Read Masana NULLA 139 Bible Online

NULLA 139 - Masana bible

NULLA 139

¹Tam ma ŋolla vi sa gi nulla. Nulla vi David. Ma-Vatɗina, naŋ fekanu, naŋ wan kaw.

²La nan mus gaa'a naŋ wi'e, la nan fok kulo'o naŋ wi kaw, naŋ wi varta vanu ay goy gine'e pa.

³La nan ka poya, naŋ wi'e, la nan buri gaa'a naŋ wi kaw. Naŋ fek hagata van kaf.

⁴Hay li ma vunan sli lawta kay di'e, naŋ wi lawt na'ta goy jew vatiya.

⁵Naŋ ŋuyan bugolonu vokanu kaw, naŋ tun ɓaŋ kanu kaw.

⁶Kayni ti wida ta ŋol suw yalla vanu, na' kulo suwanu, nan as fa'ɗi.

⁷Nan ma tuɗ hay liyn ma nan hin ŋusta vaŋ bugolanu ɗawn arige? Nan ma pir goy hay liyn ma naŋ wanɗi ɗawn arige?

⁸La nan tuɗ kulo'o hay dukalawna, naŋ ka ɗawni, la nan kot buura vanu hay liyna vi sa mitina, naŋ ka ɗawni lo.[38]

⁹La nan pi gilaŋatna vi liy ma cal goy ŋarpita tanu, la nan tuɗ mus goy sin niy-ŋolla,

¹⁰goy ɗawn pa kaw ɓaŋu ma ŋomanu, ɓaŋ ta jufta ma van ɗeŋe.

¹¹La nan di'e: Hin jufunda ɗubanu, haraŋ ma tanna muɗ goy jufunu;

¹²kiraŋ naŋu jufunda may ti jufundaɗi, henjeta wile'e ki falayt nala, jufunda kiraŋ ki haraŋa nala kaw.

¹³Kay naŋ kot gilesenu, naŋu mi ma kotanu kalaf hay sunu.

¹⁴Nan gaŋ deɓe kay naŋ kotan jifiy ŋolo. Lopna vaŋu yalda hayam ŋolo, nan wi kayni ŋaa'a ŋolo.

¹⁵Tuwanu may ŋayay vok iraŋ noŋɗi, hay li ma nan kotiya hay liyn ma goy ŋayaya, koti hiɗi yal ŋolo hay liyn ma ŋayayna vi nagata.

¹⁶Hay li ma ɓetna vi tuwanu bay kot tuwa, naŋ wanu, buura ma koti kanu ka ɗoy hay defterta vaŋ kaf, jew a buur namna co'o.

¹⁷Lawna, varta vaŋu kiran zul ŋolo, na' ka ŋolo ŋolo.

¹⁸La nan ŋaɓ varta vaŋu, na' ŋol dak-dak suw ŋeslna. Hay li ma nan zliy kulo'o, nan ka hiɗi naŋu dok-doko.

¹⁹Lawna, caŋ sa jiw-zlatna goy cige. Nigi sum sa ɦok busuwn goyna, tuɗgi goy gine hiɗi nanu.

²⁰Kay nisi yaŋ seŋu hay ci-matta, sa gaw kaŋŋa yi semda vaŋu hay sinda kaw.

²¹Ma-Vatɗina, nisi sa ka gawt kaŋu, nan ma ka gawt kisi lay ɗisu? Nisi sa yaw kulo kaŋu, nan ma ɗuwsi liwis lay ɗisu?

²²Nan ka gawt kisiya hiɗi dikan kepe, nisi muɗi si sa gawt kanna.

²³Lawna, fekanu, waŋ dikanu kaw. Wakanu, waŋ varta vanu kaw.

²⁴Ɗuwanu, la nan ka hay hagata ta joota kla, tunan iranu hay hagata vi vatɗita.