Slen ma nan mini a tun ɓan talamɗina, nam muɗi mi tina vanu, hiɗi liwista valam ta suwit pete.

⁸Jobta van ma humis humge, hin Lawna hob cubta-sle'ta van hobge.

⁹Hin Lawna jiweslan goy jiweslge, hinim meɗ ɓalam goyo kay ban iran goy bage.

¹⁰Nala nan ma fi teŋ-irta na'ta lo, hay na'ta nan ma pir kulo'o hiɗi firita, hiɗi lasta van ta suwit pet kaw, nan may puw vunan kay yoboyna vi ma Peldetna noŋɗi.

¹¹Donota vanu ti tarige a nan cuba? dabta van ma li nanige a nan ma ɦur buura irita van lo?

¹²Donota vanu ti donota vi hiɗiyn su? Sliw-tuwanu nam mi wayna su?

¹³Nan musi damni gutda tayɗi naɗi su? Su'da kalawa goy gine'e hiɗi nanu naɗi su?

¹⁴Sa ma ka ci lasta min ala banamna lum ŋaa'a, la narta kuɗ ma Gaŋeraŋ-Petna noyay goy kalam kaw.

¹⁵Ɓosiyonna di newtawa kanu ki niy-ma-riŋŋa nala, ki niy-ma-riŋŋa ma so goyna nala,

¹⁶niy dugoɗna hinim jaŋɗi, niy ma mokayna ŋay tuwam haya.

¹⁷Hay liyn ma zalla ka'a, nam so goyo, hay li ma fatta ka'a, nam so goy gosoyo.

¹⁸Sum sa pat li filiwna cal goyo hay hagata visiya, nisi fut hay fulda cap bays goyo.

¹⁹Sum sa filiwna vi Tema cuk irsi kay ɗuwa, sum sa pat rogoyna vi Saba ka cub hiɗi sle'ta;

²⁰Nisi muɗi zulo'o kay nisi tun ŋalda visiya, nisi muɗi zulo'o hay li ma nisi co'o.

²¹Nigi wulin lakŋ kaw nala, nigi ka ɗuw lasta vanu, nigi tuwgi muɗi nari.

²²Nan di tigi ala: Nigi vulan va'a, nigi ma li zulot tanu hay li ma nigi vulan kuɗ slena vigiya,

²³nigi hulotan goy hay ɓam sa ma gawta, butan goy hay ɓam sa ma ɦawlana su?

²⁴Nigi ɗekaniya, nala nan ma duk vunanu. Ɗekangi kay va ma nan raw goy hayamna.

²⁵Ɓak ma hay liyam ɗigera vi dik sana, may yoboyna vigi ma ɓulak dikŋa gut hiɗi mige?

²⁶Nigi min lawan kuɗ va ma nan di'e, nigi min gi dita vi sa ma muɗi lagawasna goy jar simeɗna su?

²⁷Nigi ka pi lawt kay sa ma kuyuna, nigi ka curoɗ banagina.

²⁸Wulin kayni, muɗgi irgi ay kiranu, nan as kaagi sinda su?

²⁹Hotgiyaya, nan siɗawgiya, nigi ma li bay-ɗigertaɗi; hotgiyaya, ɗigerta vanu ka dok-doko.

³⁰Bay-ɗigerta ka hay vunan su? Vunanu may poŋ ir jootɗi su?