Read Masana NULLA 107 Bible Online

NULLA 107 - Masana bible

NULLA 107

¹Tiygi sem Ma-Vatɗina kay nam ŋaa'a. Kay ŋaata valamu mus ta-ta hay vatɗita.

²Hin sa buti-goyna vi Ma-Vatɗina di nala, nisi sa nam butsi ay goyo hay ɓam sa gawtna pa,

³sa nam toksiyay goy hay nagat kaf pa, hay kuɗuwu hiɗi vulatiya, gaa'a hiɗi vun niy-lum ma ŋolla pa kaw.

⁴Nisi tulur hay fulda, hay hagata hiɗi nagata ta goy soya, nisi fi hoyok-ziy kay lak hayamɗi.

⁵Nisi ka las kay mayta hiɗi laata, sutaysi toya.

⁶Hay na'ta nisi siwel tam Ma-Vatɗina hay zumalda visiya, nam suɗsi goyo vun zlata kaw.

⁷Nam tuɗsi hay hagata ta ɗigere, kay nisi fi tuɗ hoyok-ziya kay lak hayamu.

⁸A nisi ma subur Ma-Vatɗina kay ŋaata valamu, kay lop ma ŋulo ŋulona valamu, tam gurona vi sumuna kaw.

⁹Kaw nam hob ciwta maŋaytawa, ciwta ta mayt ca'ta nam hoba'awa hiɗi ŋaata.

¹⁰Nisi sa lakay hay jufunda hay ŋus-mitta kaw, juni hay lasta hiɗi jaɓna,

¹¹kay nisi ŋel gatta vi yoboyna Lawna, ɗuw gatta vi ma ŋol ma kulona waa'a kaw.

¹²Kay nam hotsi yisi gaa'a hiɗi lasta, nisi puki gaa'a, sa ma gut kuɗsi mayɗi.

¹³Hay na'ta nisi siwel tam Ma-Vatɗina hay zumalda visiya, nam suɗsi goyo hay lasta visiya kaw.

¹⁴Nam kalsiyay goy hay jufunda hiɗi ŋus-mitta, nam ja jaɓna visi goy ja'.

¹⁵Nisi ma subur Ma-Vatɗina kay ŋaata valamu, kay lop ma ŋulo ŋulona valamu, tam gurona vi sumuna kaf kaw.

¹⁶Kay vun-galana ma koti hiɗi wayna nam kusumawa goyo, vun-ziyn ma koti hiɗi kawayna nam kusumawa goyo kaw.

¹⁷Sa ɦay-ɦayna, hiɗi poyta visi ta joota, hiɗi jiw-zlata visiya, nisi muɗ tuwsiyawa sari.

¹⁸Tin kirsi kaf joo'o, nisi tun ɓisi tam vun-galana vi mitta.

¹⁹Hay na'ta nisi siwel tam Ma-Vatɗina hay zumalda visiya, nam suɗsi goyo hay lasta visiya kaw;

²⁰nam gi yoboyna valamiya, muɗsi goy ŋaa'a, suɗsi goy kay zulda kaw.

²¹Hinsi subur Ma-Vatɗina kay ŋaata valamu, kay lop ma ŋulo ŋulona valamu tam gurona vi sumuna kaw.

²²Hinsi li ɗifin ma gi-deɓta, di goy kay lopna valamu hiɗi nul ma firita kaw.

²³Nisi sa kali goy hay niy-lum ma ŋolla hiɗi lumayna, sa li lop hay niyn ma ŋulona,

²⁴sum nisina wi lopna vi Ma-Vatɗina, hiɗi lop ma ŋulo ŋulona valamu hay liyn ma zulla.

²⁵Nam di'e, nam hin birin biwa, nam fok billa vi niyn kulo'o.

²⁶Lumna fok kulo'o hay dukalawna, nam jik gaa hay zulla; ciwta visi kali vun zlata;

²⁷irsi muɗi tuwursiya, nisi tupa tiŋ-tiŋ' ki sa ma ɦiwir hiɗi dolayn nala, yalla visi pet muɗi waa'a.

²⁸Hay na'ta nisi siwel tam Ma-Vatɗina vun lasta visiya, nam yawsi ay goyo vun lasta visiya.

²⁹Nam tun birin gaa helmes', simeɗna may biw loɗi.

³⁰Nisi li firiya kay liyn tuni gaa'a, Ma-Vatɗin tuɗsi kulo hay deŋel niyna ma nisi mina.

³¹Hinsi subur Ma-Vatɗina kay ŋaata valamu, kay lop ma ŋulo ŋulona valamu tam gurona vi sumuna kaw.

³²Hinsi slum yalam kulo'o hay tokŋa vi sumuna, suburumu hay liyn ma sa maariyan lak haya kaw.

³³Nam muɗ niy-lumna goy ful ma wiŋŋa, nam muɗ liy ma law niyna goy liyn ma lakŋa.

³⁴Nam muɗ nagata ŋaata goy ful ma mandana, kay joota vi nisi sa lak haya'a.

³⁵Nam muɗ fulla goy goloŋo, naga ta ɗeŋga kaw nam muɗa' goy liyn ma law niyna

³⁶Nam hin sa mayt cisina lak ɗawni, kay nisi fi in hoyok-ziyna kay lak hayamu.

³⁷Nisi cuk jafn hay sinena, pi gulda-guldana, nisi yaw vuɗna valam ma li ŋolla kaw.

³⁸Nam gi bol kisiya, nisi biya ŋol dak-dak, farayna nam vulsi kiɗayɗi kaw.

³⁹Nisi muɗi kiɗaya yisi hoti gaa'a kay curo'da, yorta hiɗi lasta;

⁴⁰nam ɗuw sa ŋulona birek-ceke, nam hinsi tulur goy hay fulda bay haga'a,

⁴¹Nam fok sa ma hawn kulo'o vun lasta pa, nam biya jafn ŋolo ki fukunayna nala.

⁴²Sa diksi ɗigera ma wi kayni, Nisi ma firiya, Joota kaf ma duk vuna'a.

⁴³Sa ma yalla valam ka'a, nam ma var kay kayni, var kay lop ma slugona vi Ma-Vatɗina kaw.