Read Masana NULLA 104 Bible Online

NULLA 104 - Masana bible

NULLA 104

¹Ciwta vanu suburag Ma-Vatɗina, Ma-Vatɗina Lawna vanu, ŋolda vaŋ may vatɗi. Naŋ cuki hiɗi ŋolda hiɗi gajijita.

²Haraŋa cuki talamu ki sligara nala, nam bed dukalawn goyo ki bay-bayna nala;

³Nam in ziyna valam kulo jar niyna; ɗugulla mi kekena valamu ma nam ɓe kalamna, nam poy kulo hay gilaŋatna vi simeɗna.

⁴Simeɗna muɗi mi ma di sunda valamu, sin-kuta si sa sunda valamu kaw.

⁵Nam tun sem-nagata kay dolla va'a, ta-ta hay vatɗita na' as ge'ɗi.

⁶Naŋ kusuɓa' hiɗi zul ma wiŋŋa ki hiɗi sligara nala, niyna coli kulo'o kay hiɗiyna;

⁷hay li ma delaŋ di'e, nam pir vokaŋ jaŋi, hay li ma naŋ baya, nam kal koloyo.

⁸Hiɗiyna wuli kulo'o, liyn ma lokŋa hoti gaa beɗe, hay liy ma naŋ kotom kalamna.

⁹Naŋ kot jar-liyna ma niyn as jik goy bugolomɗi, kay nam ma hotay ɗuɓ nagat noŋɗi.

¹⁰Nam hin niyna vi kaar-ma-lawna jaŋ goy hay lokŋa, nam jaŋ jar hiɗiyna.

¹¹Nam vul niy ma cina mi muur ma kay nagata kaf, kuro ma fulla vat laata valamu kaw.

¹²Layayn ma dukalawna li ziy kelemu, nam di delemu jar ɓam-guna.

¹³Nam si niyna kay hiɗiyna, goy hay musta valam ta kulo gineta pa, nam ŋuruɓ yam hiɗiyna; nagat hobiya hiɗi vuɗna vi lopna vaŋu.

¹⁴Nam hin usna ɦar kulo'o kay tina vi farayna, jaf ma vuɗna kay sana kaw, kay nagata ma vul tina,

¹⁵Vinna ma firi dik sana, mula kaw kay set iramu a iram muɗ wile'e, hiɗi funa ma vul donota mi sana kaw.

¹⁶Guna vi Ma-Vatɗina hobawa, gu-gamna vi Libaŋ ma nam pumna.

¹⁷Kayni mi liyn ma layayna tun ziyna valam haya, lay-joriyona tun ziyna valam kayni jar gu-siprena,

¹⁸hiɗiy ma kulo ginena nam vi fok-ŋek ma fulla, hiɗiyna mi liyn ma ŋayna vi kosomna.

¹⁹Nam kot tilla kay ŋaɓta vi liyna, fatta wi liyn ma na' ɗik gaa hayamna.

²⁰Naŋ mar jufunda, liyn li henje'e: Hay na'ta muur ma fulu kaf ka geɗa;

²¹guro-zlona ka ci gumu kay gar muura ma mutna, nam job tina valamu tam Lawna.

²²Fatta day kulo'o, nam vi tuwam goyo, ŋay goy hay zulamu.

²³Sana kal goyo, kay tuɗ goy tam liy ma lopna valamu, nam li lopna valamu ta-ta hay vulatita.

²⁴Ma-Vatɗina, lopna vaŋ ka ŋolo tige. Naŋ kotom kaf hiɗi yali. Nagata hobawa hiɗi sle ma naŋ lumna.

²⁵Niy-lum ma ŋolla ma beɗayna ka ɗawni, sle ma irina ka ŋolo ŋolo hayamu, sa as ŋamɗi, muur ma gurayna hiɗi ma ŋulona kaw.

²⁶Lumayna ka poy hayamu, darmadina ma nam kotomna ka liw jar billa.[32]

²⁷Muuriyan kaf ka zamaŋ ɓaŋu, kay naŋ ma vulsi tina visiya hay liyamu.

²⁸Naŋ vulsi tina, nisi tokom kulo'o, naŋ mal ɓaŋ goyo, nisi hobawa hiɗi ma ŋaana.

²⁹La naŋ ŋay iraŋu, nisi muɗ nari, la naŋ yaw sukŋa visi goyo, nisi mita, muɗ goy buɗufna lo.

³⁰Naŋ gi sukka vaŋiya, nisi iniya, naŋ hot muɗ yam nagat wuliya lo.

³¹Hin gajijita vi Ma-Vatɗina li ta-ta lige, hin Ma-Vatɗina li firiya kay lopna valamu lige.

³²Nam ɗuw nagata, na' geɗa; nam jo hiɗiyna, nam pat no'oso.

³³Nan min gi nulla tam Ma-Vatɗina, ta-ta hay irita van kafe, nan min gi nulla tam Lawna, ta-ta hay li ma nan ka iri tuwa.

³⁴Hin yoboyna vanu li kiram ŋaa lige. Nam min li firiya hay Ma-Vatɗina.

³⁵Hin sa sulukŋa vatis goy kay nagata. Hin sa jiw-zlata lak loɗi. Ciwta vanu, suburag Ma-Vatɗina. Suburgi Ma-Vatɗina.