Read Masana NULLA 116 Bible Online

NULLA 116 - Masana bible

NULLA 116

¹Nan min Ma-Vatɗina, kay nam hum delanu, hum giɗel-delta vanu kaw.

²Kay nam jak humamawa tanu, kay na'ta nan min yum selem ta-ta hay buurta irita van kafe.

³Jaɓna vi mitta ay ŋuyi tanu, narta vi zulla-mitta vanawa, nan hini goy vun zlata hiɗi zumalda,

⁴may nan yi sem Ma-Vatɗina. Ma-Vatɗina suɗ ciwta van suɗge.

⁵Ma-Vatɗina wi haw sumuna, nam ɗigere kaw, Lawna vaya nam hobay hiɗi slugota.

⁶Ma-Vatɗina ŋom sa yal kiɗayna; nan ay hawi, may nam suɗanawa goyo.

⁷Ciwta vanu, hotag hay tun-sukka vagu, kay Ma-Vatɗina li ŋaatawa tagu.

⁸Awa, naŋ suɗ ciwta vanawa goy vun mitta, butan iranawa goy kay zimiyna, suɗan gayanawa goy vun ni-gaata kaw.

⁹Nan ma tuɗ vok ir Ma-Vatɗina, hay nagata vi sa irina.

¹⁰Hay li ma nan di ala nan ka vun lawta, hay na'ta ŋalda van tuni kaŋu.

¹¹Sukan yaw kelanu, nan di ala: San gigekaw mi sa ma ɗutta.

¹²Kay sle ma ŋaana pet ma Ma-Vatɗina li tanu, nan ma hotom talam ɗawn mi mige?

¹³Nan min sli kaway-ma-cina vi butta-goyta kulo'o, nan min yi sem Ma-Vatɗina kaw.

¹⁴Nan min hob vun sle ma nan nan yi kanu tam Ma-Vatɗina vok ir sumuna valam kafe.

¹⁵Mitta vi sum sa min Ma-Vatɗina na' kiram jifiy ŋolo.

¹⁶Ma-Vatɗina, human humge, kay nanu mi sa ma sunda vaŋu, sa ma sunda vaŋu, goora vi cata-sunda vaŋu. Naŋ gra jaɓ ma tannawa goyo.

¹⁷Nan min vulaŋ ɗifinna vi lop ma slugona, nan min yi sem Ma-Vatɗina.

¹⁸Nan min hob vun sle ma nan yi kanu tam Ma-Vatɗina vok ir sumuna valam kafe.

¹⁹Hay wur-daŋŋa vi ziyna vi Ma-Vatɗina, kulo hayaŋu Yerusalem. Suburgi Ma-Vatɗina.