Read Masana NULLA 109 Bible Online

NULLA 109 - Masana bible

NULLA 109

¹Tam ma ŋolla vi sa gi nulla. Nulla David. Lawna ma nan suburaŋu, mus kiliŋɗi.

²Kay nisi mal vunsi ma joona hiɗi ma ɗutna goy katanu. Nisi di yoboy ma sinda katanu.

³Nisi ŋuyanawa hiɗi yoboy ma gawta kaw bay joota vanu.

⁴Hay li ma nan ka minsiya, nisi kaan gawi, may nan muɗ iran tam siɗawta.

⁵Nisi lan joota hay baŋal ŋaata, nisi wurak ti-kamda vanu hiɗi gawta.

⁶Hinim mus gaa kuɗ gaŋeraŋa vi sa ma joona, hin sa ma pi lawta col hay galam ma jufna kaw.

⁷Hay li ma nisi ka kitat kalamu, hin kitat vumu, hin siɗawta valamu muɗ goy sulukŋa kaw.

⁸Hin buura valamu li kiɗaya, hin sa mara'a kol hay baŋal lopna valamu.

⁹Hin gurona valamu muɗ goy kuyu'u, hin cata valamu muɗ goy duhulu kaw.

¹⁰Hin gurona valamu muɗ goy viyuwu, siɗaw tina visi siɗawaya kaw, hinsi gar tina visi goy gine'e hiɗi ziyna visi ma ɓulakayna.

¹¹Hin sa ma donona vurum slena valam kaf, hin sa pulla vurum vuɗna vi lopna valamu kaw.

¹²Hin sa li slugota talam noŋɗi, gurona valam sa kuyuna hinsi muɗ kir sa hawɗi kaw.

¹³Hin jafna valamu vat goyo, sesi ma ɦasis goyo jar jafna ma min co bugolla.

¹⁴Hin Ma-Vatɗina humam jak' kay jiw-zlata vi sumiyam sa jufayna, hinim ɦas jiw-zlata vi sulum goyɗi kaw.

¹⁵Hin Ma-Vatɗina humam gum kisi dok-dok, kay nam ma ɦassi sesi goyo kay nagata.

¹⁶Kay sa namna humam may gum kay li ŋaataɗi, may nam las sa ma hawna hiɗi sa ma maŋayna, sum sa sutaysi toyna kaw nam cisi goyo noŋo.

¹⁷Kay nam min be'da, nala na' hotawa kalamu, kay nam min boldaɗi, nala na' vi tuwa'awa goy gine hiɗi namu.

¹⁸Hinim cuk be'da talamu ki sligara valam nala, hina' kal kalaf hayamu ki niyn nala, ki mula cuk kuɗ zokomu nala.

¹⁹Hina' bar talamu ki sligara ma nam kusuɓum talamna nala, ki kantina ma nam jun furam dok-doko nala.

²⁰Kayni mi wurakŋa ma Ma-Vatɗina vul mi sa gawt kanu, hiɗi nisi sa law joo'o kanu.

²¹May naŋu Ma-Vatɗina Bum-Sumuna, lan ŋaa'a kay semda vaŋu lige, kay ŋaata vaŋu ŋolo. Butan goyo.

²²Kay nanu maŋaya, hawta vanawa kaw, dikan hayan kalafi kaay mili.

²³Nan ka kala ki ŋus-guna ka sah goyo nala, nan digiɗiy goyo ki baara nala.

²⁴Ŋulofon baŋaya kay laata, sliw-tuwanu ŋoki kreŋjeŋ' kaw.

²⁵Nan muɗi kirsi ki sa ma nisi cen kuɗum nala, hay li ma irsi wanu, nisi gla yisiya.

²⁶Ma-Vatɗina Lawna vanu, gut kuɗan gutge, suɗanu kuɗ ŋaata vaŋ suɗge.

²⁷A nisi ma wi ala kayni mi ɓaŋ naŋu, lum kayni mi naŋ Ma-Vatɗina.

²⁸La nisi beɗa, naŋ ma gi bolo. La nisi yaw kulo'o, nisi ma muɗ zulo'o, sa ma sunda vaŋ ma li firiya may.

²⁹Hin sa gawt kanna cuki hiɗi zulota, hinsi bar tuwsi hiɗi zulota visiya, ki sa cuk sligara nala.

³⁰Nan min gi deɓ ŋolo mi Ma-Vatɗina hiɗi vunanu, awa, nan min suburumu jar tokŋa vi sumuna.

³¹Kay nam colawa hay gal ɓam ma jufna vi sa ma hawna, kay suɗum goy vun nisi sa ka kitat kalamu.