Read Masana NULLA 135 Bible Online

NULLA 135 - Masana bible

NULLA 135

¹Suburgi Ma-Vatɗina. Suburgi semda vi Ma-Vatɗina, suburumu, nigi sa sunda vi Ma-Vatɗina;

²nigi sa lakay hay ziyna vi Ma-Vatɗina, hay wur-daŋŋa vi ziyna vi Lawna vaya.

³Suburgi Ma-Vatɗina, kay Lawna mi ŋaa'a, gigi nul ma suburta tam semda valamu, kay kayni jifiya.

⁴Kay Ma-Vatɗina vilek Yakubawa, nam vilek Israyelawa kay beketa valamu kaw.

⁵Kay nan wi'e Ma-Vatɗina nam mi ma ŋolla, Bum-sumuna vaya nam mi ma ŋolla suw lawayn kaf.

⁶Slen kaf ma Ma-Vatɗin mina, nam lumu, hay dukalawna kay nagata kaw, hay niy-lum ma ŋolla hiɗi liyn ma zulla kaf kaw.

⁷Nam hin ɗugulla may goy vi dabaŋ-gu'ta vi nagati pa, nam li wileta hiɗi law ma sina, nam mar simeɗnay goy hay feera valami pa.

⁸Nam ci sa vuɗi jewna vi Egipte, jar sumuna hiɗi jar farayna kaw.

⁹Nam gi ɗekka hiɗi sle ma ɦuyumda kuɗumna hayag nak nagata Egipte, kat Farawn hiɗi sa sunda valamu kaf kaw.

¹⁰Nam ci jaf-sumun goy ŋolo, nam ci muliyan sa donona,

¹¹Sihon, mulla vi sa Amoriyana, Og, mulla vi Basan, hiɗi muliyana vi Kanaan kafe;

¹²nam vul nagata visi goy voco'o, nam vul nagata visi goy voco'o tam Israyel sumuna valamu.

¹³Ma-Vatɗina, semda vaŋu ka ta-ta hay vatɗita, Ma-Vatɗina humsi gisi kaŋu hay jafsi voksiya voksiya pet.

¹⁴Ma-Vatɗina ma ka kitata vi sumuna valamu. Nam ma li slugota kay sumuna valamu.

¹⁵Lawayna vi jaf-sumuna mi doorota hiɗi ora, lopna vi ɓam sana.

¹⁶Vunsi ka'a, may nisi diɗi, irsi ka'a, may nisi ɗuwɗi,

¹⁷humsi ka'a, may nisi humɗi, nisi gi sukɗi kaw.

¹⁸Nisi sa kotsina slisi nisi nala, nisi kaf sa zam ɓam lawayn ma waana.

¹⁹Jafna vi Israyel, suburgi Ma-Vatɗina, jafna vi Aaron, suburgi Ma-Vatɗina.

²⁰Jafna vi Levi, suburgi Ma-Vatɗina, nigi sa li nar kuɗ Ma-Vatɗina, suburgi Ma-Vatɗina.

²¹Gi deɓ Ma-Vatɗina goy hay Siyon pa, nam ma ka musi hay Yerusalem. Suburgi Ma-Vatɗina.